Read Biete FESUAKNA 10 Bible Online

FESUAKNA 10 - Biete bible

FESUAKNA 10

¹PUMAPA khan Mosia ziangah, “Faroa ziangah va fe roh; ki sintho rikhêlhei an lâiah ki tho theina rangin amah neh a milianhei lungril khom ki înkhir pêk a nit.

²Khapenah, Aigupta mihei natinsat takka ken tuang dân neh an lâia sinrikhêl kî thohei kha nin naihei neh nin tuhei nin la ril theina rangin neh keimah hi PUMAPA ki nit ngêt iti an riat theina rangin,” a ti a.

³Khaangkan Mosia neh Arona kha Faroa ziangah an va lût a, a ziangah, “Amahih PUMAPA, Hebraihei Pathianin ai ti a nit: ‘Ki maah hin idôra sôt im riniam nuam loiin nî om rang? Ki mihei hin ki sin an tho theina rangin infe ta roh.

⁴Ki mihei hih nen fe nuam non chu naktûkah ni ram sungah hin ikhâi ki înpung rang a nit.

⁵Itam takkah nîng an ta, rinêng ilang loi rakkan rikhû riai an ti. Irialin ai dêng isiat ino, thil îkhom â omkah chu fah riai an ti.

⁶Ni inhei neh ni milianhei in neh Aigupta mihei in tin tin sip zit an ta; nin pahei neh nin chibulhei khomin hi ramah an oma rithokin khangkah dôra tam ikhâi kha an lai mu ngai ino a nit,’ a ti, ti roh,” a ti a. Khanungchu, Faroa in ata khah an suak tâk a.

⁷Faroa milianhei khan a ziangah, “Hi mi hin itena sôt im a ne la înbuai rang hi? Hi mihei hin an Pathian chubai an ûn theina rangin infe ta roh ba; Aigupta ram hi ai siat chit a nit tâk iti nî riat ino mani?” an ti a.

⁸Khanchu, Mosia neh Arona khah Faroa ziangah an hong ṭhui nôk a, ani khan an ziangah, “Fe unla PUMAPA nin Pathian chubai va ûn ta rei; khan tu tuhei im â fe rang chu nin init?” a ti a.

⁹Mosia khan, “Itar, ivâng kin rêngkan kin ife rang a nit, kin naipahei neh kin nainuhei, kin beralômhei neh kin ranhei khom kin iṭhui sa rang a nit; PUMAPA ziangah kût imang rang a nit sikin,” a ti a.

¹⁰Faroa khan, “Nin nupuihei neh nin naihei nangni inṭhui tlak loi rangin PUMAPA riming ichingin ṭong ki irkhâm a nit. Rihel rangin nin iphan a nit iti chu ai fel ian a nit hih.

¹¹Ṭhui thei tlak no tin u; nin nuamin chu ipahei kah fe unla, PUMAPA chu chubai va ûn rei,” a ti a. Khanchu, Mosia neh Arona kha Faroa ina rithokin an ûm isua tâk a.

¹²PUMAPA khan Mosia ziangah, “Aigupta ram chungah ne bân phar roh. Aigupta ramah hin ikhâi hong pung a ta, hi rama chimu tinrêng, irialin ai dêng isiat ban kha an ifâk vang rang a nit,” a ti a.

¹³Mosia khan Aigupta ram chungah khan â rol kha â lek a, PUMAPA khan sûntluan neh zântluanin kha ramah khan khosak ithli lum ân râng a; atûkah chu khosak ithli khan ikhâi kha a hong sêm inlût tâk a.

¹⁴Ikhâihei kha Aigupta ram pumpuiah khan a tom a têla hongin an fûk a. Khangkah taka ikhâi itam khah la om tlak ngai mak a, iom khom om nôk tlak khâi no nih.

¹⁵Ram pumpui an dâp a, rammual an inriliap rak a; irialin ai dêng isiat ban chimu tinrêng neh thei irâ murdi an fâk riai a. Aigupta ram pumpuiah khan loisûl iring manih, thingnâ ring manih khom imu rang om viat khâi mak a.

¹⁶Khanungchu, Faroa khan Mosia neh Arona kha rimot takkan a koi a, an ziangah, “PUMAPA nin Pathian chungah neh nin chungah ki îsual tâk a nit.

¹⁷Ki thil thonsual hih atûna ṭumkah chu ne zâ nôk unla, hi thi theina khopa kuttum hih nen rikiang pêk rangin PUMAPA nin Pathian ziangah ne ngên pêk rei,” a ti a.

¹⁸Faroa in ata kha an suak a, PUMAPA ziangah an ngên pêk a.

¹⁹PUMAPA khan thlang tiang ithli rât tak ân râng a, ikhâihei khah a sêm a, Tuipui Senah a sêm inlût vang tâk a. Aigupta ram sungah khan ikhâi khatka lua om khâi mak a.

²⁰Nikhomsela, PUMAPA khan Faroa lungril kha a lan khir pêk mai a, Israel naihei khah infe nuam ual mak a.

²¹Khanchu, PUMAPA khan Mosia ziangah, “Ne bân rivân tiang phar roh; khanchu, Aigupta ram pumpui hi izîng richel chitin rikhû riai a ta, mitdel rimai ṭian angkan a hong iom rang a nit,” a ti a.

²²Mosia khan rivân tiang â bân a phar a; Aigupta ram pumpui kha sûn thumka sung chu izîng richel takin a tuam tâk a.

²³Tute rimu thei khâi mak a, sûn thumka sung chu mahni ommun ata riphêt thei khom om khâi mak a. Khanniseh, Israelhei omna mun chu ivâr a om mai a.

²⁴Faroa khan Mosia khah a koi a, a ziangah, “Fe unla, PUMAPA chubai va ûn rei, nin nupuihei neh nin naihei khom ṭhui sa unla; nin berahei, kêlhei neh sialhei chu ṭhui no rei,” a ti a.

²⁵Mosia khan, “A nitin teh, nangman PUMAPA kin Pathian zianga kin ribôlna rang neh kin hâlrivâm thillan rang ranhei ni ne itum pêk rang mani!

²⁶Ni thei no nih, kin ranhei chu kin iṭhui vang rang a nit, khatka lua mah no ning ung e. Keimani ngêiin kin Pathian PUMAPA chubai kin ûnna rang chu kin irthlang rang a nit. A mun kin tlung mâkah chu a îtak imangin im PUMAPA chubai kin ûn rang iti kin iriat ino a nit,” a ti a.

²⁷PUMAPA khan Faroa lungril khah ân khir nôk a, anni khah infe nuam khâi mak a.

²⁸Faroa khan Mosia ziangah, “Ki mitmu ata ro paih inla, ki makungah hong ilang nôk khâi no roh. Ni mêl ki mu nôk nî takin nang kî that rang a nit,” a ti a.

²⁹Mosia khan, “Ni tin dik, ne mu nôk tlak khâi no tin,” a ti a.