Read Biete ESTHERI 6 Bible Online

ESTHERI 6 - Biete bible

ESTHERI 6

¹Kha zân ngirah khan rêng khah in thei mak a; rêng thurchi riziakna bu hong ichôia a makunga tep pêk rangin thu a pêk a.

²Rêng ina thâinuzelhei ruai Bigthana neh Teresa rêng chontan vêngtu inikahein rêng Ahasuera chunga kut itlâk an tum thu Mordekaian a lei îril thu riziak khah an tep suak sa a.

³Rêng khan, “Khasikah khan Mordekaia chungah hin chôiinrisângna neh loman ipe a nit im?” a ti a. Rêng isom, a sin itho ngaihei khan, “Ama ta rangin îte itho ni mak e,” an ti a.

⁴Khante, rêng khan, “Ki milianhei rêng in rikul sunga om an om im?” a ti a. Kha lâi takah khan Hamana khah khâithatna rang a însiama, Mordekaia ikhâithat rang thu rêng ziangah iril rangin rêng kottual rikul sungah khan a hong lût a.

⁵Khanchu, rêng isomhei khan, “Hamana chu a om, nang imu rangin a ngîr ṭian,” an ti a. Khante, rêng khan, “Hong lût riseh,” a ti a.

⁶Khanchu, Hamana khah a lût a, rêng khan a ziangah, “Chôiinrisâng nuam mi khatkah ki nei a, kha mi ta rangin im ki tho rang tâk?” a ti a. Hamana khan a lungrilin, “Keimah ti no chu rêngin tu mi dang im a chôiinrisâng nuam rang a?” a ti a.

⁷Khanchu, Hamana khan rêng ziangah “Rêngin ai chôiinrisâng nuam chu rêng îhâk ngai rêng thlukthlahei hong lah sela, rêng chuangna ngai sakorhei hong kâi sela, chôiinrisângna rênglukhum inkhum ni riseh.

⁹Khanungchu, rêngin ai chôiinrisâng nuamah kha rêng milianhei lâia ân chungtak khan rêng thlukthla khah inhâk sela, sakor chungah inchuang sela, khopui rifangpui riseh. Khante, kha rêng milian khan an lôn pumin, ‘Rêngin mi ai chôiinrisâng nuam chu hingka hin ai chôiinrisâng ngai a nit,’ iti inpuang thiai mai riseh.” a ti a.

¹⁰Khanungchu, Rêng khan Hamana ziangah, “Rimot takkan ni ti lam angkah takkah khan rêng puan neh sakor kha va lan la, rêng rikul kotbâi kôla ṭhung ngai, Juda mi Mordekaia chungah va tho roh. Nî ti murdi khah rikip takkan ni tho rang a nit,” a ti a.

¹¹Khanchu, Hamana khan rêng puan neh sakor kha a va lâk a, Mordekaia kha ân rivo a, khopui kotsua arfangpui a, a matonah khan, “Rêngin mi ai chôiinrisâng nuam chu hingka hin ai chôiinrisâng ngai a nit,” itin ân puang thiai a.

¹²Khante, Mordekaia chu rêng rikul kotbâiah khan a hong nôk a. Hamana chu a lu rikhumin beidong mâimôk takkan a inah a fe tâk a.

¹³Hamana khan a nupui Zeresi neh a malhei murdi ziangah khan a chunga thil hong om dân murdihei khah â ril a. Khanchu, a mal mi vârhei neh a nupui khan a ziangah, “Tong sual ni tongna Mordekaia khah tluk no tin e, Juda mi a nit a, inê tlak no tin e. A makungah khan nî tlôm ngêt rang a nit,” an ti a.

¹⁴Khangkana a zianga an ti lâi takah khan rêng chontan vêngtuhei khah an hong tlung a, rimot takkan Estheri înrifûk ruai ifah rangin Hamana kha an ṭhui tâk a.