Read Biete FESUAKNA 12 Bible Online

FESUAKNA 12 - Biete bible

FESUAKNA 12

¹Aigupta ramah PUMAPA khan Mosia neh Arona ziangah,

²“Hi thla hih nin ta rangin thla masa tak, nin kumka thla tep riphutna nîng a ti.

³Israel mi pumpui iril roh: hi thla a sûn sôm nî takin mi tin an insungkua fâk khop rang berate manih, kêlte manih rithlang chit riseh.

⁴Khanniseh, berate khatkah fah zoi loi rang dôra insungkua roi an nitin chu an bungahei neh rikop sela, a miriam an tam dân izir neh an fâk thei dôr ienin risem riseh.

⁵Bera manih, kêl manih rithlang thei nin ta; khanniseh, achal kumka mi, demnaboi a nit rang a nit.

⁶Kha thla a sûn sômleiilika nî sûn idênin enkol nin ta, kha nî kholoiah khan Israel nam pumpuiin an that rang a nit.

⁷A thisen kha lâng an ta, sa an fâkna rang in kotbâi ibiang kâng ruaikan neh kot lu kha an nâl rang a nit.

⁸Kha zânah khan sa chu meiah ri-em inmin an ta, an fâk rang a nit; chol pol ino bairiam neh loisûl ikhâ[10] an fâk sa rang a nit.

⁹Â sela fah rang ni mak a, tuia suang rang khom ni mak; a lu neh a kehei, a sungkuahei khom a rêngkan meia ri-em inmin rang a nit.

¹⁰Zîng idênin îte nin zua rang ni mak; atûk idêna fâk ban la om chu nin hâlrivâm ngêt rang a nit.

¹¹Nin puan nin kongah ivêl ṭiankan, nin pheikokhei ribun ṭiankan irol ichôi ṭian pumin rimot takkan nin fâk rang a nit: Amakhah keimah PUMAPA chôiinrisângna ranga Kalkan Kût[11] a nit.

¹²“Kha zân ngirah khan Aigupta ram rifang suak ki ta, Aigupta mi nai lutîr, miriam khom ipa murdi neh ran khom achal chu that vang ki ta; khante, Aigupta pathianhei khom kuttum kî tho rang a nit. PUMAPA ki nit hih.

¹³Inkot ibianga thisen nin îtât kha nin omna in risinsiana nîng a ta; thisen itât kha ki mun chu nangni rikan ki ta; khanchu, Aigupta mihei kuttum ki tho tenan nangni chu anmani angkan tuang no tin u.

¹⁴Kha nikhua khah nin ta rangin nikhuan dang bîk nîng a ta, PUMAPA sintho nin riatmaina rangin sakhua Kûtin nin mang ngêt ngai rang a nit, nin richi suanpârhei khomin kumkhuakan kha nikhua khah an ser ngai rang a nit.

¹⁵“Sûn sarika sung chu chol pol ino bairiam bang nin fâk rang a nit; a sûn masa takah khan nin insung ata chol rêng rêng nin pai infâi riai rang a nit a, a sûn masa tak nî-a rithoka a sûn sarinî dêna chol ipol ibai ifa kangân chu Israel mi lâia tepsa rang ni khâi mak e.

¹⁶A sûn masatak nî neh a sûn sari nî a khan Inkhômpui rithiang nin nei rang a nit; kha sungah khan chu mi tukhomin sin rêng rêng itho rang ni mak e, nin fâk rang chu inrifûk thei nin ti.

¹⁷Chol pol ino bairiam kût nin ser ngai rang a nit, hi nikhuaah hin Israel mihei kha Aigupta ram ata kî ṭhui isua a nit; khasikin, nin richi suanpârhei idênin kumkho dâna neiin kha nikhua khah nin ser ngai rang a nit.

¹⁸A thla khatna, a sûn sômleiilinî kholoia rithokin kha thla ngir a sûn sôminika khatka kholoi idênin chol ipol ibai rêng rêng nin fâk rang ni mak.

¹⁹Sûn sarika sung chu nin insungah chol rêng rêng a om rang ni mak a, tukhom chol ipol ibai ifâ kangân chu, nin lâia om a nit manih, nin lâia suak a nit manih khom ni sela, Israel mipui lâia tep[12] rang ni khâi mak e.

²⁰Chol ipol rêng rêng chu nin fâk rang ni mak e; nin omna mun ikipah khan chol pol ino bai nin fâk rang a nit,” a ti a.

²¹Mosia khan Israel ruaituhei a koibûm a, an ziangah, “Berate manih, kêlte manih zen unla, nin insungkua fâk rang Kalkan kût sa rangin that rei.

²²Husop itêl unla, tâbora thisenah khan ichia unla, kot lu-ah neh inkot ibiang kiangruaikan thisen khah nâl rei; tukhom atûk zîng khua a vâr mâkah chu mahni in putiang nin suak rang ni mak e.

²³Aigupta mihei ithat rangin PUMAPA khan a zuang irfang rang a nit a. Kot lu neh inkot ibiang kiangruaika thisen ikâi a mun chu kha in khah lôi a ta, mi that ngai vântirtôn khah nin insungah khan nangmani nangni that rangin hong ilût phal no nih.

²⁴Hi thil hih dâna neiin nin ser rang a nit, nin richihei khomin kumkhuakan an hong tho mai ngai rang a nit.

