Read Biete FESUAKNA 21 Bible Online

FESUAKNA 21 - Biete bible

FESUAKNA 21

¹“Israelhei zôm rangin amahih dânin siam pêk roh.

²Hebrai mi bôiin an richôkin chu kum irukka sung suakin om a ta, a kum sari kumin chu ani khah man boia sua rang a nit.

³Ama khât banga richo a nitin chu amah bang suak a ta, a nupui neh richo an nitin chu a nupui neh khan an suak rang a nit.

⁴A pu khan nupui ân nei a, nainu naipa an neiin chu, a nupui neh a nainetehei chu a pu ta an nit a, amah chu a khâtin suak thei a ti.

⁵Khanniseh, suak khan a pu a kan a, a nupui neh naihei lung ân kham a, ‘Suak no ning e,’ a ti ngitin chu,

⁶a pu khan Biak Inah ṭhui a ta, inkotah, inkot bulah khan inding a ta, thîr rizumin â kuar iver pêk a ta; khanchu, a ringkong kârkah a suak ni mai tâng a ti.

⁷“Min a nainu bôiin zuar sela, bôi ipahei angkana isua rang ni mak e.

⁸Kha nupang khah nupuia nei ranga a irchôk a nit a; khannisela, kha mi khan a nuam nôk khâi noa a nitin chu, a pa khah ân ritlan nôk rang a nit; a pu khan a lêm sikah khan mi dang ziangah ai zuar thei ino a nit.

⁹Min a naipa nupui ranga suak nupang a irchôk a nitin chu a nainu angkan a en rang a nit.

¹⁰A naipa khan nupui dang a nei nôkin chu a nupui masa khah fâknêk hei, silbom hei neh a dongtum thil dang hei khah ân roi pêk rang ni mak e.

¹¹Hi thil ithumkah hih a tho pêk non chu a man iboiin â sua rang a nit.

¹²“Tu khomin mi itoh sela, a îtôkah khah a thin chu ani khom khah ithat sa ngêt rang a nit.

¹³Tum sik pial ni loia a îtôk that duai a nitin chu, mun nangni ki îndang pêk rangah khan a zôkna rangin itlân lût a ta, amakhan zôk thei a ti.

¹⁴Zôkna rangin ki mâichâmah itlân lût man sela, ningmura itum piala mi dang ithattu chu sapisua a, ithat rang a nit.

¹⁵“Mahni inzirna nu chunga manih, pa chunga manih kut iṭhumtu chu ithat rang a nit.

¹⁶“Izuar rangin manih, ama bôi rangin manih miriam â rûkin chu kha mi khah ithat rang a nit.

¹⁷“A nu manih, a pa manih vâni sâmtu chu ithat rang a nit.

¹⁸“Mi risual sela, a khatka khôkin lungtumin suk sela manih, kutfûrin richûm sela manih, a that non chu ani khah kuttum itho rang ni mak.

¹⁹Zâlmuna tâl ṭianin a nat a, irol iṭhuna tualah a lêng suak nôk thei tenan chu zâlmunah a om sung ritha rithûl kha kutiṭhumtu khan a thung rang a nit a, a dam ṭhat mâkah chu a enkol rang a nit.

²⁰“Min a suakpa manih a suaknu manih irolin itoh sela, â tôk thatin chu kha mi khah kuttum itho rang a nit.

²¹Khan thi zel loiin sûnka manih sûnnika manih a la damin chu, a pu khah kuttum itho rang ni mak e. A thilnei richon a îchân tâk tina a nit.

²²“Mi an risual a, nupang nai ivong an innat duai a, amah chu popliam no khom sela a nai vong khah a siat pêkin chu, kha nupangnu pasalin a phût zâkah, roirêltuhei ṭhat tipuin inchôi rang a nit.

²³Nupang khan popliam a tuangin chu, ringna sikah ringna,

²⁴mit sikah mit, ha sikah ha, kut sikah kut, ke sikah ke,

²⁵meia kâng sikah meia kâng, sâbe sikah sâbe, tôkridul sikah tôkridul intuang rang a nit.

²⁶“Min a bôipa mit manih, a bôinu mit manih itôn del pêk sela, a mit â siat pêk manah khan â sua rang a nit.

²⁷A ha ân thlam pêk khomin a ha manah khan â sua rang a nit.

²⁸“Sechalin miriam sik that sela, sechal khah lunga dêng that rang a nit, a sa khah ifah rang ni mak a; a chongpu chungah khom kut iṭhum rang ni mak e.

²⁹Nikhomsela, sechal khan mi sik a lei isong a, a chongpu khom iril a lei nit tâk ngai a, khan thlung ṭha nuam loia mi ipa manih nupang manih a sik thatin chu, sechal kha lunga dêng that rang a nit a, a chongpu khom khah ithat rang a nit.

³⁰“Khannisela, a chongpu kha a ringna ritlan an phal pêkin chu a ringna ritlanna rang bi an tuk zâk zâkah a pêk ngêt rang a nit.

³¹Sechal khan naipang, ipa manih nupang manih a sik that khomin puitling ai sik that angka ngira rêl rang a nit.

³²Sechal khan bôipa manih bôinu manih sik that sela, a chongpu khan suak ineitu ziangah khan tangka sômithumkah a pêk rang a nit a, â siktu sechal khah lunga dêng that rang a nit.

³³“Min khur sîng â ongin manih, khur ithar a choiin manih a sîng nôk no a, sechal manih sakuartung manih a tlâka a nitin chu,

³⁴khur ichoitu khan a man a chôi rang a nit. A man a pêk zoi tâka a nitin chu a sa chu dong thei a ti.

³⁵“Mi khatka sechalin mi dang sechal a sik thatin chu sechal a la dam khah izuar rang a nit, a man kha risem an ta, â thi tâk sa khom khah an risem rang a nit.

³⁶Khannisela, sechal khan zoro thlengah mi sik a lei song ngai a, a chongpu khan ai thlung ṭhat ino a nitin chu sechal ai sik that khah sechal ngirin a thung rang a nit a, â thi tâk sechal sa kha chu dong thei a ti.