Read Biete FESUAKNA 24 Bible Online

FESUAKNA 24 - Biete bible

FESUAKNA 24

¹PUMAPA khan Mosia ziangah, “Arona, Nadaba, Abihua hei neh Israelhei ruaitu sômsarikahei khah ki ziangah hongpui roh; ilah ianka ta dingin chubai ne ûn an ta, an hong nâi rang ni mak.

²Nangmah, Mosia chu, keimah PUMAPA maah, nangma khât bangin ni ne hong nâi rang a nit, mipui vâng chu itlâng ilua an hong lui rang ni mak,” a ti a.

³Mosia kha a zuang ṭum a, PUMAPA thupêkhei neh an rivong rang dân[22] ai rêl murdi khah â ril a, mi murdi khan, “PUMAPA iti murdi chu thông kin ti,” itin a rualin an sâm dûl dûl a.

⁴Mosia khan PUMAPA thupêkhei khah arziak suak riai a. Atûkah chu zîng takah a thoi a, itlâng bulah khan mâichâm a siam a, Israel nam zâkah lung sômleiinikah a phun a.

⁵Israel mihei lâia tlangvâl ṭhenkah kha a tir a, PUMAPA ziangah hâlrivâm thillan neh ringeina thillan serâtchalhei an lan a.

⁶Kha sa thisen arzâtkah kha Mosian a lâk a, tâborah a sia a; arzâtkah dang khah mâichâmah arthe a.

⁷Khanchu, Thuthlung riziakna bu khah a lâk a, mipui riat rangin iring takkan a tep a. Mipuihei khan, “PUMAPA thu zôm kin ta, a thupêkhei angkan thông kin ti,” an ti a.

⁸Khanungchu, Mosia khan thisen khah a lâk a, mipuihei kha arthe a, “Ringai rei, thupêkhei nangni a pêk lâia, PUMAPA thuthlung nangmani neh ai siam namindettu chu hi thisen hih a nit,” a ti a.

⁹Khante, Mosia, Arona, Nadaba, Abihua hei neh Israel ruaitu sômsarika hei khah itlângah an hang lui a.

¹⁰Israelhei Pathian khah an hang mu a. A ke nuaiah khan lungmantam safir idâp i-ang rivân angkana dumvîng a om a.

¹¹PUMAPA khan hi Israel ruaituhei chungah hin kut tlâk mak a; Pathian chu an hang mu a; khanungchu, munkan an fâkin an in a.

¹²PUMAPA khan Mosia ziangah, “Itlângah ki ziangah hong inla, ni mi ṭhuihei nen risei rang ki dân neh thupêkhei ker ziakna lungphêk inikah nang lei pêng ki ti,” a ti a.

¹³Mosia kha a thoi a, ama san ngaitu Josua khah a ṭhui a, Pathian omna tlângah khan a hang fe tâk a.

¹⁴Mosia khan Israel ruaituhei ziangah, “Kin zuang kîr nôk mâkah chu hi riabukah hin ne lei ngâk mai rei. Thubuai imanih â nei nin om khomin, Arona neh Hora hei nin ziangah an om a, anmani ziangah ithlun ngai rei,” a ti a.

¹⁵Mosia khah Sinai tlângah a hang fe tâk a, itlâng khah sûmin â bô khap a.

¹⁶PUMAPA roinpuina vâr ri-el khah itlângah a zuang ṭum a. Itlângsîpa PUMAPA roinpuina vâr ri-el khah Israelhei mitah chu itlâng chunga mei ichok angkah a nit. Sûm khan sûn rukkah sung itlâng khah â bô khap a, a sûn sarinin chu sûma rithokah khan PUMAPA khan Mosia khah a koi a.

¹⁸Mosia khah sûm kârah khan ilûtin, itlângah khan a hang fe tâk a, amakhan sûn sômilikah neh zân sômilikah a hang om a.