Read Biete FESUAKNA 14 Bible Online

FESUAKNA 14 - Biete bible

FESUAKNA 14

¹PUMAPA khan Mosia ziangah,

²“Israel naihei kha iril roh; kîr nôk sela, Migdol neh Tuipui Sen kâra Pi-hahirot idep Baal Zefon kôlah khan riabuk khuar riseh.

³Khanchu, Faroa khan, ‘Israel naihei khan fena rang reh loiin, ramchârah an îtâng tâk a nit hi te,’ ai ti rang a nit.

⁴Keiman Faroa lungril inkhir pêk ki ta, nangni rizûl a ta; Faroa neh a sipai murdihei chungah khan ki roinpuizia ki înlang rang a nit; khanchu, Aigupta mihei khan keimah hih PUMAPA chu ki nit iti riang an ti,” a ti a. Khangkah khan Israelhei khan an tho tâk a.

⁵Israelhei an rot tâk iti thu khah Aigupta rêng an irilin chu, Faroa neh a milianhei kha Israelhei chungah an thu a khir tak tak tâk a, “Israel mihei ei sin intho loia ei îsua tâk hih ingka sikâm ai nit tâk,” an ti a.

⁶Khanchu, Faroa khan a sakor tâlihei ân rifûk a, a sipaihei khah a ṭhui a.

⁷Sakor tâli ṭha tak tak rizarukkah neh Aigupta rama tâli murdi, a chunga sipai ruaitu chuang chithei iṭhuiin arzûl tâk a.

⁸PUMAPA khan Aigupta ram rêng Faroa lungril ân khir pêk a, Israel naihei ingam takka Aigupta ram ata suakhei khah an rizûl tâk a.

⁹Aigupta sipaihei khan an sakor murdi neh tâlihei neh sakor chungchuang mihei neh khan an rizûl a, Pi-hahirot idep, Baal Zefon kôla Tuipui Sen rikama an om lâi kha an va môk tâk a.

¹⁰Israelhei khan Faroa neh a sipai lômhei kha an tianga hong ipun tlit an mun chu an ṭi tak tak tâk a, Pathian an isam tâk a.

¹¹Mosia ziangah, “Aigupta ramah khan ithlân a om no sik im ai nit ithi rangin ramchârah ni ne iṭhui suak hi? Aigupta ram ata kha îtho sik ngân im ni ne hong iṭhui suak hi?

¹²Aigupta ram ata ei hong suak ma khomah khan hingka hin thil om a ti nang lei ti pêk mang ung im a? Nen buai no roh, Aigupta mihei sinitho khomin lei om pai rong ung, ramchâra thi nêkan chu Aigupta mihei bôia om khom a ṭhat ual kin ti kha,” an ti a.

¹³Mosian mipuihei ziangah khan, “Ṭi no unla, iding ṭian rei, vuaninta Pathianin saninringna nangni a zuang ithlun pêk rang hih thlîr ṭian rei. Vuaninta Aigupta mi nin imuhei hih mu nôk tlak khâi no tin u.

¹⁴Nangmanin îte nin tho nang no nih, PUMAPA khan nangni ai doi pêk rang a nit,” a ti a.

¹⁵PUMAPA khan Mosia ziangah, “Îtho sika ni ne îsam im ai nit hi? Israel naihei khah matiang ife mai rangin iril roh.

¹⁶Ne rol kha ilek inla, tuipui chungah ne bân phar roh. Tui khah hong inṭhen a ta, Israel naihei khah tuipui iṭuang rinêng ichârah an ilôn rang a nit.

¹⁷Keiman Aigupta mihei lungril inkhir pêk ki ta, nin inungah nangni an hong irzûl rang a nit. Khanchu, Faroa neh a sipaihei, a tâli neh a sakor chungchuang mihei sikin roinpuina kî dong rang a nit.

¹⁸Faroa neh a tâlihei neh a sakor chungchuang mihei chungah roinpui takka ki om tenan chu Aigupta mihei khan keimah hih PUMAPA chu ki nit iti riang an ti,” a ti a.

¹⁹Israelhei matianga om ngai Pathian Vântirtôn khah arthon a, an inung tiang a om tâk a. Khangkah ngirin an matianga sûmpual khom khah an inungtiang arthon tâk a.

²⁰Israelhei neh Aigupta sipaihei kârah a hong om tâk a. Israel mihei omna khah a el invâr a, Aigupta mihei omna kha chu arkhû inzîng a. Khanchu, zân thluanin sipaihei kha a tu tiang khom rinâi thei khâi mak a.

²¹Mosia khan tuipui chungah â bân a phar a; khanchu, PUMAPA khan zântluanin khosak ithli rât tak a hong inrâng a, tuipui khah a sêm ikhîr a, tuihei khah a hong riṭhen a, tuipui iṭuang khah rinêng ichâr a hong chang tâk a.

²²Israel naihei kha tuipui iṭuang rinêng ichârah khan an fe tâk a, an ivoitiang neh an ichangtiangah khan tuihei khah bang angkan arsung khap a.

²³Aigupta mihei khan an rizûl mai a, Faroa sakorhei, a tâlihei neh a sakor chungchuang mihei khan tuipui iṭuangah khan an rizûl thal a.

²⁴Khante, atûk zîng kôlrisam kaneh chu PUMAPA khan Aigupta sipaihei kha meichok neh sûmpual kârah khan lungzîng a zuk sak tâk a.

²⁵An tâli kehei ân tâng pêk a, inlôn rât thei khâi mak a. Aigupta mihei khan, “Israelhei tianga ṭangin PUMAPA khan a ne idoi a nit hih; tho rei, lei marak rei u,” an ti a.

²⁶PUMAPA khan Mosia ziangah, “Tuipui chungah ne bân phar roh, Aigupta mihei, an tâlihei neh an sakor chungchuang mihei kha tuiin a hong ichîm riai rang a nit,” a ti a.

²⁷Mosia khan tuipui chungah â bân a phar a; khante, khua a hong vârin chu tuipui kha a om ngai balamin a hong ridîl nôk pum tâk a. Aigupta mihei khan lâizâm itho an tum a; nikhomsela, PUMAPA khan Aigupta mihei khah tuipui sungah khan a pai iṭhul vang tâk a.

²⁸Tui hong ridîl nôk khan tâlihei, sakor chungchuang mihei, Faroa sipai murdihei, tuipui iṭuanga Israel mihei hong rizûltuhei khah a chîm inrimang vang a, khatka lua â zôk zel omak a.

²⁹Nikhomsela, Israelhei kha chu tuipui iṭuang rinêng ichârah khan an fe a; bang angkan an sîr kiangruaikah khan tui kha arsung khup a.

³⁰Kha nî-ah khan PUMAPA khan Israelhei kha Aigupta mihei kuta rithokin ân zôk a, Israelhei khan Aigupta mi, tuipuia thi ruakhei khah tuipui rikamah khan an mu a.

³¹Aigupta mihei chunga PUMAPA sintho inrît tak kha Israelhei khan an mu a; mipuihei khan PUMAPA chu an ṭi a. Khanchu, PUMAPA neh a suak Mosia kha an iam tâk a.