Read Biete ESTHERI 9 Bible Online

ESTHERI 9 - Biete bible

ESTHERI 9

¹Rêng thupêk mang nî rang thla sômleiinikna, Adar thla, sûn sômleiithumna nî kha a hong tlung a. Kha nî-ah khan an irâlhei khan Judahei chunga roiirêl an tûng nî a nit a; khannisela, a letiang Judahein anmani neltuhei chungah roi an rêl nî a hong nit ual tâk a.

²Rêng Ahasuera ram bung murdia Judahei omna khotinah khan Judahei chu an siatna zongtuhei chungah kut itlâk rangin an ribûm a. Mi murdîn an ṭi a, tute anmani doi ngam zel om khâi mak a.

³A nit, Mordekaia an ṭi sikin kha ram bunga milianhei, ruaituhei, ram optuhei, rêng sinthotuhei murdi khan Judahei kha an thlop tâk a.

⁴Mordekaia chu rêng ina mi roinpui tak a nit a, ai roinpui tîr tîr a nit iti ram pumpuiah ân thang tâk a.

⁵Khasikah khan Judahei khan an irâlhei khah an nuam nuam an ilo thei a nit. Judahei khan khandaiin an doi a, an irâlhei murdi khah an that tâk a.

⁶Rêng khopui Sosaah ringot khom Judahein mi rizarngakah an ithat a nit.

⁷Anni lâiah khan Hamedatha naipa, Judahei irâlpa Hamana nai ipa sômkah, Parsandata, Dalfona, Aspata, Porata, Adalia, Aridata, Parmasta, Arisaia, Aridaia, Vaisata hei kha an ithat sa a nit; neinun chu îte lah mak e.

¹¹Kha nî ngirah khan rêng khopui Sosaa mi an that zâk kha rêng an hong iril a.

¹²Rêng khan rêngnu Estheri ziangah, “Judahei khan rêng khopui Sosaah hin mi rizarngakah, Hamana naipa sômkahei itep san an ithat tâk a nit a. Ram bung dangheiah khan teh, ingka takin im tho tâng an ti na! Atûnah hin im nî nuam? Itho nîng a ti,” a ti a.

¹³Estheri khan, “Rêngin ṭhat a tin chu Sosaa Judahei hin vuaninta thupêk angkah ngirah hin naktûka khom tho sela, Hamana naipa sômkahei ruak kha khâithatnaah ikhâi ni riseh,” a ti a.

¹⁴Khante, rêng khan khangkah taka tho rangah khan thu a pêk a; Sosaah khan thupêk kha inpuang a nit a. Hamana naipa sômkahei ruak kha vântlâng mu theinaah ikhâi a nit tâk a.

¹⁵Khante, Sosaa Judahei chu Adar thla, sûn sômlei sûn linî khomin an ribûm a, khopuiah khan mi rizathumkah an that nôk a. Nikhomsela, neinun chu îte lah ngir mak e.

¹⁶Khante, Juda dang rêng ram bung tina omhei khom an ribûm a, rirung rangin an rifo a. An irâlhei ata râl ringamin an om a, anmani neltuhei mi sîngsarikah neh sângringakah an that a. Nikhomsela, neinun chu îte lah mak e.

¹⁷Adar thla sûn sômlei sûn thumnî-ah khan amakhah an tho a; khante, a sûn sômlei sûn linî-ah khan chu an ringam a, ruaiṭhe nî neh lôm nî sûnin an imang a nit.

¹⁸Sosaa Judahei rêk chu sûn sômlei sûn thumnî neh sûn sômlei sûn linî-a khan an irâlhei an la that a; a sûn sômlei sûn ringanî-ah khan an ringam a, ruaiṭhe nî neh lôm nî sûnin an imang a nit.

¹⁹Khasikah khan khua chînteheia om Judahei khan Adar thla sûn sômlei sûn linî chu ilôm takka ringam nî, ruaiṭhe[1] nî neh ifah rang risem risak nî sûnin an imang ngai a nit.

²⁰Mordekaia khan kha thilhei khah lekhabuah ân riziak riai a, Persia ram pumpui sunga Juda om murdi, inâia omhei neh ilaa omhei kha lekha a thon a.

²¹Adar thla sûn sômlei sûn linî neh sûn sômlei sûn ringanî sûn chu kum tin omnî-a khâm rang a nit iti thu a pêk a.

²²Kha nikhuaah khan a nit Judahei chu an irâlhei ata râlringamin an iom tâk a nit, kha thlaah khan a nit beidongna chu an rangin lômna a chang tâk a, ṭapna nî chu râifânna nî sûn a hong ichang tâk a nit. Khasikin, kha nikhua kha ruaiṭhe nî, lôm nî neh thilpêk rithon risak nî neh mi inrianghei thilpêk nî sûn ranga mang rangin thu ai pêk sa a nit.

²³Judahei khan Mordekaia thupêk kha an zôm a, kum tin kha nikhua khah kût nî sûnin an hong mang tâk a.

²⁴Agag mi Hamedatha naipa Hamana, Judahei irâlpa khan Judahei inrimang vangna rangin tik nikhua tak im ân ṭum rang iti riatna rangin ithla ân sân a. Judahei chu inrimang riai ai tum a nit.

²⁵Nikhomsela, Estheri kha rêng makungah a fe a, rêng khan thupêk â sua tâk a. Kha thupêk sikah khan Judahei tuang ranga a înrifûk murdi khah ama lu chungah a ṭum tâk a, amah neh a naipahei chu thingah ikhâithat an init tâk a nit.

²⁶An chunga thil itlunghei sik neh Modekaia lekhathon sikah khan kha kût khah Purim “Thlasân” Kût an ibe tâk a nit.

²⁷Judahei khan anmani neh an richihei suanpârhei rang khom, a zoro takah, rikhêl tlak loiin Mordekaia ril lam angkan kum tin a zoro bîk lam angkah takin sûn nikah kha an châm ngai rang a nit iti dân an siam a.

²⁸Juda insungkua tukhomin, suanpâr tin tin idênin kha nikhua khah an riatmaiin, ram bung tinah neh kho tinah, Purim Kût nikhuahei khah kumkhuakan an châm ngai rang a nit iti thu an ithlûk a.

²⁹Khanungchu, Abihaila nainu, rêngnu Estheri khan Purim Kût chungchânga Mordekaia lekhathon khah ai namindet a nit iti thu khah Mordekaia lekhathon rualin a thon sa a.

³⁰Lekha khah Juda murdihei ziangah ithon a nit a. Persia ram bung rizalei sôminikah sarikahei ziangah khom ithon sa a nit. Judahei murdi khah thlangam tak neh râlringam takka om ranga an ditsakna inchuangin lekha khah an thon tâk a.

³¹Judahei chu, a zoro takah, anmani neh an richi suanpârhei khan bu ngei neh lusûn nî mang dân an inei angkan Purim nikhuahei hih a zoro bîk takah an ser ngai rang a nit iti thu an richa a. Kha thu khah Mordekaia neh rêngnu Estheri thupêk a nit.

³²Khante, Estheri thupêk khan hi Purim mang dân thu hih ân det a; lekhabuah khan riziak a nit tâk a.