Read Biete NEHEMIA 8 Bible Online

NEHEMIA 8 - Biete bible

NEHEMIA 8

¹Israel mi murdi mahni khua chitah an om fel nung, a thla sarina a hong tlung tâk a. Khante, a thla sarina sûn masa takah khan mi murdi chu inrual takkan Tuikuang Kotbâi kôl mun rizat takah khan an ribûm a. Khante, lekha riziaktu neh thiampu Ezra khah Israelhei zôm ranga PUMAPA Dân, Mosia manga ai pêk Dân bu kha hong ichôi rangin an iril a.

²Khanchu, Thiampu Ezra khan mipui ribûmnaah nupang neh ipa, naipanghei khom, â rethiam thei ten murdi maah khan Dân bu khah a hong chôi a.

³Khante, Tuikuang Kotbâi kôl mun rizat takkah khan nupang, ipa neh â rethiam thei tenhei makungah khan zînga rithokin sûnlâi idênin a tep a, mi murdi khan iṭha takkan an ikuar an sung a.

⁴Khangkana zoroa mang ranga an isiam thing docham risângah khan Ezra kha â ding a; â changtiangah khan Matithia, Sema, Anaia, Uria, Hilkia, Maaseia hei an iding a; â voitiangah khan Pedaia, Misaela, Malkiza, Hasuma, Hasbadana, Zakaria, Mesulama hei an iding a.

⁵Ezra kha docham chungah mipuihei nêka risângah khan â ding a, an mit chu a chungah khan a fûk chit a. Dân bu lekhabu rizuat kha a hang iong kaneh chu mi murdi kha an iding riai a.

⁶Khanchu, Ezra khan, “PUMAPA, Pathian roinpui chu inpâkin om riseh” a ti a. Mipuihei khan an iban chungtiang an phar a, “Amen, Amen,” itin an lei don a. Khante, an ikhûna, an mâia lingisikin PUMAPA chu chubai an ûn a.

⁷Khanungchu, an om mun chitah khan an iding a, Levia chi Jesua, Bania, Serebia, Jamina, Akuba, Sabethaia, Hodia, Maaseia, Kelita, Azaria, Jozabada, Hanana, Pelaia hei khan mipuihei kha dân an lei rilfia pêk a.

⁸Khante, Lekhabu, Pathian Dân bu thu khah ifel takkan an tep pêk a; a omzia an ilet pêk a; khanchu, an itep khah mipuihei riat thei rangin an rilfia pêk a.

⁹Khante, dân thu kha an riatin mipuihei khah an ṭap an ṭap tâk a. Khanchu, ram optu Nehemia hei, thiampu neh lekhaziaktu Ezra hei, Dân rilfiatu Levia chihei khan mipuihei ziangah khan, “Vuansûn hi PUMAPA nin Pathian sûn rithiang a nit; khasikin, ngaiinseh no unla, ṭap no rei.

¹⁰Atûnah hin nin inah fe unla, ruai iṭhe unla, nin bu neh uain khah inrifûk rang nei inohei fapui rei. Vuansûn hih ei PUMAPA ta ranga sûn rithiang a nit hih, ngaiinsian om no rei. PUMAPA-a nin lômna khah nin râtna a nit,” an ti a.

¹¹Levia chihei khan mipuihei kha, “Ṭap khâi no rei, vuansûn hi sûn rithiang a nit a; ingûi khom ngûi no rei,” itin an ithlêm ithlâi tâk a.

¹²Khanchu, thu an irilfia pêk khah an riatthiam sikin mipuihei kha an inah an fe a, an fâk a, an in a, mi danghei an sem sa a, râifân takkan an om tâk a.

¹³A tûkah khan nam tin ruaituhei, thiampuhei, Levia chihei kha dân thu risei rang ngirah khan lekha riziaktu Ezra ziangah an ribûm a.

¹⁴Khante, PUMAPA khan Mosia mangin Israelhei zôm rang Dân a pêk a, kha Dân bu-ah khan Dângdi Kût an mang sung chu dângdi nuaiah an om ngai rang a nit iti an mu suak a.

¹⁵Khanchu, Jerusalemah neh kho dang murdiah hingka hin thu an pêk a; “Itlângheiah fe unla, oliv iṭanghei, oliv lem iṭanghei, rimui iṭanghei, itûm ibânhei, thing iṭang danghei sât unla, Dân thu riziak angkan, dângdite siamna rangin va lah rei,” an ti a.

¹⁶Khanchu, mipuihei khan sôl khah an va sât a, mi murdîn an in chungah hei, an kot tualah hei, Tempil tualah hei, Tuikuang Kotbâi mun rizat takah hei, Efraim Kotbâi mun rizat takah hei dângdite an sin chit a.

¹⁷Bôia tâng hong ikîr nôkhei murdi khan dângdite khah an sin a, amakhan an riak a, Nuna naipa Josua thi nungah khan chu Israela richihei khan hingkana an tho hih a voi khatna a nit. Mi tin an lômin an râi a fân tak tak a.

¹⁸Kut riphut nî-a rithoka a mong idênin nîn tin Pathian Dân bu khah an tep mai a. Khante, sûn sarika sung ruai an iṭhe a, a sûn iriat nî chu ruaiṭhe ṭin nî a nit a, thupêk angkan inkhômna rimuk tak ineiin an iṭin ngai a nit.