Read Biete FESUAKNA 23 Bible Online

FESUAKNA 23 - Biete bible

FESUAKNA 23

¹“Milak thuthang isîr indar no roh; mi sual ithlopin thu dik ino ril no roh.

²Thil isual itho rangin chu mipui inhat ual khom seh zui no roh, milaka mi dang thiamno an inchangnaah khom ṭang no roh.

³Roirêlna munah mi inriang ithlei bîk no roh.

⁴“Ner sukpui sial manih, sakuartung manih â rô tlân ni mun chu a ziangah ni ṭhui ithlun pêk rang a nit.

⁵Ni mi nel tak khom ni seh a sakuartung khah a puakin a lei dela a nitin chu, sakuartung khah kâi ithoi nôk rangin ani khah ni san rang a nit, ni mâk rak rang ni mak e.

⁶“Mi inriang khah roirêlna munah a thu idik takkan ni ngaitua pêk rang a nit.

⁷Milakin mi no non la, mi thônchâina nei ino khah ni that rang ni mak; tukhom khangkana thil ṭhano tho murdi chu thiamno ki închang rang a nit.

⁸Fâkinrûk lah no roh, fâkinrûk khan thildika rithokin mit ân del ngai a, mi dikhei thu khom chanlamboiin a siam ngai.

⁹“Ram dang mi ni nuam ni lo rang ni mak, nang khom Aigupta ramah khan ram dang mi ni nit tâk a, a dengintheizia khom ni riat a nit.

¹⁰“Kum irukka sung ni loi khah chimu thon la, â vâng murdi ritik roh.

¹¹Khan a kum sarina kumin chu nen ôl rang a nit, khantaka mông farli khom îte ner tik rang ni mak e. Mi inrianghein an dong rang a nit; an ritik ban a la om chu izu vahei fâk rang a nit. Khangkah ngirin ni grep neh oliv bilhei khom ni tho rang a nit.

¹²“Sûn rukka sung sin thon la, a sûn sarinin chu ner ngam rang a nit; ni sialhei, ni sakuartunghei khom an ringam rang a nit. Ni bôinuhei, ni bôipahei neh nam dang rilofa sin ni înthohei khom an ringam rang a nit.

¹³“Nin zianga kî ti murdi hih uksak rei, pathian dang riming rêng rêng rilam no unla, an riminghei khom ching tlak no rei.

¹⁴“Ne chôiinrisângnan kumka sungin voi thumkah Kût mang rei.

¹⁵Abib thla, ki zoro khitah, Bairiam Kût mang unla, sûn sarika sung chol pol ino bairiam nin fâk rang a nit. Hingka zoroah hin Aigupta ram ata nin hong suak a; khasikin, ki maah tute kut korongin nin hong rang ni mak.

¹⁶“Thlâi thar lâk phut tenan Favâng Kût[19] mang unla, kum mong nin thil invâng murdi nin bûm zoi tikah Pôl Kût[20] mang sa ngai rei.

¹⁷Kum tin hi kût ṭum ithumka mang zoroah hin, nin lâia ipa rêng rêng PUMAPA nin Pathian maah nin hong rilang ngêt rang a nit.

¹⁸“Chol ipol ibai chu ki zianga ni thillan sa thisen neh khan ni lan rang ni mak. Ribôlnaa sa nî lan thâi khah atûk idênin ni sia rang ni mak.

¹⁹Kum tin nin loia thlâi râ masa, â ṭha ṭha khah PUMAPA ni Pathian inah ni hong chôi ngai rang a nit. “Berate manih, kêlte manih khah a nu rinutuiin ni suang rang ni mak e.

²⁰“Ringai roh, nin inzinna lampuia nangni vêng rang neh ki mun inkung nangni thlun rang a, nin maruaitu rang vântirtôn kî tir rang a nit.

²¹A thu ringai unla, a thu khah zôm rei. A chungah khan rihel no rei, khangkana thônchâina kha nangni zâ no nih; ani khah kî tir kêng ai nit.

²²A thu nin zôm a, ki thupêk murdi hi nin sina a nitin chu nin irâl, nangni doituhei idoitu nîng ki ti.

²³Ki vântirtôn khan nin ma iruai a ta, Amor mihei, Periz mihei, Kanan mihei, Hiv mihei, Jebus mihei ramah nangni ṭhui inlût a ta, anni khah kî that inrimang rang a nit.

²⁴An pathianhei khah ikhûnin chubai nin ûn rang ni mak a, an sakhua balam khom nin lâk rang ni mak e. An pathianhei khah nin isiatchit rang a nit a, an lungphun iserhei khom nin itôksiat riai rang a nit.

²⁵PUMAPA nin Pathian kha chubai nin ûnin chu bu neh ruatuiin ṭhat nangni vur ki ta, nin lâi ata natna inrikiang ki ti.

²⁶Nin ramah, nupang tukhomin naisia pai no ni a, richi rizang iboiin omno nih. Ring dam sôtnahei nangni kî pêk rang a nit.

²⁷“Nin fena ranga mihei khah rithlavâiin siam ki ta, lungâminvâiin om an ta, nin irâlhei chu nin matonah lâizâm inthông ki ti.

²⁸An lâiah khuaipui[21] tir ki ta; Hiv mihei, Kanan mihei neh Hit mihei chu ûm indar an ti.

²⁹Kumka sung zelin chu ûm isua vang no ning e; an suak vangin chu ram kha rong vang a ta, nangni inbuai rang ramsa an itam rai rang a nit.

³⁰A ram pumpui ilua zoi rang mi nin om mâkah chu ichîn chînkan kî ûm isua rang a nit.

³¹Nin ram chu Tuipui Sena rithoka Mediteranean tuikhanglian kâr neh, ramchâra rithoka Eufratis vadung kâr hi nîng a ti. Kha rama omhei chungah thuneina nangni pêng ki ta, nin hei inzar thiai pumin anni chu nin iûm isua vang rang a nit.

³²Anmani neh thu nin thlung rang ni mak a, an pathianhei khom nin itlângpui rang ni mak.

³³Nin ramah khan hi mihei hih nin in-om tlak rang ni mak; nin in-omin chu ki chungah thil isual nangni an însin rang a nit. An pathianhei chubai nin ûn duaiin chu nin ta rangin thina châng nangni chang pêk a ti.” a ti a.