Read Biete FESUAKNA 15 Bible Online

FESUAKNA 15 - Biete bible

FESUAKNA 15

¹Khanungchu, Mosia neh Israel naihei khan PUMAPA inpâknan hi la hih an sak a, “PUMAPA inpâkin la sak ki ti, Ani khan roinpui takkan â nê tâk sikin; Sakor neh a chunga chuanghei kha tuipuiah a pai iṭhul tâk a.

²PUMAPA chu ne ṭangpuitu rât tak a nit a, Ki saninringtu a nit. Ani chu ki Pathian a nit a, chôiinrisâng ki ti. Kin pahei Pathian a nit a, a roinpuizia inpuang ki ti.

³PUMAPA chu râlpa a nit a; Arming chu PUMAPA a nit.

⁴Faroa neh a tâli chu a sipaihei neh tuipuiah a pai iṭhul riai a, A sipai iṭhahei khom Tuipui Senah an rinîk vang tâk.

⁵Tui inthûk takin arkhû tâk a; Lungtum angkan tuipui iṭuangah an rinîk tâk.

⁶O PUMAPA, ni kut changtiang kha a rât vang na! O PUMAPA, ne râlhei ne tôk inrinôi chit tâk a.

⁷Nangma doituhei kha roinpui takkan ne nê riai a; Ni ningmurna chok suak khan bupôl angkan a kâng inrivâm zoi tâk.

⁸Ner thuakin ni sêm a, tuihei kha an hong rilom vung a; Bang angkan an hong iding risung khup tâk a; Tuipui inthûk munhei khom a hong châr zoi tâk a.

⁹Irâlhei khan ripâkin, ‘Rizûl ei ta, môk ngêt ei ti; An richon murdi risem ei ta, Ei irzuk murdi la riai ei ti. Ei khandai ilek ei ta, An inei murdi la pêk vang ei ti,’ an ti a.

¹⁰Nikhomsela, O PUMAPA ner thuakin ni sêm a, Aigupta mihei kha tuipui khan arkhû zoi tâk a, Tui inthûk takheiah khan sisârtum angkan an rinîk zoi tâk.

¹¹O PUMAPA nangma angkan rithiang neh roinpui, Sinrikhêl itho thei neh ritha lian Pathian dang tûm an om im a?

¹²Ni kut changtiang ni hang phar a, Kin irâlhei chu rinêngin â lem zoi tâk.

¹³Ni ṭonginkung angka takin ni mi, ni irtlanhei kha lungkhamin ne ruai a; Ni ram rithiangah ni râtnan ne ruai ithlun a.

¹⁴Nam tinin an lei riat a, iṭin an inthing a; Filistia rama omhei khah rilônthingnan a man a.

¹⁵Edom ram ruaituhei an rithla â vâi a, Moab mirâthei rilo ân thing a; Kanan rama mihei an indôp zoi tâk.

¹⁶O PUMAPA, ni mi, bôi ata ni irtlanhei an thleng riai mâkah chu, Ni bânzâl tharât an mun iṭin an inthing a, Lungtum angkan châng thei khâi mak. Iṭi neh rilônthingin om an ti.

¹⁷Ne tlâng rithiangah khan ne ruai ithlun a, ni phun tâk a; O PUMAPA, nangma omna ranga mun ni inrifûk, Mun rithiang ni kut ngêia ni lei îndingah khan.

¹⁸PUMAPA chu kumtluang kumtluangin inlal a ti,” itin.

¹⁹Faroa sakorhei chu, a tâlihei neh a sakor chungchuang mihei chu tuipuiah an itlân lût vang a, PUMAPA khan tuikhanglian tuihei kha a hong ikhîr nôk a, ân chîm inrikhum riai tâk a; Israelhei rêk chu tuipui iṭuang rinêng ichârah khan ifen varâl an ikâi riai a nit.

²⁰Arona farnu, zânthla Miriami khan khuangte a chôi a, nupang danghei khom khan khuangte chôiin an zui a, an lâm a.

²¹Miriami khan hingka hin la a sak a: “PUMAPA chu inpâkin la sak rei, Ani khan nêna roinpui takin â ne tâk a; Sakor neh a chungchuanghei kha tuipuiah a pai iṭhul tâk,” an ti a.

²²Khanungchu, Mosia khan Israelhei kha Tuipui Sena rithokah khan â ruai mai a, Sur ramchâr an tlung a, sûn thumka sung ramchârah khan tui mu viat loiin an inzin a.

²³Tui omna, Mara an iti mun an va tlungin chu tui khah a khâk sikin in thei khâi mak a; khasikah khan arming khom Mara an ibe a nit.

²⁴Mipuihei khan Mosia ziangah, “Im kin in rang tâk?” itin an riphun a.

²⁵Mosia khan PUMAPA chu â sam a, PUMAPA khan thing khatkah ân mu a, amakhah tuiah khan a zuk ichian chu tui kha a hong tui tâk a. Kha munah khan PUMAPA khan an zôm rang dânhei a pêk a; anni chu hingka hin a fia tâk a;

²⁶“PUMAPA nin Pathian rôl hi iṭha takka nin ringai a, a mitmuah thil iṭha nin sin a, a thupêkhei nin zôm a, a dânhei murdi nin vongin chu Aigupta mihei chunga rî ki înlêng angkana rî rêng rêng nin chungah inlêng no ning e. Keimah PUMAPA, nangni indamtu ki nit hih,” a ti a.

²⁷Khanungah khan tuinâr sômleiinikah neh itûm kung sômsarika omna mun Elim kha an tlung a, kha mun tui kôlah khan riabuk an siam a.