Read Biete FESUAKNA 22 Bible Online

FESUAKNA 22 - Biete bible

FESUAKNA 22

¹“Mîn sechal manih bera manih â rûk a, a thatin manih, a zuarin manih a nitin chu sechal khah sechal ringakan thung a ta, bera khah bera ilikan a thung rang a nit.

²A thil irûk khah a thung ngêt rang a nit a, a thungna rang a nei non chu a thil irûk thungna rangin ani khah suaka zuar rang a nit. A mîring irûk sechal manih, sakuartung manih, bera manih kha idama an la omin chu a bâk inikan a thung rang a nit. “Inru, zânah mi insunga lût iman a nit a, ito that a nit khomin â thattu khah mi nal isata be rang ni mak. Khan sûn khovâra that a nitin chu mi thata be rang a nit.

⁵“Mîn a ranhei ân lêng a, mi loia manih, grep bila manih ilûtin chimu khah fa seh sela, a fâk isiat dôrkah kha ran chongpu khan a loia chimun manih, a grep bila grepin manih a thung rang a nit.

⁶“Mîn a loiah mei sêm sela, loisûlheia rizôtin mi dang loi va kângin bu kung idinglâi manih, ât zoia buk manih va kâng duai sela, mei isuatu khan a kâng isiat dôrkah kha a thung rang a nit.

⁷“Mîn mi dang sum manih thil ilu dang manih a rê pêk a, a rê pêk sungah khan armang tâk a, â rutu khah iman suak a nitin chu â rutu khan a bâk inikan a thung rang a nit.

⁸Â rutu khah iman suak a nit non chu thil iluhei irêtu khah roirêltu makunga ṭhui rang a nit, iru tlak mak iti riatnan vâni ân risâm rang a nit.

⁹“Thil richu rêng rêng, sial manih, sakuartung manih, bera manih, silbom manih, thil rimang an irût manih, richutuhei kha roirêltuhei makunga ṭhui rang an nit. Roirêltun thiamno changa a înpuang khan thiam ichangtu khah a bâk inikah a pêk rang a nit.

¹⁰“Mîn sakuartung manih, sial manih, bera manih, mîring dang manih a suapui ta enkol pêk sela, a lei thi duaiin manih, popliam a tongin manih, suammihein an irûk pêkin manih a nit a, riatpuitu an om non chu,

¹¹â enkoltu kha biak inah iṭhui rang a nit, a suapuipa mîring khah a îrûk ni mak iti inlangna rangin vâni arsâm rang a nit. Mîring khah a îrûk a nit non chu â neitu khan a îchân nîng a ta, â enkoltu khan a thung nang no nih.

¹²A îrûk a nitin chu, a thung ngêt rang a nit.

¹³Ramsa isê that a nitin chu sa fâk bân a ṭhen sa isê a nit inlangna a hong chôi rang a nit; ramsa isê chu a thung nang no nih.

¹⁴“Mîn mi dang ran a mang a, â neitu mû loiin pop sela manih, thi sela manih, a nitin chu â mangtu khan a thung ngêt rang a nit.

¹⁵â neitu mu chunga a nitin chu a thung nang no nih. Thalo peh ranga mang a nit a, a mang man thalo khan a irthung rang a nit.

¹⁶“Nungâk ithlîng vat, tute lai hual ino, mîn a châipuiin chu, nupui man balamin chôi a ta, nupuiin a nei rang a nit.

¹⁷A pa khan innei rangin a phal non chu nungâk ithlîng man balamin a chôi rang a nit.

¹⁸“Khoridôi ithiam nupang chu ithat rang a nit.

¹⁹“Ran ipôltu chu ithat rang a nit.

²⁰“PUMAPA ziangah ni loia pathian dang zianga ribôlna lantu chu that inrimang ngêt rang a nit.

²¹“Nin lâia nam dang iomhei nin nuamilon nin sirphûm rang ni mak; nangni khom Aigupta ramah khan khualmin nin lei iom kha nin riat mai rang a nit.

²²Numei manih, fara manih nin nuaisia rang ni mak.

²³Nin nuam nin lon chu, keimah PUMAPA hin an lungzîng khêkrôl khah lei ringai ki ta,

²⁴ki ning thik a ta, khandaiin nangni kî that rang a nit. Nin nupuihei kha numei chang an ta, nin naihei khom faran om an ti.

²⁵“Ki mihei chu an inriang sika lâkai nen ritângin, lâkai inritângtu danghei angkan chu tho no roh, â pung ni ṭhîng rang ni mak.

²⁶Ni bungahei puan siakhamin ne rênin chu inî a tlâk ma ngêiin ni pêk kîr nôk rang a nit.

²⁷A zâl tikah a taksa tuam inlumna ranga a neisun a nit a, ni pêk kîr nôk non chu â lungzîngin ki ziang tiang hong ikhêk a ta, lungkhamna sip ki nit sikin kî sâm ngêt rang a nit.

²⁸“Pathian ne sîr insiat rang ni mak; nin chunga ruaitu kha vâni sâm no roh.

²⁹“Ni chimu ner tik zoi a, oliv riak ni sôm zoiin chu ni bu, ni uain neh ni oliv riakhei, ni ne pêk rang thillan khah ne peh zel roh. “Ni nai lutîr ipa khah ni ne pêk rang a nit.

³⁰Khangkah ngirin ni sial neh bera a te masatakhei khom khah ni ne pêk rang a nit, apuinu rinu sûn sarikah nêng a ta, a sûn iriatnin chu ni ne hong pêk rang a nit.

³¹“Ki mi nin nit a, nin rithiang rang a nit; khasikin, ramsa isêthat sa rêng rêng nin fâk rang ni mak a, ui nin pêk rang a nit.