Read Biete FESUAKNA 16 Bible Online

FESUAKNA 16 - Biete bible

FESUAKNA 16

¹Israel nam pumpui Elima rithokin an fe mai a, Aigupta ram an mâka rithoka a thla nikna a sûn sômleiringana nî-ah khan Elim neh Sinai kâra Sin ramchâr an hong tlung a.

²Kha ramchârah khan Israel nam pumpui kha Mosia neh Arona chungah an riphun a.

³Israelhei khan an ziangah, “Aigupta rama sabêl bula kin iṭhung lâi hei, fâknêk ikhop taka kin fâk ngai lâi heiah khan PUMAPA khan a ne lei ithat tâk ni sela ai ṭhat rang, ramchâra voniṭâma thi rangin mipui hi zâk zâk hih nin ne hong iṭhui suak a nit hi,” an ti a.

⁴PUMAPA khan Mosia ziangah, “Ringai roh, nin fâk rang ifarua rivâna rithokin ki zuk însûr rang a nit; khanchu, mipuihei khan sûn tin an sûnkah fâk inrupbak rang bang va rût ngai riseh, khangkah khan ki thu an zôm neh zômno ki lei ifia rang a nit.

⁵A sûn ruk nia an irût kha chu ifah rangin inrifûk an ta; sûn danga an irût ngai bâk inikah an rût rang a nit,” a ti a.

⁶Khanchu, Mosia neh Arona khan Israel murdi ziangah, “Kholoi tiang chu Aigupta ram ata nangni ṭhui suaktu chu PUMAPA a nit ngêt iti reh tâng nin ti.

⁷Zîngah chu PUMAPA roinpuina mûng nin ti; PUMAPA chunga nin riphunna kha a lei iriat tâk a nit. Keimani hih tu ngân im kin nit a kin chungah nin irphun rang,” an ti a.

⁸Khante, Mosian, “PUMAPA khan kholoi tiang sa ifah rang nangni pêng a ta, zîngtiang nin fâk inrup rang ibai nangni pêng a ti; PUMAPA Pathian khan a chunga nin riphunna khah a lei riat tâk a. Kin chunga nin irphun hih PUMAPA chunga riphun kêng nin nit,” a ti a.

⁹Khanchu, Mosia khan Arona ziangah, “Israel nai hong ribûmhei ziangah hin, ‘PUMAPA maah hong nâi rei; nin riphunnahei khah a lei riat tâk hi,’ ti pêk roh,” a ti a.

¹⁰Aronan Israel mipui ribûmhei ziangah thu â sîr lâi takah khan, ramchâr tiang an hang ngat a; PUMAPA vâr ri-el kha sûmah a zuang ilang tâk a.

¹¹PUMAPA khan Mosia kha â sôn a,

¹²“Israelhei riphunna kha ki lei riat a; an ziangah, ‘Kholoi tiang sa fâng nin ta, zîngah ibai ikhop takkan fâng nin ti; khatenan chu PUMAPA nin Pathian ki nit iti reh tâng nin ti,’ ti pêk roh,” a ti a.

¹³Kholoiah khan vamîm an hong vuang a, riabuk kha an hong sip khap tâk a; zîngah chu an riabuk vêl khah ridôn arkhû zit sa tâk a.

¹⁴Rido khah a hong hûlin chu ramchâr ipil chungah khan robang i-ang thil ivâr thliam riphân te te, ivur lom angkana hih a hong ilang fur a.

¹⁵Israelhei khan amakhah an mu kaneh chu, “Im ai nit tâk hi?” an ti a; im ai nit an iriat ino a nit. Mosia khan an ziangah, “PUMAPA khan nin fâk rang ibai nangni ai pêk a nit hih.

¹⁶Amahih PUMAPA thupêk chu a nit; mi tinin mahni khop inrup seng rût unla, mi khatka rangin kilât inikah chit, nin insungkua miriam om zâk ienin nin rût rang a nit,” a ti a.

