Read Biete FESUAKNA 17 Bible Online

FESUAKNA 17 - Biete bible

FESUAKNA 17

¹Israel mipui murdi kha Sin ramchâr ata an suak nôk a, PUMAPA thupêk angkan mun khatkata rithokin mun dangah an rithon thiai mai a; Refidimah riabuk an khuar a; khannisela, kha munah khan mipui rang tui iin rang omak a.

²Mihei khan Mosia ziangah an riphun a, “Tui iin rang ne peh roh,” an ti a. Mosia khan an ziangah, “Îtho sik im ki ziangah nin irphun? Îtho sik im PUMAPA khom nin irnak hi?” a ti a.

³Nikhomsela, mipuihei kha an tui arhâl tak tak a, Mosia chungah khan an lar phun mai a; “Îtho rang sik im tui rihâla thi rangin Aigupta rama rithokin kin naihei neh kin ranhei neh ni ne hong iṭhui suak hi?” an ti a.

⁴Khanchu, Mosian PUMAPA â sam a, “Hi mihei rangah hin im ki tho rang tâk? Lunga ne dêng rang khomin an irsiam chak a nit hih,” a ti a.

⁵PUMAPA khan Mosia ziangah, “Mipuihei maton tiang fen la, Israel ruaitu ṭhenkahei ṭhui roh. Tuipui ne tôk ṭhenna rol kha chôi inla fe roh.

⁶Ringai roh, Horeb tlânga lungpui chungah ni matonah lei iding ki ta; khante, lungpui kha hang itông ni ta; khanchu, mipuihei in rang tui zuang luang suak zel a ti,” a ti a. Mosia khan Israel ruaituhei mitmuah khan khangkan a tho a.

⁷Kha mun rimingah khan Maasa neh Meriba[16] a be a, Israelhei khah an riphun sik neh “Ei lâiah PUMAPA a om titak im omak im?” itia PUMAPA an fia sikin a nit.

⁸Refidima khan Amalekhei an hong a, Israelhei khah an hong doi a.

⁹Mosia khan Josua ziangah, “Mi rithlang suak inla, naktûk Amalekhei va doi roh. Pathian irol khah ichôiin itlângsîpah khan lei iding ki ti,” a ti a.

¹⁰Mosia be lam takkan Josua khan a tho a; khanchu, Amalekhei idoi rangin a fe tâk a. Mosia chu Arona neh Hora iṭhuiin itlângsîpah an lui a.

¹¹Mosian â bân a hang pharin chu Israelhei kha an rât a, â bân â ṭhumin chu Amalekhei kha an rât ngai a.

¹²Mosia bân khah a kham tâk a; khanchu, Arona neh Hora khan â ṭhungna rang lung an hong chôi a, amakhan â ṭhung a; Arona neh Hora khan â bân khah khatkan kiangkah, khatkan kiangkah an idom a, inî a tlâk mâkah chu â bân a phar thei tâk a.

¹³Khangkah khan Amalek mihei kha Josua khan a înê vang tâk a nit.

¹⁴Khanungchu, PUMAPA khan Mosia ziangah, “Hi thu hih riatmaina rangin lekhabuah riziak roh. Vân nuaia tutên Amalekhei an om iti an riat khâi no rang dôrkan kî that inrimang rang a nit, iti Josua iril roh,” a ti a.

¹⁵Mosia khan mâichâm a siam a, armingah, “Jehova Nisi,”[17] a be a.

¹⁶“PUMAPA ritlek chu chôiinrisâng rei. PUMAPA khan Amalekhei chu tiklâi khomin ai doi mai rang a nit,” a ti a.