Read Biete NEHEMIA 9 Bible Online

NEHEMIA 9 - Biete bible

NEHEMIA 9

¹Kha thla ngir, a sûn sôminika ilika nî-ah khan Israel mihei kha an ribûm a, borapuan isilin bu an ngei a, an lu-ah ipil an phul a.

²Israel mihei khan nam danghei ata ân ranin an om tâk a. Khanungchu, an idinga, an sualna neh an pi neh puhei siatna sikin thupha an chôi a.

³Khante, mahni mun chitah an iding a, dârkâr ithumka sung kha PUMAPA an Pathian dân bu khah itep pêkin an om a; dârkâr ithumkah an sual thupha an chôi a, PUMAPA an Pathian chu chubai an ûn a.

⁴Levia chihei rang docham risâng a om a, amakhan Jesua, Bania, Kadmiela, Sebania, Bunia, Serebia, Bania, Kenania hei kha an iding a. Iring takkan PUMAPA an Pathian ziangah an ṭongṭai a.

⁵Khante, Levi mi Jesua, Kadmiela, Bania, Hasabneia, Serebia, Hodia, Sebania, neh Pethahia hei khan, “Iding unla, PUMAPA nin Pathian chu kumkhuantluangkan inpâk rei. Inpâkna neh chôiinrisângna murdîn ai tluk phâk ino arming roinpui chu inpâkin om riseh,” an ti a.

⁶Khanungchu, Israel mipuihei kha hingka hin an ṭongṭai a, “PUMAPA, nangmah bang hi PUMAPA ni nit a; Rivânhei neh rivâna ârsihei khi nî siam a nit a. Leilung neh tuikhanglian neh a sunga om murdihei chu nî siam a nit a; An rêngkan ni vong inṭhat ngai a. Rivâna omhei khan ikhûnin chubai nang an iûn ngai a nit.

⁷PUMAPA Pathian, nangman Abrama khah ner thlang a, Babilon ram Ur khua ata ni ṭhui suak a, Arming Abrahama ni sak pêk a.

⁸A lungril chu ni chungah a iamom iti ni riat sikin a ziangah thuthlung ni siam a. Kanan ram chu ipe nen kung a, Hit mihei, Amor mihei, Periz mihei, Zebus mihei, Girgas mihei, omna ram chu, A chihei la lua rang ram rangin ipe nen kung a. Nang chu ni iamom a, ni ṭonginkung chu ni len tâk a.

⁹Kin pi neh kin puhei Aigupta rama an dengthei zia khah ni mu a. Tuipui sen rikama ṭangpui an ngênna rôl khah ner ngai pêk a.

¹⁰Faroa neh â som murdihei neh a rama mi murdihei chungah, Risinsiana sinrikhêl tak takhei nen lang pêk a; Ni mihei chu an nuaisia iti nî riat a nit, Khasikah khan atûn tenan ner ming chu a înthang a nit.

¹¹An matona tuikhanglian chu ni ṭhen pêk a, Rinêng ichârah tuikhanglian chu nen rikan a; Anmani rizûltuhei chu tui inthûkah, Tui inthûk takah lung rinîk angkan nen rinîk a.

¹²Sûnah sûmpualin ne ruai a, Zânah khom an fena rang lamah anmani el invâr rangin meichokin ni ṭhui ngai a.

¹³Sinai tlângah khan rivâna rithokin ni zuang ṭum a, Ni mihei chu ni zuang isôn a, Roirêlna dik takhei, dân dik takhei, Thupêk iṭha tak hei, inriseina dik takhei kha ni pêk a.

¹⁴Sabat nî ser inrithiang rangin nen risei a, Ni bôi Mosia mangin thupêkhei, dânhei, inriseinahei ni pêk a.

¹⁵An vonṭâm lâiin rivâna rithokin ibai ni pêk a, An tuirihâl lâiin lungpui ata tuipût ne sua pêk a, An zianga ipe ni înkung ram va lua rangin thu ni pêk a.

¹⁶Kin pi neh puhei khah an ripâk a, An tuklul an inliana, ni thupêkhei chu zôm nuam mak a.

¹⁷A nit, zôm nuam mak a, Ni sintho murdi an ringil a, An lâia ni sinrikhêl thohei khom kha an iriat nuam ino a nit. An ripâk a, an rihel a, Aigupta bôia ṭhui lût nôk rang ruaitu an rithlang a. Nikhomsela, nang chu izâ ranga risiam ṭian Pathian, Mi lunginkham thei, lungkhamlianna sip, lungrivuai, zâiidam ni nit a, Anmani chu marak ual mak che a.

¹⁸A nit, serât rilim an siam a, ‘Amahih a nit, Aigupta ram ata ne ṭhuisuaktu pathian chu,’ an ti a. O PUMAPA, mualphoi nang an sak vang na!

¹⁹Nikhomsela, ni lungkhamna natinsat tak sikah khan, Anni chu ramchârah khan marak mak che a, Sûn neh zâna lampui inmu ngaitu sûmpual neh meichok kha khâi inrimang pêk mak che a.