¹⁷Israelhei khan khangkah khan tak an tho a; ṭhenkan chu an rût intam a, ṭhenkan chu an rût inroi ual a.

¹⁸Kilâtin an hang rita tikin chu â rût intamhein nei intam ual mak a, â rût inroihei khom khan nei inroi ual mak; mi tinin mahni khop inrup chit an irût seng a nit.

¹⁹Mosia khan an ziangah, “Tukhomin atûka fah rang itin zua no rei,” a ti a.

²⁰Nikhomsela, Mosia ṭong zôm nuam mak a; a ṭhenin atûk nôka rang itin an zua a; khanniseh, arlung a, a thûk a, â nam a siat tâk a; khasikah khan Mosia kha an chungah a ning a thik tak tak tâk a.

²¹Khaangkan zîng tin, mi tinin mahni fâk khop inrup rang bang an rût mai tâk a; nîsa a hong lumin chu rinênga rût bân la om khah a zôi vang ngai a.

²²A sûn ruk nî-ah khan chu ibai khah a bâk inikah an rût a, mi khatka rangin kilât ilikah chit an irût a nit. Amakhah mipuihei chunga ruaituhei khan Mosia khah an hong iril a.

²³Ani khan an ziangah, “PUMAPA thupêk chu amahih a nit, Naktûk khi nikhua rithiang a nit a, PUMAPA ta ranga sabat rithiang chu a nit. Khasikin, vuanah hin ifah rang nin inuamkah chu isuangin nin nuam le suang unla, ibutin nin nuam le chu but unla, nin fâk bân la om kha chu atûka rangin nin sianṭhat rang a nit,” a ti a.

²⁴Mosia thupêk angkan atûka ranga an izua kha ui mak a, rilung khom rilung mak a.

²⁵Mosia khan an ziangah, “Amakhah vuanah hin chu fah rei; vuani hih PUMAPA sabatnî a nit a; khasikin, riabuk kôlvêlah bu îte mu no tin u.

²⁶Sûn rukka sung zîng tin fâk rût nin ta, khan a sûn sarinî chu sabatnî a nit a, îte irût rang om no nih,” a ti a.

²⁷Sûn sarinî-ah khan mi ṭhenkah chu an thil rût ngai irût rangin an rithok suak a; khanniseh, irût rang zel mu mak a.

²⁸PUMAPA khan Mosia ziangah, “Itena sôt im ki thupêk neh ki dânhei hi zôm nuam loiin nin iom rang hi?

²⁹Keimah PUMAPA hin sabatnî nangni ki siam pêk a; khasikin, a sûn ruknî-ah khan nin fâk rang sûnnika sung inrup rang nangni kî pêk a nit hih; a sûn sarinî-ah hin chu mahni riabukah om ṭian rei, tute suak viat no rei,” a ti a.

³⁰Khanchu, mihei kha a sûn sarinî-ah khan chu an ringam tâk a.

³¹Israel mihei khan thil kha “Manna,”[15] an be a; chimu ru vâr sap angka hi a nit a, khuaituia met ibai angkana tui a nit.

³²Mosia khan, “PUMAPA thupêk chu amahih a nit; nin richi suanpârhei la hong mu rangin Manna hi kilâtkah nin rê inṭhat rang a nit; Aigupta ram ata nangni ki ṭhui suak a, ramchâra nangni ke fâna bu chu a nit hih,” a ti a.

³³Mosia khan Arona ziangah, “Bêl lan la, Manna hi kilât khatkah thun roh. Rualithar la hong iom mai ranghei mu rangin PUMAPA maah seh roh,” a ti a.

³⁴Mosia zianga PUMAPA thupêk angka khan Arona khan Thuthlung Bômah khan a sia tâk a.

³⁵Israel naihei khan miriam omna ram, Kanan ram an tlung mâkah chu kum sômilika sung Manna khah an ifâk a nit.

³⁶(Omer khatkah hi efa mun sômka ṭhena mun khatkah a nit.)