Read Biete FESUAKNA 19 Bible Online

FESUAKNA 19 - Biete bible

FESUAKNA 19

¹Aigupta an mâka rithoka a thla thumna, a sûn khatnî a khan, Israel naihei khan Sinai ramchâr an hong tlung a.

²Refidima rithokin Sinai ramchâr an hong tlung a, kha ramchâra itlâng bulah khan riabuk an khuar a, Mosia chu Pathian ritongpui rangin itlângah khan a hang lui a.

³Itlânga rithokin PUMAPA khan a zuk koi a, “Jakoba richi, Israel naihei ziangah hingka hin iril roh:

⁴Aigupta mihei chunga ki sinthohei nin mu a, mupuiin a tehei arthla chunga ai puak ngai angkan nangni ki puak a; hin keima ziangah nangni ki hong ṭhui ithlun a.

⁵Khasikin, ki ṭong nin ringai titak a, ki thuthlung hih nin vong inṭhat titakin chu nam tin tin lâiah ker chon thloibeihei nîng nin ti. Rammual pumpui hi ki ta a nit a, khan nangni chu ki nam rithlanghei nîng nin ta,

⁶keima ta rang bîka nam serinran, thiampu rang nîng nin ti. Amakhah Israelhei ne ril rang chu a nit,” a ti a.

⁷Mosia khah itlâng ata a zuang ṭum a, Israel ruaituhei kha a koibûm a, PUMAPA thupêk murdi khah â ril a.

⁸Khanungchu, mipui murdi khan, “PUMAPA iti murdi chu thông kin ti,” an ti a. Mipuihei sâmna thu khah Mosia khan PUMAPA ziangah â thlun a.

⁹PUMAPA khan Mosia ziangah, “Ringai roh, sûm isa takah ni ziangah zuang ki ta, ni zianga thu ke sîr lâi mipuiin lei reh sa thei an ta, nang khom kumkhuakan nang an iiam ngam rang tâk a nit,” a ti a. Mosia khan mipuihei sâmna thu khah PUMAPA â ril a,

¹⁰PUMAPA khan Mosia ziangah, “Mipuihei ziangah fen la, vuani neh naktûk chu anni khah thâr inrithiang roh. An puanhei risûnfâi sela,

¹¹a sûn thumnîa rangin rizoi thlâm riseh; kha nî-ah khan mipui murdi mitmuah Sinai tlângah khan PUMAPA chu a zuang iṭum rang a nit.

¹²Itlâng ivêlin rî nen dang pêk rang a nit. Itlâng va chuang loi rangin ridîn riseh; a kôl inâiah khom fe loi rangin iril roh; itlâng va chuang murdi chu ithat ngêt rang a nit.

¹³Kha mi khah tutên an kutin an tôn rang ni mak; lunga dêng that manih phela kâp that rang manih a nit; amahin miriam khom mîring khom ai huam a nit; ithat ngêt rang an nit. Khannisela, bekul â ring tenan chu mipuihei khan itlâng khah an hong tlung rang a nit,” a ti a.

¹⁴Khanungchu, Mosia khah itlânga rithokin a zuang ṭum a, mipuihei khah a thâr inrithiang a; an puanhei kha an risûk infâi a.

¹⁵Mosia khan mipuihei ziangah, “A sûn thumnîa rangin risiam thlâm rei, nin nupuihei kôlah zâl no rei,” a ti a.

¹⁶A sûn thumnî zîngah khan khuarîhei a rît dur dur a, khothlâr arlek a, itlâng khah sûm isa takin a zuang rikhû khap a; bekul irî ring tak a zuang irî a; riabuka mi murdi iṭin an inthing a.

¹⁷Pathian ritongpui rangin mihei khah riabuka rithokin Mosia khan a ṭhui isua a; itlâng bulah khan an iding a.

¹⁸PUMAPA chu mei neh a zuang ṭum sikin Sinai tlâng khah meikhû a zîng khap a; meipui khû angka dôran a khûk zut zut a, itlâng kha â nîng dur dur a.

¹⁹Bekul irî khah a ring tîr tîr a, Mosia khan thu â sîr a. Pathianin khuarî a khan a zuk sâm a.

²⁰PUMAPA khah Sinai tlângsîpah khan a zuang ṭum a, itlângsîpa lui rangin Mosia khah PUMAPA khan a koi a; Mosia chu a hang lui tâk a.

²¹PUMAPA khan Mosia ziangah, “Zu ṭum inla, mipuihei khû zu ril roh; PUMAPA mêl imu tumin ramrî rikham an hong khêl duaiin chu mi itam takkah an ithi rang a nit.

²²Ki makunga hong ngai thiampuhei khom an rithâr rithiang rang a nit; khanonchu, kuttum kî tho rang a nit,” a ti a.

²³Mosia khan PUMAPA ziangah, “Mipuihei khan Sinai tlâng hong chuang mak e, ‘itlâng ivêlkan ramrî indang unla, serinrithiang rei,’ ni ne iti a nit kha,” a ti a.

²⁴PUMAPA khan, “Zu ṭum inla, Arona neh hong nôk rei. Khanniseh, thiampuhei neh mipuihei chu ki zianga hong rangin ramrî khu an khêl viat rang ni mak e, an rikanin chu kuttum kî tho rang a nit,” a ti a.

²⁵Khanchu, Mosia khah mipuihei ziangah a zu fe a, PUMAPA thu sîr murdi kha â ril a.