Read Biete FESUAKNA 11 Bible Online

FESUAKNA 11 - Biete bible

FESUAKNA 11

¹PUMAPA khan Mosia ziangah, “Faroa neh Aigupta ram chu ṭumkah ki la întuang nôk rang a nit; khanungchu, nangni infe tâng a ti; nangni â sua tenan chu hi mun ata hih iûmin nangni ûm a ti.

²Khasikin, atûnah hin Israel mipuihei chu rângkachak neh tangkarua rivonahei an bungtualbômhei inih rangin iril roh,” a ti a.

³PUMAPA khan Israelhei chu Aigupta mihei ditsakna ân dong a, Mosia khom kha Aigupta rama milianhei neh mipuihei khan an ringai inrisâng tak tak a.

⁴Khante, Mosia khan Faroa ziangah, “PUMAPA khan hingka hin a ti, ‘Aigupta ram chu zânlâiah rifang ki ta,

⁵Aigupta ram nai lutîr ipa murdi rêngṭhungmuna ṭhung Faroa nai lutîra rithokin a fasukna ngai kôla om bôinu nai lutîr idênin, khabanah, ran khom suak masa murdihei neh khan an ithi rang a nit.

⁶Kha zânah khan Aigupta ram sung tak munah khom ṭap irung natinsat tak om a ta, khangkana rikhêl khah la om ngai mak a, iom khom om nôk khâi no nih.

⁷Nikhomsela Israelhei chu miriam neh ranhei rêng rêng ui khomin ingik no nih. Kha tikin chu PUMAPA khan Aigupta mihei neh Israel mihei kârah ritleina ai siam a nit iti reh tâng nin ti,’ a ti a.

⁸Ni milianhei murdi ki ziangah hong an ta, ki makungah ikhûnin, ki mihei murdi iṭhuia fe suak rangin ne hong ngên an ti. Kha rizoiin chu ki mihei suakpui tâng ki ti,” a ti a. Khanchu, Mosia khah ningithik zapkan Faroa ziang ata khah a suak tâk a.

⁹PUMAPA khan Mosia ziangah, “Faroa khan nin thu ringai ual no nih, Aigupta ramah sinrikhêl tho intam ai nang a nit hih,” a lei iti a nit.

¹⁰Mosia neh Arona khan kha sinrikhêl murdihei khah Faroa mu rangin an tho a; nikhomsela, PUMAPA khan Faroa lungril khah ân khir a, a ram ata Israel naihei khah a îsua nuam ino a nit.