Read Biete NEHEMIA 4 Bible Online

NEHEMIA 4 - Biete bible

NEHEMIA 4

¹Sanbalata khan keini Judahein kulpui siam inṭha kin phut iti a riatin chu a ning a thik a, a ne phengsan tâk a.

²A suapuihei neh Samari sipaihei maah khan thu â sîr a, “Hi Juda mi dualdôkhei hin im an itho hi? Khopui siam inding an itum tite duai manih? Ribôlna lan a, sûnka sunga sin hi rizoi rang an isôn mani? Lungbang isehchit tâk ribuk khôm kâr ata hi inrua lung an isiam thei rang mani?” a ti a.

³Amon mi Tobia kha a kôlah â ding ṭian a, ani khan, “Hang inding rêng rêng riseh ba; sihal khom hang lui sela a lung kulbang chu isim rem rum zel ta no nîm?” a ti a.

⁴Khante, kei chu ki ṭongṭaia, “O kin Pathian, en ta musitin kin iom hi; an ne sîrinsiatna chu anmani lu chung ngêiah iṭhum pêk inla, anni khom tak rama manih mualinphoi takkan intâng roh.

⁵An siatnahei chu izâ non la, an sualnahei chu ringil pêk tlak no roh, kulpui siamtuhei an ne imusit a nit hi,” ki ti a.

⁶Khanchu, kulpui khah kin siam mai a; mipuihei khan tho nuamna lungril an riput tak tak sikin kulpui chu artenka dôra risâng chu a rêngkan kin sung riai tâk a.

⁷Khannisela, Sanbalata hei, Tobia hei, Arab mihei, Amon mihei neh Asdod mihei khan Jerusalem kulpui kha siam inṭha a nit thiai mai iti neh a siatna munhei kin iruk inṭhat iti an riatin chu an ning a thik tâk a.

⁸Khanchu, Jerusalem kha hong irûn a, buaina hong isiam an tum tâk a.

⁹Pathian ziangah kin ṭongṭai a, sûn neh zân anni lei irung rang mi kin sia mai tâk a.

¹⁰Khante, Judai rama mihei khan lâ khatkah an isak ngai an nei a. “Puakrik tak kin pêl a, kin ritha arzal zoi tâk a, Nimnok lak ipai rang a tam natinsat a; Kulpui chu ingkah takin im kin siam thei rang tak na?” itin.

¹¹Khante, kin irâlhei lakin an ne sit a, “An lâiah ei hang fe a, ei hang that a, sin kha ei hang inringam pêk mâkah chu îte reh no nia, imu khom ne mu no nih,” an ti a.

¹²Nikhomsela, Juda mi an lâia omhei khan kin zianga hongin kin irâlhein kin chunga an thil phanrûk kha an ne hong iril mai a.

¹³Khanchu, mipuihei kha khandaihei, ifeihei, phelhei ki pêk a, kulpui pen tiang, bang la siam zoi nona mun munah khan a nam namin ṭangmun ken khuar tâk a.

¹⁴Khante, ker fang vêla mipuihei kha an bei a dong iti ki mu a; khanchu, an ziangah neh an ruaituhei ziangah neh an mi lianhei ziangah khan, “Ei irâlhei chu ṭi no unla, Rêngpa roinpuizia neh inrîtzia kha reh mai rei. Nin chipuihei hi rung unla, nin naihei, nin nupuihei neh nin inhei ihoi rangin doi rei,” ki ti a.

¹⁵Khante, kin irâlhei khan an thil phanrûk kha kin riat suak iti neh an thil tho tum khah Pathianin chanlamboiin a siam pêk iti an riat tâk a. Khanungchu, kin rêngkan kulpui isiam kha kin sunzom nôk tâk a.

¹⁶Khantaka ta chu ki tlangvâlhei kha arzâtkah sin an tho a, arzâtkah khan ifeihei, iphohei, phelhei kha an chôi chit a, ṭângiphohei ihâkin an ne rung a. Nam ruaituhei khan mipui, kulpui siamtuhei kha an thlop ngit mai a.

¹⁷Kulpui siamna rang mangrua pêltuhei ilua khomin an kut kiangkan sin an tho a, kiangka tiang riamrei an chôi a.

¹⁸Kulpui siamtuhei khom khan an khandai an vong chit a. Khante, riningna bekul itumtu khah ki kôlah a om a.

¹⁹Khante, mipuihei neh an milianhei neh an ruaituhei makungah khan, “Sin chu a tamin, arzat tak tak a, kulpuiah ei rizarin ei rilat ok ok a;

²⁰khasikin, bekul irî nin riatna tiang takah khan ki ziangah hong ribûm rei. Ei Pathianin irâl chu a ne idoi pêk rang a nit,” ki ti a.

²¹Khanchu, sûn tin kôlrisam ata ârsi lang idênin arzâtkan sin chu kin tho a, arzâtkan ifei ichôiin an ne rung a.

²²Khante, kha lâi ngirah khan mipuihei ziangah, “Zânah khopui kha ei vêng theina rangin tukhom anmani neh an isomhei chu Jerusalem kho sungah an riak riai rang a nit,” ki ti a.

²³Khangkan, kei khom, ki suapuihei khom, ki tlangvâlhei khom, vêngtu ne zui ngaihei khom, tute rêng rêngin kin silbom khek ngai mang ung a, kin riamrei chu kin irbel ṭian mai ngai a nit.