Read Biete NEHEMIA 7 Bible Online

NEHEMIA 7 - Biete bible

NEHEMIA 7

¹Khante, kulpui kha isiam zoiin, kotkhârhei khom ikhop a nit tâk a, kotkhâr vêngtuhei, lâ saktuhei, Levihei an sintum khom inkol zoi an nit tâk a.

²Jerusalem khopui optu rangin mi inikah ki phun a, khatkah chu Hanania a nit a, a dang khatkah chu sipai pôl ruaitu Hananaia a nit. Hananaia kha mi diktak neh mi danghei nêka Pathian iṭi mi a nit.

³Jerusalem kulpui kotbâihei kha zîngah, inî a suak nung banga ong rangin ki ti a; kholoia khom inî tlâk nung, vêngtuhei ṭin ruala khâr a, ikal riai rangin ki ti a. Khabanah khan Jerusalem khuaa mi ṭhenkahei khom kha kotbâi ivêng bîk rang hei, tolâidung ivênga rifang ngai rang hei, mi iphun sa rangin ke ril sa a.

⁴Jerusalem chu khua lian a nit a; nikhomsela, a mi omhei an roi a, inhei khom itam takka chu la sin ino a nit.

⁵Khante, Pathianin ki lungrilah, mi lianhei, ruaituhei neh mipui hei ikoi bûm a, an chibulhei dungizui a, tep rangin a nen riat a. Khante, bôia tâng hong ikîr masatakhei riming riziakna bu chu ki mu suak a, amakhan hingka hin riziak ki mu a.

⁶Bôia tâng itam takkah chu Babilon rama rithokin Jerusalem neh Judai ramah mahni omna ngai khua chitah an kîr nôk a. An insungkuaa rêng Nebukadnezaran bôia a ṭhuia rithokah khan Babilonah an la îtâng mai a nit.

⁷An ruaituhei chu Zerubabela, Josua, Nehemia, Azaria, Raamia, Nahamania, Mordekaia, Bilsana, Mispereta, Bigvaia, Nehuma, Baana hei an nit.

⁸Bôia tângna ata hong ikîr nôk Israelhei an panam chit neh an tam dân chu hingka hin an nit. Parosa richihei sânginika rizalei sômsarika inikah; Sefatia richihei rizathumka sômsarika inikah; Ara richihei rizarukka sômringaka inikah; Jesua neh Joaba richihei lâia Pahat-Moab richihei sânginika rizariatka sômleiiriatkah; Elama richihei sânglei rizanika sômringaka ilikah; Zatua richihei rizariatka sômilika ringakah; Zakaia richihei rizasarika sômirukkah; Binuia richihei rizarukka sômilika iriatkah; Bebaia richihei rizarukka sôminika iriatkah; Azgada richihei sânginika rizathumka sôminika inikah; Adonikama richihei rizarukka sômirukka sarikah; Bigvaia richihei sânginika sômirukka sarikah; Adina richihei rizarukka sômringaka ringakah; Hezekia richia mi Atera richihei sômikuakka iriatkah; Hasuma richihei rizathumka sôminika iriatkah; Bezaia richihei rizathumka sôminika ilikah; Harifa richihei r(...)

²⁶An richibulhei hi khuaa lei iomhei khom hingka hin an hong ikîr sa a nit. Bethlehem neh Netofa kho mi rizalei sômiriatka iriatkah; Anathot kho mi rizalei sôminika iriatkah; Beth-Azmavet kho mi sômilika inikah; Kiriat Jearim, Kefira neh Berot kho mihei rizasarika sômilika ithumka; Rama neh Geba kho mi rizarukka sôminika khatkah; Mikmas kho mi rizalei sôminika inikah; Bethel neh Ai kho mi rizalei sôminika ithumkah; Nebo kho danga mi sômringaka inikah; Elam kho danga mi sânglei rizanika sômringaka ilikah; Harim kho mi rizathumka sôminikah; Jeriko kho mi rizathumka sômilika ringakah; Loda neh Hadida neh Onoa kho mi rizasarika sôminika khatkah; Sena kho mi sângithumka rizakuakka sômithumkah an nit.

