Read Biete FESUAKNA 13 Bible Online

FESUAKNA 13 - Biete bible

FESUAKNA 13

¹PUMAPA khan Mosia ziangah,

²“Israelhei lâia nai lutîr, ipa, sûl ata kek murdi chu, an mîring achal zuang suak masa tak murdi neh ki rang nin ser inran rang a nit, ki ta an nit,” a ti a.

³Mosia khan mipuihei ziangah, “Vuansûn hih remai rei, Aigupta ramah bôi nin nit a, nin hong suak nî a nit. Hi muna rithokin PUMAPA khan kut irât takkan nangni ai ṭhui isua a nit; ibai chol ipol rêng rêng nin fâk rang ni mak e.

⁴Thla masatak Abib thla, vuaniah hin nin isuak a nit.

⁵PUMAPA khan Kanan mihei, Hit mihei, Amor mihei, Hiv mihei, Jebus mihei omna ram, dût neh khuaituia luangna ram, nin chibulhei zianga ṭongrikhâma ipeh ranga a lei înkungah khan nangni a ṭhui ithlun tikin chu, hi thlaah hin kum tin kût nin mang ngai rang a nit.

⁶Sûn sarika sungin bairiam nin fâk ngai rang a nit a, a sûn sarinî kha PUMAPA chôiinrisângna rangin ruai nin îṭhe ngai rang a nit.

⁷Sûn sarika sung chu ibai chol ipol rêng rêng nin fâk rang ni mak a, nin ramah chol manih, chol ipol ibai manih khom a om rang ni mak e.[13]

⁸Kût riphut nî-ah khan nin naihei ziangah, ‘Aigupta ram ata kin hong suak lâiah khan PUMAPA sinrikhêl tho sika hihei hih kin itho a nit,’ itin nin iril rang a nit.

⁹Nin kuta manih, nin ichala[14] manih riatlengna thil nin ikhuap angka hin PUMAPA dân khah nin bâiah a om mai theina rangin kha nikhua khah nin ser ngai rang a nit. Aigupta rama rithokin a sinthotheina roinpui tak imangin nangni ai ṭhui isua a nit a.

¹⁰Kum tin Kût khah a zoro takah nin mang ngai rang a nit.

¹¹“PUMAPA khan nin ziangah neh nin chibulhei zianga ṭongrikhâma nangni pe a înkung Kanan mihei ramah nangni a ṭhui ithlun a, nangni a pêk tenan chu,

¹²nin nai lutîr ipa murdi chu PUMAPA ziangah nin lan rang a nit. Nin mîringhei khom suak masa, achal murdi chu PUMAPA ziangah nin lan rang a nit a.

¹³Sakuartung te suak masa kha chu arthûlin berate lanin nin ritlan rang a nit; nin ritlan nuam no a nitin chu a ring khah nin ikhiak rang a nit. Nin nai lutîrhei chu nin ritlan ngêt rang a nit.

¹⁴Hingka hin la nîng a ta, hi nungah chu nin naihein, ‘Amahih iti nâm ai nit?’ itia nangni an la hong ridonin chu, nangmanin an ziangah, ‘PUMAPA khan a kut irât tak imangin Aigupta rama bôia kin iom khah a ne iṭhui sua a nit.

¹⁵Faroan kin suak rang a phal no lâiah khan PUMAPA khan Aigupta rama nai lutîr ipa murdi, mîring suak masa achal murdi khom, a that riai a; khasikin, sûla kek masa murdi chu PUMAPA ziangah kin ilan mai ngai a nit hi; nikhomsela, kin nai lutîr ipa murdi chu kin irtlan ngai a nit,’ nin ti rang a nit.

¹⁶Khangkan nin thon chu nin kuta manih nin ichala manih nin ikhuap angkan Aigupta rama rithokin PUMAPA khan a kut irât tak imangin nangni ai ṭhui isua a nit iti remai thei nin ti,” a ti a.

¹⁷Faroan Israelhei â suaah khan, Pathianin Filistia ram ipâla lam nâi ualna tiangah khan ṭhui mak a. Pathianin ki mihei khan ridoi a nang iti an mu tenan an lungril ithlengin Aigupta ram tiang an kîr nôk duai lôiin ai ti a nit.

¹⁸Khasikah khan Pathianin Israel mihei khah Tuipui Sen tiang ipanin ramchâr lamah a ṭhui inrivêl tâk a; Israelhei kha Aigupta ram ata kha râl idoi ranga rifo ṭiankan an rithok tâk a.

¹⁹Josefan Israela richihei zianga, “Pathianin nangni a ṭhui isua tenan chu; ki ruhei hih hi mun ata hih nin chôi rang a nit,” itia ṭonginkungna a lei înnei tâk angka khan Mosia khan Josefa ruhei khah a chôi a.

²⁰Israelhei khan Sokot mun an mâk a, ramchâr mong Ethan munah khan ommun an khuar a.

²¹Sûn neh zân an fe thei maina rangin PUMAPA khan sûnah sûmpualin an ma â ruai a; zânah anmani invâr rangin meichok idingin an ma a ruai a.

²²Sûna sûmpual neh zâna meichok iding khan mipuihei khah ai mâk tlak ngai ino a nit.