Read Biete FESUAKNA 26 Bible Online

FESUAKNA 26 - Biete bible

FESUAKNA 26

¹“Puan-In rithiang, ki omna Puan-In[26] sung tiang chu patzâi rimi tlûr, samul a dumpôl hei, a senduk hei neh a sen inlâr heia không, Cherubhei rilim enihoi taka zep puan sômkah imangin sin roh.

²Puan phêk tin kha artia nat rang a nit, mûk sôminika iriatka sei, a khang mûk ilika sei a nit rang a nit.

³Phêk ringakah kha iṭhui inrikop inla, a dang phêk ringakah khom kha ṭhui inrikop sa ngir roh.

⁴Phêk ringaka ṭhui inrikop sîrmôr kôlah khan â kuar, pat dum irual, ikhop chang chang rang a nit.

⁵Ikuar sômringaka seng seng, ridîn bang bangka khop rang a nit.

⁶Â kuar neh â kuar rithil inrimanna rang rângkachak kuaikim sômringakah siam inla, amah khan puan ṭhui inrikop inikahei kha rithil inrizom roh; khanchu, Puan-In kha puan phêk khatka siam chang tâng a ti.

⁷“Puan-In chung rang kêl mul puan phêk sômleikhatkah ikhông rang a nit.

⁸Kêl mul puan kha artia nat rang a nit, mûk sômithumka sei, a khang mûk ilika lian a nit rang a nit.

⁹Samul puan ringakah kha ṭhui inrikop rang a nit a, a dang irukkah khom khah a rana ṭhui inrikop rang a nit. Phêk irukka ṭhui inrikop khah Puan-In maton tiang izar rang a nit a, a kôl tak phêk kha ithlep rang a nit.

¹⁰Ṭhui inrikop sîr môr kôlah khan â kuar sômringakah, inrân tarkan ikhop inla, â kuar sômringaka dang kha ṭhui inrikop dang môrah khan ikhop sa roh.

¹¹Sumsen kuaikim sômringakah siam inla, amakhan rithil seng seng inla, Puan-In idâng chu phêk khatkah ai nit rang a nit.

¹²Puan-In nungtianga a chung rikhûna puan ilor kha chu rikhâi mai riseh.

¹³Puan-In sîr tiang seng senga mûk mûkka a chung rikhûna zuang ilor khom kha rikhâi ṭian mai riseh.

¹⁴“A chung inrithua sâna rang bera vun ṭingsen inôk neh savun iṭha chi[27] mangin siam sa roh.

¹⁵“Puan-In bang sungna rang sitim thing inribu roh.

¹⁶Mûk sômka risâng, a khang mûkkah neh artenka lian siam inla,

¹⁷thing ni înribu tinah khan arzomna ranga rilûtmat thei a kuat inikah a keah khan ri-ang bangkan inrizui inla, a bulah a zurkuat tikin a danghei neh an rikopzan thei rang a nit.

¹⁸Sim tiang banga rang khangkana thing inribu khah sôminikah siam inla,

¹⁹a bul ringatna, a kôl ilor zur phunna rang tangkarua tlin ihol inthûk sômilikah an nuaia om rang siam roh. A ke zu lor tin nuaiah khan a kuat inika lûtna rang tangkarua hol inthûk inikah a kop chit rang a nit.

²⁰Puan-In mâr tianga tung rang khangkana thing inribu khah sôminikah siam sa roh,

²¹a ke zu lor riphunna rang tangkarua tlin hol inthûk sômilikah siam inla, a ke zu lor ikipah inika kop chitin siam roh.

²²Tlâk lam isonga Puan-In inungtianga rangah khan banga tung rang thing inribu irukkah siam inla,

²³inikah kha â kilheia rang nîng a ti.

²⁴Â kila tung ranghei kha chu a bul ata a sîp idênin kil inriman riai rang a nit a, â kil banga rang kha chu khangkana kil inrizom rang a nit.

²⁵Khaangkan a rêngkan thing inribu khah iriatkah nîng a ta, a bul iṭhungna chit rang khom tangkarua tlin hol inthûk sômleiirukkah om a ta, a ke zu lor ikipah inikah chit a om rang a nit.

²⁶“A bang tung indet rang, bangru, sitim thing thluan sômleiringakah siam inla, a kiangbang tinah bangru ringa ngakah om chit sela,

²⁷â nung tiang ringakah, a sîr tiang seng sengah khan ringa ngakah om riseh.

²⁸A lâia bangru khan Puan-In zuartluan khah a sua thal rang a nit.

²⁹Thing inribu ngul khah rângkachaka tuam rang a nit a; ân rizom rikopna rang bangru khopna rang rângkachak vangkual isiam sa rang a nit, a bangruhei khom rângkachak ngira tuam rang a nit.

³⁰Puan-In chu itlânga arlim nang ki în-en angka thapah khan nen ding rang a nit.

³¹“Chontana zar rang patzâi rimi tlûr, samul a dumpôl hei, a senduk hei, a seninlâr heia khôngin Cherub rilimhei izepin siam roh.

³²Rângkachaka tuam sitim chopui ilikah siam inla, a ṭhungna rang tangkarua tlin siam sa roh. Chopuiah khan thil ikhâina rang kuaikim siam inla, amakhan puan kha zar roh.

³³Puanzâr chontan sungah khan Thuthlung Bôm a sunga lungphêk inika om khah sian la, puanzâr chu Mun Rithiang tak neh Mun Rithiang inṭhenna nîng a ti.

³⁴Thuthlung Bôm chu a sînga khan sîng inla, Mun Rithiang takah khan seh roh.

³⁵Mun Rithiang tak putiang docham kha mâr tiang pangah sian la, meiser siana khah sim tiang pangah khan seh roh.

³⁶“Puan-In ikota zar rang patzâi rimi tlûr samul a dumpôl hei, a senduk hei neh a seninlâr hei enihoi taka không a nit rang a nit.

³⁷Kha zarna rangah khan sitim thing chopui ringakah rângkachaka tuam, â ṭhungna sumsen hol inthûk neh puan ikhâina rang thil rikim rângkachakin ni siam sa rang a nit.