Read Biete NEHEMIA 5 Bible Online

NEHEMIA 5 - Biete bible

NEHEMIA 5

¹Zoro itena sôt manih nungah khan, mipui ipa neh nupanghei kha an chipui Judahei chungah an riphun suai suai tâk a.

²Mi ṭhenin, “Keini hi insungkua lian kin nit a, fâknêk tiang kin intak rai tâk,” an ti a.

³Ṭhenkan, “Kin ṭâm sikin kin loihei, kin grep rikulhei, kin inhei khom hi siakhamin kin îtung tâk a nit,” an ti a.

⁴Ṭhenka nôkin, “Kin loihei neh kin grep rikulhei siakhamin rêng sia chôi rang sum ithung kin ilâk a nit.

⁵Juda mi ngir kin nit a, kin naihei khom Juda dang naihei angkah ngir an nit a; nikhomsela, hi kin nainuhei neh kin naipahei hi suak rangin kin întâng titak rang a nit hih; kin nainu ṭhenkahei vâng chu bôiah an îtâng pial tâk a nit. San rang dân khom reh khâi mang ung, kin loihei neh kin grep rikulhei lak chu mîn an ne lâk pêk tâk a,” an ti a.

⁶Khante, an riphunna thuhei khah ki riatin chu ki ning a thik a.

⁷Khanchu, ki lungrilin ki ngaitua, milianhei neh ruaituhei kha ki sêl a, an ziangah, “Nin suapuihei nin inuai sia a nit,” ki ti a. Khante, kha thubuai ingaitua rangin vântlâng ki koibûm tâk a.

⁸Khante, an ziangah, “Nam danghei zianga izuar ei chipui Judahei kha ei thei lam lamin ei ritlan a. Atûnah hin nangmani ngêiin nin chipuihei chu nin ziangah nin înrizuar tâk a nit hi,” ki ti a. Ruaituhei kha an dâirek a, an ne sâmna rang îte reh khâi mak a.

⁹Khanungchu, an ziangah, “Nin thiltho hih ai ṭhat tlak ino a nit. Pathian ṭi unla, thil idik nin tho rang a nit. Khanchu, ei irâl Jentailhei khan ne sîrinsehna rang an imu no rang a nit.

¹⁰Keimah neh ki suapuihei neh ki tlangvâlhei khomin mi danghei chu kin sum neh buhei kin inritâng ngai a. Atûnah hin lâkai ei înritânghei izâ tâng ei ti u.

¹¹Vuani ngêiah hin an irtâng murdi sumhei, buhei, uainhei neh riakhei izâ riai ei ta; an loihei, an grep rikulhei, an oliv bilhei, an inhei khah peh khîr nôk riai ta rei,” ki ti a.

¹²Khanchu, ruaituhei khan, “Peh kîr nôk riai kin ti, an chungah îte phût no ning ung; ni ti lam angkah takah khan thông kin ti,” an ti a. Thiampuhei kha ki koi a, an makungah khan ruaituhei chu kha an ṭonginkung angkah taka tho ngêt rangah khan vâni ken risâm a.

¹³Khanungchu, ki diarkâi khah ke thing a, “Hi ṭonginkung angkah taka tho no kangân chu Pathianin ithing a ta, a inhei neh ai nei murdi ithing iṭhul pêk riai a ta, kut korongin om a ti,” ki ti a. Khantaka mi ribûmhei murdi khan, “Amen” an ti a. PUMAPA an inpâk a. Khante, ruaituhei khan an ṭonginkung angkah khan an tho tâk a.

¹⁴Rêng Artazerzia inlal kum sôminikna ata kum sômithumkah inikna kum ten idên, kum sômleiinika sung Judai ram optu ki om sungah khan keimah neh ki insungmihei khan Ram-optu fâk tum angkah khan bu rêng rêng khom fah mang ung a.

¹⁵Ki matona Ram-optu lei ichang murdihei kha mipui ta rangin puak rik an nit a, tangka sômilika man bu neh uainhei an phût pêk ngai a. Khabanah khan an isomhei ilua khom mihei chungah khan om ilianin an om ngai a. Khannisela, kei chu Pathian ṭina sikin khangkah khan tho mang a.

¹⁶Kulpui siam inṭhatna rangin ker tha murdi ki sêng a, ram rêng rêng richoh khom richoh mang a; ki tlangvâlhei khom sin khah ithon kulpuiah khan an iom riai mai ngai a nit.

¹⁷Kha bang khah ni loiin kin kôlvêla nam danghei lâi ata ki zianga hong ngaihei banah, Juda ruaituhei neh mi danghei mi riza lei sômringaka khalai ki irkhîlpui ngai a nit.

¹⁸Khante, nîn tin sechal khatkah neh bera irukka â ṭha ṭha ki that a nang a; ârhei khom itam takka kin that ngai a, sun sômka dan ikipah uain ithar tak khom ki înrifûk pêk ngai a nit. Nikhomsela, mipuihei puak hi an rik ok sikin Ram-optu dongtum bîk kha kî phût ngai ino a nit.

¹⁹“O ki Pathian, hi mihei ranga ki sintho murdi hi ki ṭhatna rangin reh mai roh,” ki ti a.