Read Biete ESTHERI 3 Bible Online

ESTHERI 3 - Biete bible

ESTHERI 3

¹Zoro sôt ianka nungah khan rêng Ahasuera khan Hamana kha dingmun risâng takah a sia a. Hamana kha Agag richi Hamedatha naipa a nit.

²Khante, rêng thupêk angkan rêng ina sinhei murdi khan Hamana khah imarit a, a makungah rikhûk idila ikhûn ngai rangin thu a pêk a. Khangkan an rêngkan an tho ngai a; nikhomsela, Mordekaia khan a makunga khûnin chibai ûn nuam mak a.

³Rêng ina sinthotu milian danghei khan Mordekaia ziangah, “Ithôm rêng thupêk ni zôm nuam no,” an ti a.

⁴Nîn tin itho rangin an tur a; nikhomsela, ringai mak a, “Juda ki nit a, Hamana makungah ikhûn thei no ning e,” a ti a. Khanchu, Mordekaia om dân kha a theimâk im, theimâk mak im riatna rangin Hamana khah an iril tâk a.

⁵Mordekaia kha a makungah ikhûnin chibai ûn nuam mak iti a riatin chu Hamana khah a ning a thik tak tak a.

⁶Khante, Mordekaia kha Juda mi a nit iti a riatin chu Mordekaia chung bangah kut itlâk chu îte ben be mak a. Khasikah khan Ahasuera ram sung murdia Judahei, Mordekaia chipuihei chu that inchiai vang a tum tâk a.

⁷Rêng Ahasuera inlal kum sômleiinikna kum, a thla khatna Nisan thlaah khan Hamanan a thil tum lenna rangin tik nikhua neh tik thla tak im a înṭum rang iti riatna ranga thlasân rangin thu a pêk a; kha thlasân nî khah “Purim” an iti tâk a nit. A thla sômleiinikna, Adar thla, a sûn sômleiithumna chu ibîk a nit tâk a.

⁸Khanchu, Hamana khan rêng ziangah, “Ni ram sung mun dang danga om mihei lâiah hin nam khatkah rizep an om a, bial tinah an iom indar a nit. An dânhei khom nam danghei dân neh ri-ang viat ino, anmani dân bîk an nei a. Anni khan hi ram dân khom ipom mak a; khasikin, annihei izua mai hih rêng ta rangin ṭha no tak la nîng a ti.

⁹Khasikin, rêngin ṭha a tin chu that inrimang riai rangin thupêk isua ni riseh. Khangkan ni tho a nitin chu ram ri-enkolna rang rêng sum inah tangkarua her nuaiithumkah neh sîngilikah hong pêng ki ti,” a ti a.

¹⁰Khante, thupêk namindetna kutsabit kha rêng khan a thuat a, Judahei irâlpa Agag mi Hamedatha naipa Hamana khah a pêk a.

¹¹Rêng khan Hamana ziangah, “Kha mihei neh an tangka khah ni kutah nang kî pêk a nit, ni nuam lam angkah takin tho roh,” a ti a.

¹²Khanchu, thla khatka sûn sômleiithumnî-ah khan rêng lekhaziaktuhei kha Hamanan a koi bûm a, rêng thupuang kha ân riziak a, ṭong tina let a, ram bung tinah an mani horopa riziak a, ilalhei, ram optuhei, neh nam tin lupuihei ithon chit rangin an rifûk tâk a. Rêng Ahasuera riminga thon a nit a, rêng kutsabita nam indet a nit.

¹³Lekhathon ichôituhei khan kha thupêk khah ram bung tinah an chôi a. Kha thupêkah khan thla sômleiinikna, Adar thla, a sûn sômleiithumna nî ngêiin Juda mi murdi chu vânglâi neh itarhei, naipang neh nupanghei murdi khom sûnka sungin that inrimang riai rang a nit a. Lungkhamna ṭang viat loia that inrimang riai rang a nit.

¹⁴Khante, kha nikhua ranga lei risiam diam rangin kha thupêk khah ram bung tinah nam tin ziangah inpuang rangin kha lekha khah an ithon a nit.

¹⁵Rêng thupêkin Sosa khopuiah khom thupêk khah inpuang a nit, bial dang dangah chu lekhathon ichôituhei khan kha thu khah rimot takkan muntinah an fepui a. Khante, rêng neh Hamana chu an iṭhung a, zu an in lâiah khan Sosa kho mihei chu lunginzîngin an buai tak tak a.