Read Biete FESUAKNA 25 Bible Online

FESUAKNA 25 - Biete bible

FESUAKNA 25

¹PUMAPA khan Mosia ziangah,

²“Israel naihei chu thilpêk ki zianga hong ilan rangin iril roh. An phal lam lama thilpêk an hong ichôi murdi chu lei lah pêk roh.

³Thilpêkhei chu: rângkachak hei, tangkarua hei, sumsen hei;

⁴puanzâi rimi hei, samul dum hei, samul senduk hei, samul seninlâr hei; kêl mula siam puan hei;

⁵bera vun ṭingsen inôk hei; savun iṭha chi hei; sitim thing hei;

⁶meisera chok rang riak hei; rithu rang riaknamhoi neh ihâl rang thil namhoi hei;

⁷thiampu zakorsîng[23] neh â ṭânga khop rang oniks lung neh lungmantam hei; a nit rang a nit.

⁸An ziangah ki om theina rangin mipuihei khan Puan-In rithiang an ne sin pêk rang a nit.

⁹Ki omna Puan-In chu a sung inrivo rang dân neh a in dûr nang ken en lam angka takin nin sin rang a nit.

¹⁰“Sitim thingin bôm, a dung mûk inikah neh artenkah, a khang mûkkah neh artenkah, arsâng dân mûkkah neh artenkah nin siam rang a nit.

¹¹A putiang neh a sungtiang rângkachak iṭha chiin inluan nin ta, a kôl chu rângkachak korongin nin tuam suak rang a nit.

¹²Rângkachakin vangkual ilikah siam unla, a ke ilikah khan ikhop unla, a kiang ruaikan inik nikan ikhop rei.

¹³Sitim thingin zônfunghei siam unla, rângkachak inluanin tuam rei.

¹⁴Zônfunghei khah bôm sîra vangkualheiah khan irôl seng seng rang a nit.

¹⁵Zônfunghei chu bôm vangkual sungah khan a kop mai rang a nit a, ilah suak rang ni tlak mak e.

¹⁶Lungphêk inikah, thupêkhei chuangna nang ki pêk rang khah a sungah seh roh.

¹⁷“Bôm sîng[24] rang a dung mûk inikah neh artenkah, a khang mûkkah neh artenkah, rângkachak iṭha chi mangin siam roh.

¹⁸Cherub rilim inikah, rângkachaka siam, ichera cher ngêt, a sîng môr kiangruaika seh rang siam sa roh;

¹⁹a sîng rângkachak neh a môr kiangruaika rângkachak Cherub rilim khah phêk khatka angkan a om rang a nit.

²⁰Cherubhei chu ma an risong rang a nit a, an rithla phar khan bôm sîng khah arkhû riai rang a nit.

²¹Bôm sungah khan lungphêk inikah nang ki pêk rang khah sian la; a sîngah khan rikhû roh.

²²Bôm bulah khan ritong ngai ei ta, Cherub inikah, Thuthlung Bôm chunga om kâra rithokin nang zuk isôn ki ta, Israelhei zianga thu ki pêk rang murdi khah nang zuk iril ngai ki ti.

²³“Sitim thing phêkin docham ni siam sa rang a nit; a dung mûk inikah a khang mûkkah, arsâng dân mûkkah neh artenkah ni riseh.

²⁴Rângkachak korongin inluan inla, a kôlhei khah rângkachakin tuam roh.

²⁵Bel ilika sa a kôlsîr a vêlkan siam inla, rângkachakin ni thlop rang a nit.

²⁶Rângkachakin arzônna rang vangkual ilikah siam inla, a kehei omna kil ilikah khan ikhop roh.

²⁷A zônfung rôlna rang vangkual chu a kôlsîr thlopna nuai viatah khan ikhop rang a nit.

²⁸Sitim thing ngirin zônfunghei siam inla, rângkachakin tuam roh.

²⁹Khênghei, bêl hei, uain kilât hei neh uain sungna berbu hei thillanheia mang rang rângkachak iṭha chi korongin ni siam rang a nit.

³⁰Docham chu Thuthlung Bôm bulah inṭhung rang a nit a, a chungah khan ki zianga lan ibai iser khah a om mai rang a nit.

³¹“Rângkachak iṭha korongin meiser ngul[25] iṭang sarika nei ni siam rang a nit. A ngul neh â ṭanghei chu ichera cher rang a nit a; a tui omna a lubôkhei, a vona pâr rimuam neh a pâr ipâr lemhei khah an rizom riai rang a nit.

³²A ngulpuia rithokin iṭang irukkah inṭhuam a ta, kiangruaikan iṭang ithum thumkah seng sengin.

³³Iṭang tinah khan a vona almon pâr rimuam neh â pâr tâk lem ithumkah chit a om rang a nit.

³⁴Meiser ngul dingpuiah khan a vona almon pâr rimuam neh â pâr tâk lem ilikah a om rang a nit.

³⁵Â ṭang chung ita neh nuai ita kârah khan pâr rimuam khatkah chit a om sa rang a nit.

³⁶Pâr rimuam lemhei, â ṭanghei neh meisersiana a dingpuihei khah rângkachak rithît infâi lûm khatka rithoka cher rang a nit.

³⁷Meiser ngul iṭang sarika lubôkhei kha ichok rangin siam inla, hang ichokin chu a maton tiang el riseh.

³⁸Meiser ichokna mang rang meichep neh meirivâm siana khêng rângkachak rithît infâiin siam roh.

³⁹Meiser siana neh a mangrua danghei siamnan rângkachak rithît infâi her sômithumka ringakah ni mang rang a nit.

⁴⁰Itlânga arlim nang ki în-en angka taka siam rangin ner dîn rang a nit.