Read Biete ESTHERI 1 Bible Online

ESTHERI 1 - Biete bible

ESTHERI 1

¹Persia ram khopui tak Sosa a, a rêngṭhungmuna rithokin rêng Ahasuera chu India ram ata Ethiopia ram idênin ram bung rizalei sôminika sarika chungah ân lal a.

³Khante, ân lal kum ithumnaah khan a milianhei neh a sinthotuhei murdi rangin ruai â ṭhe a. Persia neh Media sipaihei khom an om a; khabanah, a ram bung optuhei neh bial tina milianhei khom an om sa a.

⁴Thla rukka sung chu a ram richong ziahei, a rêng roinpuiziahei, ân lalziahei kha ân rilang a.

⁵Kha zoiin chu rêng khopui tak Sosaa om milianhei neh mi chînhei rangin rêng in rikul tualzôlah khan sûn sarikah sar ruai â ṭhe nôk a.

⁶Rêng kottual chu risom puan ngoihei, a êmhei, a dumpôlhei kha patzâi rimi sendukin tangkarua vangkualah neh sâilungvâr chopuiheia thlungin an vo a. Khante, rângkachak neh tangkarua siam ṭhungmunhei khah sâilungvâr a senhei, a ngoihei, a enghei, a dukhei, an idâp chungah khan an inritlâng a.

⁷Rângkachak kilâtin uain khah an sem a, kilât khah chi dang dang ri-ang ino korong a nit a, rêng khan uain khah a nei intam ok a, rep viat loiin an sem a.

⁸Khante, uain in rang ten kha ikhit ni mak a, mi tinin an nuam dôr dôrkah an in chitna rangin rêng khan â somhei murdi khah he a lei ibe thlâm a nit.

⁹Rêngnu Vasti khomin rêng in khatkatah a ranin nupanghei rang ruai â ṭhe a.

¹⁰Ruaiṭhe sûn sarinî-ah khan rêng khah uain a in a, a lungril chu a hong fân ok a; khanchu, ama som bîk, thâinuzel sarikahei Mehumana, Biztha, Harbona, Bigtha, Abagtha, Zethara, neh Karkasa hei khah a koi a.

¹¹Ani khan rêngnu Vasti khah a rêng lukhum ikhum puma hong iṭhui rangin anni khah thu a pêk a. Rêngnu khah mêl iṭha tak a nit a, rêng khan a milianhei neh a mikhualhei murdi khah rêngnu mêlṭhatzia inmu ai nuam a nit.

¹²Nikhomsela, rêngnu Vasti khan rêng thupêk an îril khah a nial a; fe nuam mak a; khasikin, rêng khah a ning a thik tak tak a.

¹³Rênghei hin dân neh rirêl dân chungchângah dân ithiamhei an rôn mai ngai a. Rêng Ahasuera khom khan mi vâr a roisaktuhei khah hi chungchânga rôn rangin a koi bûm a.

¹⁴A roisaktu bîk sarikahei chu Karsena, Sethara, Admatha, Tarsisa, Meresa, Marsena neh Memukana hei, Persia neh Media rama milian, rêng kôla om mai ngai, a rama ama nâi tak ngaihei chu an nit.

¹⁵Ani khan an ziangah, “Keimah, rêng Ahasuera hin ke somhei chu thupêk ichôiin rêngnu Vasti ziangah ki tir a, khan ani khan lei zôm nuam mak a. Ani hih im ei lo rang, ingkam dânin teh a ti,” a ti a.

¹⁶Memukana khan rêng neh milianhei makungah khan, “Rêngnu Vasti hin rêng bang ai musit ni mak a, a rama milianhei murdi khom ai musit a nit, rêng Ahasuera ram pumpuia nam tin ai musit a nit.

¹⁷Hi rêngnu sintho hih nupang tinin an riatin chu an pasalhei an imusit zel rang a nit, ‘Rêng Ahasuera khan rêngnu Vasti kha a makungah hong iṭhui rangin thu a pêk a; nikhomsela, fe mak e,’ tîng an ti.

¹⁸Khante, vuani ngêi khomah hin Persia neh Media milian nupuihei, rêngnu sintho riahei hin rêng milianhei chungah tho zel an ta. Khaangkan nupuihein an pasalhei marit tho no nia, pasalhei chu an nupuihei chungah an ningthik a ti.

¹⁹Khasikin, rêng ṭhat ti lam a nitin chu, rêng thupêk isua ni sela, ‘Rêngnu Vasti chu rêng Ahasuera makungah hong tlak khâi no riseh,’ itin. Khante, hi thupêk hi indanglam tlak khâi ino rangin Persia neh Media ram dân bua riziak ni riseh. Khanungchu, ama nêka ṭha ual nupang dangin a rêngnu nitna luapêk riseh.

²⁰Khante, rêng thupêk khah ram pumpuiah thanginthei a nit zoiin chu nupang murdin an pasalhei chu marit tho tâng an ti, mi lian neh mi chînhei khomin,” a ti a.

²¹Kha thu khah rêng neh milianhei khan ṭha an ti a; khanchu, rêng khan Memukana ti lam angkah khan a tho tâk a.

²²Khante, “Insungkua chitah pasal thunei tak nîng a ta, a thu chu izôm rang a nit,” iti thucha chu rêng ram bial tinah, an mani horop chit neh an mani ṭong chitin an thon suak tâk a.