Read Biete FESUAKNA 2 Bible Online

FESUAKNA 2 - Biete bible

FESUAKNA 2

¹Hi lâi zoroah hin Levia richia mi khatkah[3] hin a chipui ngir nupuiin a nei a.

²Ani khan nai ipa a nei pêk a. Nai ipa mêl iṭha tak a nit sikin a nu khan thla thumkah a thup a.

³Khante, a thup mai thei khâi no tenan chu lâiluanga siam kokrikuang a lâk a, tui lût thei nona rangin thingnâi neh khuailu a nâl a. Khanchu, naite kha a sungah ân zâl a, vadung panga lâiluang kârah khan a sia tâk a.

⁴Ingkan im a om iti en rangin naite farnu khah ila ianka ta â ding ṭian a.

⁵Faroa nainu khah â som nungâkhei neh tui risil rangin vadungah khan a zu fe a; vakôlah an lôn vêl a, lâiluang kâra kokrikuang kha a mu a, â som nungâkhei kha ân lâk a.

⁶Rêng nainu khan a zuk iongin chu naite kha a mu tâk a, naite khah a ṭap a. Ani khan â lung a kham tak tak a, “Amah hih Hebrai naihei lâia khatkah a nit ngêt hi,” a ti a.

⁷Khanchu, a farnu khan Faroa nainu ziangah khan, “Fêng ki ta Hebrai nupanghei lâia khatkah hi naite nang idon pêk rang la va koi rong?” a ti a.

⁸Faroa nainu khan, “A ṭhat fe roh” a ti a. Khanchu, nupangte khah a fe a, naite nu ngêi khah a va koi tâk a.

⁹Faroa nainu khan a ziangah, “Hi naite hih ṭhui inla ne don pêk roh, lo nang pêng ki ti,” a ti a. Khanchu, nupangnu khan naite khah a lâk a, a donsui tâk a.

¹⁰Naite khah a hong lian tenan chu Faroa nainu ziangah a ṭhui a, ani khan a naipan a lei nei tâk a, “Tuia rithoka kî lâk suak a nit a,” itin arming Mosia a sak a.

¹¹Mosia kha a hong puitling tâk a. Sûnkah chu a suapui Hebrai mihei omnah a va lêng a, an sin sôl dân a va mu a; a suapuihei lâia Hebrai mi khatkah Aigupta mîn a lei itôk lâi kha a mu a.

¹²A ngat zuai zuaia tute omak iti a mun chu, Aigupta mi khah â tôk that a, balinôlah a phûm tâk a.

¹³Atûkah khan a va fe nôk a, Hebrai mi inikah hi an lei risual a, ani khan â thon châitu ziangah khan, “Îtho sika ni Hebrai suapui ni îtôk im hi?” a ti a.

¹⁴Kha mi khan a ziangah, “Tûm kin chungah thuneitu neh roirêltua nang iphun? Aigupta mi nî that angkana ne that nî tum mani?” a ti a. Khanchu, Mosia khan a ṭi tâk a, “Ki sintho khah mîn an iriat tâk a nit hi te,” a ti a.

¹⁵Faroan kha thil khah a riat tenan chu Mosia khah ithat a tum tâk a; nikhomsela, Mosia kha Faroa ziang ata lâizâm a tho tâk a, Midian ram a va tlung a, tuisunsua kôlah â ṭhung rak a.

¹⁶Khante, Midian thiampu khan nai nupang sarikah a nei a; anni kha tui ichôi an hong a, an pa berahei neh kêlhei in rang ran tui inna rikuanghei khah an insip a.

¹⁷Berapu danghei an hong a, Jethroa nainuhei khah an hong rizûl a. Khannisela, Mosia khan anni khah a lei san a, an berahei neh kêlhei khah tui ân in pêk a.

¹⁸Nungâkhei khah an Pa Reuela[4] ziang an tlung tenan chu, ani khan, “Vuani chu nin hong kîr imat bâk a?” itin a lei ridon a.

¹⁹Anni khan, “Aigupta mi khatkan berapuheia rithokin a ne san a, amah ngêiin tui a chôi a, ranhei khah tui ân in sika a nit,” an ti a.

²⁰Ani khan a nainuhei ziangah khan, “Khate, ani khah takâm ai om? Îtho sika nin hong imâk rak im? Fe unla va koi rei, bu khom hong ne riseh,” a ti a.

²¹Mosia khan kha mi zianga om khah ṭha a ti a; Mosia khah kha mi khan a nainu Zipori nupuiin ân nei a.

²²Zipori khan nai ipa a nei a, Mosia khan, “Khualmi, ram dang mi ki nit hih,” itin arming kha Gersoma a sak a.

²³Kum isôt takka nungah chu Aigupta rêng khah a thi tâk a; khannisela, Israela richihei khah bôi nitna puakrik sikah khan an lâ rung mai a, ṭangpuina ngêna an ikhêk rôl khah Pathian ziang a tlung tâk a.

²⁴Pathianin an irung khah a lei riat a; Abrahama hei, Isaka hei neh Jakoba hei zianga a thuthlung khah a riat mai a.

²⁵Pathianin Israel naihei dingmun kha a mu[5] a, anmani a ngaisak tâk a.