³⁹Thiampu nam bôia tâng hong ikîr nôkhei chu hihei hi an nit. Jesua panama Jedaia richihei rizakuakka sômsarika ithumkah; Imera richihei sânglei sômringaka inikah; Pasura richihei sânglei rizanika sômilika sarikah; Harima richihei sânglei sômleisarikah an nit.

⁴³Levia richihei bôia tâng hong ikîr nôkhei; Hodavia panama mi Jesua neh Kadmiela richihei sômsarika ilikah; Tempil lâ saktuhei: Asafa richihei mi rizalei sômilika iriatkah; Tempil kotkhâr vêngtuhei: Saluma, Atera, Talmona, Akuba, Hatita, Sobaia richihei mi rizalei sômithumka iriatkah an nit.

⁴⁶Tempil sinthotu bôia tâng hong ikîr nôkhei: Ziha, Hasufa, Tabaota, Kerosa, Sia, Padona, Lebana, Hagaba, Salmaia, Hanana, Gidela, Gahara, Reaia, Rezina, Nekoda, Gazama, Uza, Pasea, Besaia, Meunima, Nefusesima, Bakbuka, Hakufa, Harhora, Bazlita, Mehida, Harsa, Barkosa, Sisera, Tema, Nezia, Hatifa richihei an nit.

⁵⁷Solomona som bôia tâng hong ikîr nôkhei; Sotaia, Sofereta, Perida, Jaala, Darkona, Gidela, Sefatia, Hatila, Pokeret-Hazebaima neh Amona richihei an nit.

⁶⁰Tempil sinthotu neh Solomona som bôia tâng hong ikîr nôkhei chu an rêngkan mi rizathumka sômikuakka inikah an nit.

⁶¹Khante, Delaia richihei, Tobia richihei, Nekoda richihei chu mi rizarukka sômilika inikah an nit a, anni hi Tel Mela khua hei, Tel Harsa khua hei, Kerub khua hei, Adon khua hei, Imer khua heia hong ikîr nôk an nit a. Khannisela, annihei hin Israel richi an nitna fel neh an chibul an isui thei ino a nit.

⁶³Hi thiampu panam lâia mihei hin an chibul an isui thei ino a nit: Hobaia richihei, Hakoza richihei, Barzilaia richihei khan an chibulhei angka chita ritepna lâiah khan an riming riziakna an imu no a nit. Thiampu Barzilaia naihei richibul Barzilaia hin Gilead mi Barzilaia nainu nupuiin a nei a, a tarpu nam riming kha a irput thal tâk a nit. An chibulhei an indang theino sikin rithiang inoa ringaiin an om a, thiampua pom an init ino a nit.

⁶⁵Khante, Judai ram optu Tirsatha khan, “Urim neh Thumim imang thei thiampu an om mâkah chu Pathian zianga thillan kha nin fâk rang ni mak,” itin anni chu â ril a.

⁶⁶Bôia tâng hong ikîr nôkhei chu an rêngkan mi sîngilika sânginika rizathumka sômirukkah an nit a. An isom nupang neh ipa mi sângsarika rizathumka sômithumka sarikah; Lâ saktuhei mi rizanika sômilika ringakah an nit. Sakor rizasarika sômithumka irukkah, Sakuartung ilian chi rizanika sômilika ringakah, Saringsei rizalika sômithumka ringakah, Sakuartung sângirukka rizasarika sôminikah an nit.

⁷⁰Nam tin ruaituhei khan Tempil siaminṭhatna rangin tholôm an tho a. Ram optu khan rângkachak her iriatkah, ribôlna rihûm sômringakah, thiampu zakorfual rizarngaka sômithumkah a pêk a. Israel nam ruaituhei khan rângkachak her rizalei sômirukka iriatkah, tangkarua her sânglei rizanika sômringakah an pêk a. Mipui vântlâng khan rângkachak her rizalei sômirukka iriatkah, tangkarua her rizalei sômilikah, thiampu zakorfual sômirukka sarikah an ipêk a nit.

⁷³Khanchu, thiampuhei, Levihei, Tempil kotkhâr vêngtuhei, lâ saktuhei, vântlânghei, Tempil sinthotuhei, Israel mi murdihei khan Judai ram khuaheiah khan ommun an siam chit tâk a.