Read Biete ESTHERI 2 Bible Online

ESTHERI 2 - Biete bible

ESTHERI 2

¹Kha thilhei rizoia a ningthik a dâi nung khomah khan rêng Ahasuera khan Vasti thil tho dân neh a chungchânga thupêk khah a riat mai a.

²Khanungchu, a roisaktu mi ṭhen ama nâi ualhei khan a ziangah, “Rêngpa rang nungâk mêl iṭha izong ni riseh.

³Ram bung tinah ruaitu phun ni sela, anni khan an biala nungâk mêl iṭha zong suak sela, rêng khopui Sosa khuaa rêng inah hong ṭhui bûm riseh. Kha nungâk mêl iṭhahei khah rêng ina nupang chontan enkoltu thâinuzel Hegaia enkolna nuaia isian, mêl inṭhatna ranga risiamna thil ipe ni riseh.

⁴Khanungchu, rêng khan â lungitluk tak khah rithlang sela, Vasti rithûlin rêngnun siam riseh,” an ti a. Khanchu, kha thu khan rêng khah ân lôm a, khangkah khan a tho tâk a.

⁵Rêng khopui Sosa khuaah khan Juda mi khatkah a om a, arming chu Mordekaia a nit. Ani kha Benjamina nama mi Kisa nai Simeia richia mi Jaira naipa a nit.

⁶Babilon rêng Nebukadnezaran Jerusalema rithoka Judai ram rêng Jekonia neh a mi manhei bôia a ṭhui lâiah khan Mordekaia khom hi ai ṭang sa a nit.

⁷A pangâk nainu Estheri, a Hebrai riming chu Hadasi an iti kha a enkol seiinlian a, nungâk mêl iṭha neh tuaizâi iṭha tak a nit a. A nu neh a pa an thi nungah khan Mordekaia khan a nainu angkah takin a hong ienkol a nit.

⁸Khante, rêng thupêk isua khah an riatin chu rêng khopui Sosa khuaah khan nungâk itam takkah an hong ṭhui a, khahei lâiah khan Estheri khom a ṭang sa a. Ani khom rêng ina nupang chontan enkoltu Hegaia ziangah khan an ṭhui sa a.

⁹Hegaia khan Estheri kha mêl iṭha a ti a, a lei ditsak ok a. Fâk iṭhatak neh mêl ṭhatna ranga rinôt ruahei khah a pêk zel a. Rêng ina nupang omna chontan ihoi tak a pêk a, rêng in ata rithlang bîk nungâk sarikahei kha a sin ithopêk rangin a sia pêk a.

¹⁰Mordekaia thu richa lam angkah takin Estheri khan a Juda mi nitna khah tute iril mak a.

¹¹Estheri khan im a tho ngai, ingkan im a om iti ireh rangin Mordekaia khan sûn tin nupang omna chontan kottualah khan a fe ngai a.

¹²Khante, nungâkhei mêl ṭhatna rang ri-enkol zoro khah kumka sung a nit ngai a, thla rukka sung Mura riak an inôt a, thla rukka dang sung nard namhoi neh riak danghei an înôt nôk ngai a nit. Kha rizoiin chu nungâkhei khah khat khatkan rêng Ahasuera ziangah khan an iṭhui rang a nit.

¹³Rêng ina lûtpui rangin nupang omna ata a nuam lam angkah takin a irvo thei a nit.

¹⁴Zân tiang rêng ziangah khan an ṭhui a, atûk zîngah chu rêng nupuihei omnaah khan an ṭhui a, rêng thâikêmhei enkoltu thâinuzel Saasgaza enkolna nuaiah an isia ngai a nit. Rêngin â dit a, an riming isâma ai koihei bang ti no chu rêng ziangah khan an ife nôk khâi ngai ino a nit.

¹⁵Estheri chu rêng zianga a fe zoro a hong tlung tâk a. Estheri hi Mordekaia pangâk Abihaila nainu a nit a, nai angkah taka ai nei tâk a nit. Estheri kha rêng zianga a fe hun a tlungin chu nupang chontan enkoltu Hegaian rivo rang dân a ti lam angkah takin arvo a. Estheri kha â mu kan an ilung a tluk tak tak a.

¹⁶Khanchu, rêng Ahasuera inlal kum sarina, a thla sômna, Tebet thlaah khan Estheri kha rêng inah, rêng Ahasuera ziangah an ṭhui tâk a.

¹⁷Rêng khan nupang dang murdi nêkan lung a thlung a, nungâk dang murdi nêkan lungkhamna neh ditsakna ân dong a; khanchu, rênglukhum ân khum a, Vasti rithûlin rêngnun a siam tâk a.

¹⁸Khanungchu, Estheri rimingin rêng khan a milianhei neh a sinthotuhei rang ruai roinpui tak â ṭhe a; a rama mihei rang omnî a khâm pêk a, rêng tho rua pial tak thilpêkhei iphal takkan a sem a.

¹⁹Rêng khan Mordekaia kha sin iliantak ân sin tâk a.

²⁰Estheri khom khan Juda mi a nit iti tute la ril mak a; Mordekaian tute iril loi rang ai ti angkah khan, Estheri khan Mordekaia thu khah a naipangtea rithoka a thu ai zôm ngai angkah khan a lai zôm mai a nit.

²¹Khante, Mordekaia kha rêng ina sin ilian a tho lâiah khan rêng chontan kotbâi vêngtu lâia mi inika thâinuzelhei Bigthana neh Teresa hei kha rêng chungah an ning a thik a, rêng Ahasuera kha ithat itumin an phiar tâk a.

²²Kha thil khah Mordekaian a lei riat a, rêngnu Estheri kha â ril a; khante, Estheri khan Mordekaia rimingin rêng kha â ril a.

²³Kha thu khah isui a nit a, â dik a nit iti ireh suak a nit a; khanchu, pasal inikahei khah an ikhâithat seng seng a. Khante, kha thu khah rêng thurchi riziakna bu-ah khan riziak inchuang a nit.