²⁰Lungidiar takkan nen risei mai a, Manna-ah khan ne fa a, An tuirihâl inboina rangin tui ni pêk a.

²¹A nit, ramchârah khan kum sômilika sung ne fa a, îte risam mak a, An silbomhei chu lui mak a, an kehei khom ithling mak a.

²²Namhei kha nen nê a, an ramhei kha an kutah ni pêk a, Hesbon rêng Sihona inlalna ram kha an lua pêk a, Basan rêng Oga ram khom an lua a.

²³An richihei chu rivâna ârsi zâkan nen pung pêk a, An lua ranga an pi neh puhei zianga ni lei iti tâk ramah khan ni ṭhui inlût tâk a.

²⁴Kanan ram khah an lâk a, kha rama omhei khah nen tlôm a, Kanan mihei neh an rênghei khah an nuam lam lama an tho rangin an kutah ni pêk a.

²⁵Ni mihei khan kulpui inei khopuihei, Ram iṭha tak takhei an lâk a, Thil iṭha tinrênga sip inhei an lua a, Tuikuang choih isaihei, grep rikulhei, oliv bilhei, theikung itam takhei an nei a. Khanchu, an fâk a, an khop a, an hong tak tâk a, Ni ṭhatna natinsat takah khan râifânin an iom tâk a nit.

²⁶Nikhomsela, ni chungah an rihel a, ni thu zôm nuam mak a; Ni dân khah nung an song a, Ni tianga inngat nôk ituma ril ngai ni zânthlahei khah an that a, Zoro tin nang an imusit ngai a nit.

²⁷Khasikah khan anmani dengintheitu an irâlhei kutah khan ni pêk a; An lungzîng lâiin nang an isam a, rivân ata ni lei ringai pêk a. Ni lungkhamlianna natinsat takah khan, An irâlhei ata sanisuatu rang ruaitu ni pêk ngai a.

²⁸Nikhomsela, râl ringama an hong omin chu ni mit muah thil ṭhano an tho nôk zel ngai a. An irâlhei kutah ni pêk nôk a, an chungah thu an nei a; Khan an insîr a, nang an isamin chu rivâna rithokin ni lei ringai pêk a; Voi itam takkah ni lungkhamlianna khan ni san isua nôk ngai a.

²⁹Ni Dânhei khah izôm rangin ne ril ngai a, Nikhomsela, an risong a, ni thupêkhei ipom ngai mak a, Mîn an zôma an ringpui theina ranga ni dân pêkhei kha, Lungilian neh tuklul ilian takka omin, an izôm nuam ngai ino a nit.

³⁰Kum itam takkah lungidiar takkan ni ril a, Ni zânthlahei thu nen ril ngai a; Nikhomsela, an ikuar an insêt a; Khasikin, ram dang mihei kutah khan nî pêk nôk ngai a nit.

³¹Ni lungkhamlianna sikin anni chu imarakin, inrimang mak che a. Nang chu mi lunginkham thei tak, lungkhamlianna sip Pathian ni nit.

³²O Pathian, kin Pathian, ni roinpui vang na! Thu ni neiin iṭi ni om vang na! Ni thuthlung chu ni vong ngit a; Asuria rênghein an ne hong inê ata atûn ten idênin deng kin thei vang na! Kin rênghei, kin ruaituhei, kin thiampuhei, kin zânthlahei, Kin pi neh puhei, ni mihei murdi hin kin tuang a, Kin tuangna hi ner ngainêp pêk no roh.

³³Nangman chu idik takkan thil ni tho a, Kuttum ni ne itho khom hih nî tho indik a nit. Nang chu ni iamom a, keini chu kin îsual a nit.

³⁴Kin chibulhei, kin rênghei, kin ruaituhei, kin thiampuhei khomin ni dân kha lei zôm mak a; Ni thupêkhei neh ni thu inriathei kha lei ipom mak e.

³⁵Ni ṭhatna sikin rênghei kha ni mihei chungah an inlal a, Nî pêk ram rizat neh ram iṭha takah an om lâiah khan; Nikhomsela, an thil thonsual ibângin, Ni sin tho ual mak a.

³⁶Ringai ta, atûnah hin ni ram ne pêkah hin bôi kin nit a, Hi ram iṭha tak fâknêk vângna ramah hin.

³⁷Kin sual sika kin chunga rêng nî phunhei khan thil ivâng murdi an huai vang a. Kin chungah neh kin ranhei chungah an nuam nuamin thu an nei a, Kin ilung ai zîng titak tak a nit,” an ti a.

³⁸Kin chunga thil zuang itlunghei sikah khan, keini Israel mihei khan thu dettak kin rikhâm a, kin riming kin riziak a; khanchu, kin ruaituhei, kin Levihei neh kin thiampuhei khan amakhan an riming riziakin an nam indet tâk a.