²⁵PUMAPA khan nangni pe ranga a inkung ram nin lût tikin khom hi tho dân balam hih nin zôm mai rang a nit.

²⁶Nin naihein, ‘Hi dân balam hih im a omzia ai nit?’ itia nangni an ridonin chu,

²⁷nangmanin, ‘Amahih PUMAPA chôiinrisângna Kalkan kût ribôlna a nit hih. Ani khan Aigupta mihei a that lâiah khan Aigupta rama om Israelhei in kha a hong rikan a, a hong izua a nit,’ nin ti rang a nit,” a ti a. Mipuihei kha an ikhûn a, Pathian chubai an ûn tâk a.

²⁸Israela richihei khah an fe a, PUMAPA khan Mosia neh Arona thu ai pêk angka khan an tho a.

²⁹PUMAPA khan zân lâiah Aigupta rama nai lutîr murdi Faroa nai lutîr rêngṭhungmuna la ṭhung ranga rithoka tâng ina om nai lutîr idênin, insung mîring achal suak masatakhei neh khan a zuang that riai tâk a.

³⁰Kha zânah khan Faroa neh a milianhei neh Aigupta mi murdihei khah an thoi a; mi thi omnona insung rêng rêng omak a, Aigupta mihei khah ram pumpuiah an ṭap irung vung vung tâk a.

³¹Faroa khan a zân a zânin Mosia neh Arona khah a koi a, an ziangah, “Thoi unla, ki mihei mah unla, Israel naihei neh hin fe unla, nin ngên lam angkan PUMAPA sin va tho ta rei.

³²Nin berahei, nin kêlhei, nin sialhei khom ṭhui unla, suak zel ta rei. Kei khom ṭhatvurna ne zong pêk sa rei,” a ti a.

³³Aigupta mihei khan kha ram ata isuak vak vak rangin Israel mihei khah an ithlok lîp a; “Nin suak non chu kin ithi vang rang kêng,” an ti a.

³⁴Khaangkan mipuihei khan ibai an îmet isai chol pol ino kha an ifûn a, an ibai imetna khêng khah an puanin an tuam a, an dârah an ikhâi a.

³⁵Mosia ril lam angka takin Israelhei khan an tho a; Aigupta mihei khah tangkarua neh rângkachak ritheihei neh silbom danghei kha an nî a.

³⁶PUMAPA khan mihei khah Aigupta mihei lungkham ân lo a, an ini kangân chu an pêk a. Khangkah khan Aigupta mihei thil kha an hong îrok chu a nit.

³⁷Israelhei kha Ramesesa rithokin ken an suak a, Sokot mun idênin an fe a, naipang neh nupang tep loiin ipa uliankah khom nuai irukkah an nit.

³⁸Anmani lômin nam dang itam takkah an fe sa a, bera hei, kêl hei, sial hei itam takkah an iṭhui sa a nit.

³⁹Aigupta ram ata ibai met isa chol pol ino an hong ichôi khah bairiamin an siam a; Aigupta ram ata rimot takka ûmisua an nit sika khan an fâk ranghei inrifûkna zoro khom nei phâk mak a, an ibai imet khom kha chol an ipol phâk ino a nit.

⁴⁰Israel naihei Aigupta rama an om sung kha kum rizalika sômithumkah a nit.

⁴¹Kum rizalika sômithumkah a hong hek nî takah khan PUMAPA mihei khan Aigupta khah an imâk a nit.

⁴²Kha zân khah Aigupta ram ata anmani a ṭhui isua zân a nit a, PUMAPA ta ranga zân iser a nit. Israelhein an richi suanpâr idênin kha zân khah PUMAPA ta rangin zân isera kumkhuaka an mang mai ngai rang a nit.

⁴³PUMAPA khan Mosia neh Arona ziangah, “Hingka hin Kalkan kût mang dân rang chu a nit: Nam danghein Kalkan Kût hi an fâk sa rang ni mak.

⁴⁴Nikhomsela, nin bôi, suma nin irchôk, an iser nin itanpêk tâkhei khan chu fah thei an ti.

⁴⁵Nam dang, nin lâia omhei neh nin zianga rilofahei khan chu an fâk rang ni mak e.

⁴⁶In khatka tah nin fâk rang a nit a; sa rêng rêng putiang nin chôi suak rang ni mak a; a ru khom nin ikhiak viat rang ni mak.

⁴⁷Israel mihei murdîn kût khah an mang rang a nit.

⁴⁸“Nam dang nin zianga omhei khan PUMAPA ta ranga Kalkan kût ruai ifa an nuamin chu an insungkuaa ipa murdihei ser kha nin tan pêk masa rang a nit; khanungchu, nin lâia inzir angkah takin nin en rang tâk a nit a, Kalkan kût ruai khom fa sa thei tâng an ti; nikhomsela, sertan ino mi khan chu an fâk rang ni tlak mak.

⁴⁹Nin lâia inzir nin mihei neh nam dang nin lâia omhei rangin ri-ang natkan dân thumun nin mang riai rang a nit,” a ti a.

⁵⁰Mosia neh Arona zianga PUMAPA thupêk angka takah khan Israel naihei khan an tho tâk a.

⁵¹Kha nikhua takah khan Israel naihei khah Aigupta ram ata PUMAPA khan ai ṭhui isua riai tâk a nit.