Read Biete NEHEMIA 6 Bible Online

NEHEMIA 6 - Biete bible

NEHEMIA 6

¹Khante, Sanbalata hei, Tobia hei, Arab mi Gesema neh kin irâlhei murdi khan kulpui kha kin siam inṭhat zoi a, a kotkhârhei la khop tak no khom unlang arkuana rêng rêng om khâi mak iti an riat a.

²Khanchu, Sanbalata neh Gesema khan thu an hong thon a, “Hong inla, Ono phâia khua khatkatah lei rimu rei,” an ti a. Khannisela, ki chungah thil ṭhano tho an itum pial a nit a.

³Khanchu, keiman an ziangah, “Sin roinpui tak ki tho a, zuang thei no ning e; îtho rang im nin zianga zuangin sin kha a irngam rang,” itin mi ki tir a.

⁴Khante, khangkah ngaingirah khan voilika thu an ne hong thon a; khangkah ngira khan ki lei sâm a.

⁵Khanungchu, Sanbalata khan khangkah ngira khan a voi ringanan â som lekha pip ino hong inchôiin ki ziangah a hong tir a;

⁶Kha lekhaah khan, “Nangmah neh Judahei khan rihel nin inlung a, khasikah khan kulpui kha nin isiam a nit iti thu nam danghei lâiah ân thang iti Gesema khan a ne ril a; khabanah, isîr dânin nangmah hi an rêng ini ni tum a,

⁷Judai rama rêng ni nit tâk iti Jerusalema inpuang vêl rangin zânthla khom nen kung diam tâk iti thu an ne sîr pêk sa a. Hi thu hih rêng khomin ai riat zel ngêt rang a nit a, khasikah khan zuang inla, lei risôn rei,” iti a chuang a.

⁸Hingkan ki sâm a, “Ne sîr lam angkah rêng rêngah hin îte thu omak. Nî phuatot korong a nit hi,” itin a ziangah mi ki tir a.

⁹“An sintho khah an puitling thei nona rangin an kuthei kha inrizalin a om a rang,” itia ne ṭhi an nuam rai sika a nit. Ki ṭongṭai a, “Atûnah hin O Pathian, ki kuthei hi nen rât pêk roh,” ki ti a.

¹⁰Hi zoro ngirah hin Mehetabela nai, Delaia naipa Semaia ziangah ki fe a, a in ata ai suak thei khâi ino a nit. Ani khan, “Tempila Mun rithiangah khan ei ruaikan la va ribi rei, biak in khârpui khah khâr khap ei ta; nang ithat an itum a nit, tik zân khomah an ihong thei a nit,” a ti a.

¹¹Khante, keiman, “Kei chu lâizâm ithoa ribih ngai mi ni mang e. Mahni ringna inzôkna rangin biak in sungah ki irbîk rang nî sôn mani? Tho tlak no ning e,” ki ti a.

¹²Ki hang ngaitua infelin chu Semaia kha Pathian itir ni mak iti ki riat suak a, nen châina ranga Tobia neh Sanbalata hei khan an lei îruai pial a nit a.

¹³Nen ṭi a, thilisual nen tho a; khanchu, ker ming an insiat theina rang neh an ne sîrinsiatna ranga an îruai a nit.

¹⁴Khante, ki ṭongṭai a, “O ki Pathian, Tobia neh Sanbalata hi an sintho angkah takah hin reh mai inla, kuttum tho roh; zânthlanu Noadii neh zânthla dang ne ṭhi tumhei murdi khom reh mai roh,” ki ti a.

¹⁵Sûn sômringaka sûnnikah sin kin tho nung, Elul thla, a sûn sôminika sûn ringa nî-ah khan kulbang kha kin siam inṭhat zoi fel tâk a.

¹⁶Kin vêla om nam danghei neh kin irâlhei khan amakhah an lei riatin chu an rilo ân thing tâk a, mi tinin kin Pathian ṭangpuina sin kha itho zoi a nit iti an riat a.

¹⁷Kha lâiah khan Tobia neh Juda ruaituhei kha lekha itam takka an lei rithon mai ngai a.

¹⁸Tobia kha Ara naipa Sekania mâkpa a nit sikin Judai rama mi tam takka ṭongrikhâm a, ama thunrualpui an om a. Khabanah khan Tobia naipa Jehohanana khan Berekia naipa Mesulama nainu khah nupuiin ai nei a nit.

¹⁹Mi itam takkan ki riat ngêiah Tobia sintho ṭhathei an isîr ngai a; ki thusîrhei murdi a ziangah an îthlun ngai a nit. Khangkan Tobia khan ne ṭhina rangin lekhahei khom a ne hong ithon mai ngai a nit.