Read Biete ESTHERI 4 Bible Online

ESTHERI 4 - Biete bible

ESTHERI 4

¹Mordekaian kha an thiltho murdi khah a riatin chu a puanhei â potthlêr a. Khanungchu, borapuan a sil a, rivut arthu a; khopui tolâiah a lôn a, iring tak neh ringaiinseh takkan a ṭap a.

²Rêng rikul kotbâi idênin a fe a. Tute borapuan isila rêng in kotbâi sung ilût khah iphal a nit no sikin a sung chu lût mak a.

³Rêng thupêk an inpuangna ram bial tinah chu Judahei lâiah ṭap ikhêkna a om a. Bu an ngei a, an ṭap ngûi ngûi a, mi itam takkan borapuan an sil a, rivut kârah an zâl a.

⁴Khante, Estheri kha â som nungâkhei neh a chontan vêngtu thâinuzelhei khan Mordekaia thiltho khah an va rilin chu â lung a zîng tak tak a, Mordekaia chu a borapuan ilîp a, silbom danga rivo rangin puanhei a thon a; nikhomsela, lei nuam mak a.

⁵Khanungchu, Estheri khan rêng chontan ivêngtu khatkah, ama enkoltu rang bîka inkung Hathaka khah a koi a, kha thil khah im ai nit, îtho sik im ai nit iti ireh rangin Mordekaia zianga fe rangin a tir a.

⁶Hathaka chu rêng rikul kotbâi ridîna tual rizat takah khan Mordekaia ziangah a va fe a.

⁷Khante, Mordekaia khan thil om dân murdi a lei iril a, Judahei that inrimang vang an nitin chu rêng sumsianaa seh ranga Hamanan tangka ipeh rang a înkung zâkhei khom kha a lei iril a.

⁸Khante, Estheri inmu rangin Judahei inrimangna rang thupêk, Sosa khopui ata isuaa om lekha riziak khom khah Hathaka a pêk a. Khabanah, Mordekaia khan lekha kha Estheri ipeh rangin a ngên a, thil om dân murdi irilfia pêk riai a; khanchu, Estheri kha rêng ziangah ife a, a chipui Judahei rang rêng ziangah lungkhamna ngên pêk rangin iril roh, itin he a be a.

⁹Khangkah khan Hathaka khan Mordekaia thuchahei khah Estheri a va ril a.

¹⁰Khanchu, Estheri khan hi thucha hih ithlun nôk rangin Hathaka khah Mordekaia ziangah a tir nôk a.

¹¹“Mi tukhom, nupang mo, ipa mo, rêngin koi loia rêng insung ril â lût kangân chu kha mi khah ithat ngêt rang a nit iti dân kha mi tin rêng roisaktuhei ata rambung tina mipuihein an iriat korong a nit. Hi dân ata zôk theina lam khatkah om isun chu rêngin a rângkachak irol khah a tiang isonga a lei ilek bangin kha mi ringna khah izua ai nit ngai a nit. Nikhomsela, kei chu sûn sômithumkah a nit tâk rêng zianga lût rangin ikoi la ni mang e,” itin Mordekaia chu thu a thon a.

¹²Estheri thucha khah Mordekaian a lei mun chu,

¹³hingka hin sâmna thucha a thon kîr a, “Juda mi murdihein an izôk tlak ino rang khah rêng inah ni om sikin nî zôk ual bîk rang manih sôn no roh.

¹⁴Atûn zoro angkanah hin ni dâirekin chu Judahei ta ranga zôkna neh sanisuana rivâna rithokin a zuang suak a, an zôk khomin nangmah neh ni pa insungkuahei chu ei irmang ngêt rang a nit. Rêngnu nî chang hi hingkana zoro piala rang hi ni no nîm a?” itin.

¹⁵Estheri khan Mordekaia ziangah mi a tir nôk a.

¹⁶“Sosaa om Juda mi murdi koi riai inla, keima rangin bu ngeiin ṭongṭai unla, sûn thumkah neh zân thumkah îte fah loi neh in loiin om rei. Khangkan, keimah neh ke som nungâkhei khomin ngei sâng kin ti. Khanungah khan dân ni no khom seh, rêng ziangah khan lût ki ta; khante, kei chu ki thi le khom kî thi ni riseh,” a ti a.

¹⁷Khanungchu, Mordekaia khah a fe a, Estherin he a be lam angkah takah khan a tho tâk a.