Read Biete ESTHERI 8 Bible Online

ESTHERI 8 - Biete bible

ESTHERI 8

¹Kha nî ngirah khan Judahei irâlpa Hamana richon murdi khah rêng Ahasuera khan rêngnu Estheri a pêk a. Estheri khan Mordekaia chu a thisen rizompui a nit iti rêng khah â ril a; khantaka rithokin chu Mordekaia kha rêng makunga lût rangin iphal a nit tâk a.

²Khante, rêng kutsabit Hamana ibun khah rêng khan a lâk a, Mordekaia khah ân bun a. Estheri khan Hamana in neh loi kha Mordekaia kutah a sia a.

³Khanungchu, Estheri khan rêng ziangah khan thu â sîr nôk a, a ke bulah â bok a, Agag mi Hamana thil ṭhano phan, Judahei inrimang vang ai tum khah inboi rangin mitrithli pumin a ngên a.

⁴Khante, rêng khan rângkachak irol khah Estheri tiang a hang ilek a. Khanchu, Estheri khah a thoi a, rêng makungah khan â ding a,

⁵“Rêng ṭhat ti lam a nit a, a mit itlung ki nit a, rêng ringaiah â dik a nitin chu Agag mi Hamedatha naipa Hamana roiphan lekha, rêng ram bial murdia Juda omhei that inrimang riai rang iti riziak khah ikhîr rangin thu isua ni riseh.

⁶Ingkan im ki chipuihei chunga thil ṭha no hong itlung khah ki mu ngam rang? Ingkan im ki suapuihei thina khah ki tuang zoi rang a?” a ti a.

⁷Khanchu, rêng Ahasuera khan rêngnu Estheri neh Juda mi Mordekaia ziangah khan, “Ringai rei, Judahei chungah a kut a tlâk sikin Hamana chu ikhâithatin, a in khom kha Estheri ki pêk tâk a.

⁸Nikhomsela, rêng riminga riziak neh rêng kutsabit inama ipip chu tutên an îndanglam thei ino a nit. Khannisela, Judahei ziangah ni nuam lam angkah takin lekha riziak inla, amakhah rêng riminga riziakin rêng kutsabit inamin thon thei ni ti,” a ti a.

⁹Thla thumna, Sivan thla, sûn sôminika sûnthumka nî zelah khan rêng lekha ziaktuhei kha Mordekaia khan a koi bûm a, Judahei chungchângah a nuam lam angkah takin ân riziak a. India rama rithoka Ethiopia ram idêna ram bung rizalei sôminikah sarika rêng rithûla ram optuhei neh ulianhei khah anmani ṭong neh horopa riziakin a thon zel tâk a. Judahei khom anmani horop neh anmani ṭong ngêia riziakin ithon an nit.

¹⁰Mordekaia khan rêng Ahasuera riminga riziakin rêng kutsabit khah ai nam chit a nit. Sakor tlân irât chi, rêngin thu thondarna ranga ai mang ngai rêng sakor irâthei chunga chuangin lekhathon khah ân thak tâk a.

¹¹Kha rêng lekhaah khan: Judahei kha an omna khua kipah ribûma anmani neh an nupui nainetehei zôkna ranga rirung rangin a phal a. Tak rama mi khom anmani hong irûntuhei chu lei idoiin lei that thei an ta, an ithathei richon khom râllâk sumin ilah rangin ai phalpêk a nit.

¹²Rêng Ahasuera ram op murdi sungah kha thupêk ithar khah thla sômleiinika, Adar thla sûn sômleiithumna nî, Juda murdi that riai ranga nikhua ibîk nî-ah khan imang rang a nit.

¹³Kha thu khah dân ideta mang rang neh kha nikhua a hong tlungin Judahei khom an irâlhei chunga phuba an lâk theina ranga risiam diama an lei om theina ranga ram bial murdia ithon suak a, mi murdi riatah inpuang rang iti a nit.

¹⁴Khangkan rêng thupêkin, rêng sakor irâthei chunga chuangin lekhathon khah an itlânpui tâk a. Khante, thupêk khah rêng khopui Sosaah khom inpuang a nit a.

¹⁵Mordekaia chu rêng puan dumpôl neh a ngoi isilin rângkachak rênglukhum roinpui tak ikhumin neh puanzâi rimi zakorfual senduk ihâkin rêng in ata khah a suak a. Khanungchu, Sosa khopui kotsua tinah râifân neh lôma khêk dur dur irî a om tâk a.

¹⁶Judahei chu an lôm a, an râi a fânna, an ilung arngamin an rithla arngam riam tâk a.

¹⁷Rêng thupêk an tepna ram bung neh khua murdiah Judahei chu an lôm a, râifân takkan ruaihei an iṭhe a, omnîhei an khâm a. A nit, mi itam takkan Judahei khah an ṭi tâk sikin Judaah an rilet tâk a.