Read Biete FESUAKNA 18 Bible Online

FESUAKNA 18 - Biete bible

FESUAKNA 18

¹Midianhei thiampu, Jethroa, Mosia tarpu khan, Mosia neh a mihei ta rangin Pathianin thil a tho pêk a, PUMAPA ngêiin Israelhei Aigupta ram ata a ṭhui isua zia thuhei a lei riat a.

²Mosia tarpu Jethroa khan Mosia nupui Zipori, Mosian in tianga ai mâk kha, a naipahei inikah neh khan a hong ṭhui a. A naipa ulian ual riming kha Gersoma a nit a; “Ram dangah khualmi ki nit,” a tina a nit.

⁴Khatka riming khah Eliezera[18] a nit a, “Ki pahei Pathian khan a ne ṭangpui a, Faroa khandai ata a nen zôk,” a tina a nit.

⁵Pathian itlâng, ramchâra riabuk an khuarna munah Jethroa khan Mosia nupui neh a naiipa inikahei kha Mosia ziangah a hong ṭhui pêk a.

⁶Ani khan Mosia ziangah, “Keimah, ni tarpu, Jethroa hin ni nupui neh ni naiipa inikahei hong iṭhuiin ki hong rang a nit,” itin ṭong a lei richa a.

⁷Khanchu, Mosia kha a tarpu don rangin arthok a, a makungah â khûn a, chibai a bûk a; dam har thu an ridon risak a; Mosia puan-inah khan an lût tâk a.

⁸Israelhei sanisuana ranga Faroa neh Aigupta mihei chunga PUMAPA sintho murdi hei, lamlâia intak an tuang lâia PUMAPA khan anmani a saninzôk tlia murdi hei khah Mosian a tarpu khah â ril a.

⁹Aigupta mihei kut ata neh Faroa kut ata Israelhei a saninzôk a, an chunga a ṭhatna murdi sikah khan PUMAPA chungah Jethroa kha a lôm tak tak a,

¹⁰“Aigupta mihei kut ata neh Faroa kut ata nangni saninzôktu PUMAPA chu inpâkin om riseh. Aigupta mihei bôi ata nangni saninzôktu chu inpâkin om riseh.

¹¹Israel mihei khangkah dôra imusit a, deng an întheihei kha a saninzôk tâk sikin, PUMAPA chu pathian dang murdi nêkan a roinpui ual iti atûn chu kî riat tâk a nit,” a ti a.

¹²Khanchu, Jethroa khan hâlrivâm thillan neh Pathian zianga ribôlnahei a hong lan a. Arona neh Israel ruaituhei murdi kha Pathian maah Mosia tarpu ribôlna khalai rikhîl rangin an hong a.

¹³Atûkah chu Mosia khah mipuihei roiirêl rangin â ṭhung a; mipuihei khan zînga rithokin kholoi idênin Mosia kôl vêlah an iding mai a.

¹⁴Mosia tarpu khan mipuihei roi a rêl pêk dân khah a mu a, “Îtho tâk im mipui ta rangin hingka hin roi nî rêl? Îtho sik im nangmah korongin irêl riai itumin ne ṭhung a, zînga rithokin kholoi idênin mipuihei hih ni kôlah an îding rum mai hi?” a ti a.

¹⁵Mosian a tarpu ziangah khan, “Pathianin ai nuam ireh rangin mihei hih ki ziangah an ihong a nit sikin ki tho ngêt ai nang a nit.

¹⁶Thubuai an neiin ki ziangah hin an hong ithlun ngai a, an bungtualbômhei neh an kârvân thu ki lei irêl infel pêk ngai a nit. Pathian thupêk neh a dânhei chu ki lei îril ngai a nit,” a ti a.

¹⁷Mosia tarpu khan, “Ni thil tho dân hih ai ṭhat ino a nit.

¹⁸Nangmah neh hi mihei hih nin isôl rai rang a nit, hi sin hih ni khât banga tho rangin chu a întak rai rang a nit.

¹⁹Ki ṭong hih ringai roh, roi nang lei sakpui rong, Pathianin nang ompui a ti. Mipui rithûla Pathian zianga fe a, an thubuaihei Pathian zianga thluntu rang ni nit.

²⁰Pathian thupêkhei neh a dânhei chu inrisei ni ta, an om rang dân neh an sin rang dân kha ne ril ngai rang a nit.

²¹Kha bang khah ni loiin, mipui lâi ata mi fel ual ual, Pathian iṭi mi, thu dik ringaiinna, leprûk inel mi rithlang suak inla, kha mihei khah sângka chunga ruaitu rang, rizaka chunga ruaitu rang, sômringaka chunga ruaitu rang, sômka chunga ruaitu ranghein phun roh.

²²Khahei khah mipuihei ranga roirêltu det ni riseh, thu chîn murdi chu rêl pêk sela, thu lian ual chu ni ziangah hong ithlun ngai riseh; khanchu, nang risak inzâng an ta, ni sôl khom dam ual ok a ti.

²³Pathian thupêk angkana khangkan ni thon chu isôlin rizal no tin a, mipuihei murdi khom an thu rêlinfel pêk vak vaka omin mahni omna tiang an iṭîn nôk thei rang a nit,” a ti a.

²⁴Khanchu, Mosia khan a tarpu roisakpui khah a zôm a, a ti pêk lam angka khan a tho tâk a.

²⁵Israelhei lâia mi fel Mosian arthlang suak a, mipuihei chunga ruaitun a phun a, sângka chunga ruaituhei, rizaka chunga ruaituhei, sômringaka chunga ruaituhei, sômka chunga ruaituhein a siam tâk a.

²⁶Khahei khan tiklâi khomin mihei khah roi an rêl pêk a, thu lianhei kha chu Mosia ziangah an ithlun a, thu chînhei chu anmanin an irêl infel mai ngai a nit.

²⁷Khanchu, Mosia khan a tarpu khah a va thla a; Jethroa chu a omna ram tiang a kîr nôk tâk a.