Read Biete FESUAKNA 27 Bible Online

FESUAKNA 27 - Biete bible

FESUAKNA 27

¹“Mâichâm, kil ilika nei, a dung neh a khang mûk ringa ngakah, a dung neh a khang ri-el bak sitim thingin siam inla, mûk ithumka risâng a nit rang a nit.

²Â kil tinah arki a lor chit rang a nit, mâichâm neh khan an rizom riai rang a nit; a pumkan sumsena tuam vang rang a nit.

³Rivut bêlhei, rivut luakhei, tâborhei, meichephei neh meiluakkhênghei sumsenin siam roh.

⁴Sumsen thluan inribu, a pangah khan ikhop zit inla, â kil ilikah khan rizônmun vangkual sumsena siam kha ikhop roh.

⁵Mâichâm inlâina ten â huap theina rangin sumsen thluan inribu khah mâichâm irei nuai takah ikhop roh.

⁶Zônfunghei sitim thingin siam inla, sumsenin tuam inla,

⁷zônfung inika khah mâichâm panga vangkualheiah khan rizôn zoro fengin irôl ngai rang a nit.

⁸Mâichâm bangah thingphêk ikhop inla, a sung chu rikua riseh; itlâng chunga arlim nang ken mu lam takkah khan ni siam rang a nit.

⁹“Ki omna Puan-In chu rikul isung khap rang a nit. Sim tiangah khan patzâi rimi tlûra không puan mûk rizaka sei ni sung rang a nit.

¹⁰Sumsen icho sôminika neh ân ṭhungna sumsen phêk sôminikah a om sa rang a nit. Chopui a khan puanzâr ikhâina rang kuaikimte neh a zarna rang thil thluan, tangkaruaa siam ikhop sa rang a nit.

¹¹Puan-In mâr tiang pangah khom puan mûk rizaka sei ni sung sa rang a nit a, icho sôminikah neh ân ṭhungna sumsen phêk sôminikah, puanzâr ikhâina rang kuaikimte neh a zarna rang thil thluan, tangkaruaa siam a om sa ngir rang a nit.

¹²Tlâk lam tiang khom mûk sômringaka sei puan isung rang a nit a, chopui sômkah neh ân ṭhungna sômkah a om rang a nit.

¹³Sua lam, â kot omna tiang khom, arkulna khah mûk sômringaka sei a nit rang a nit.

¹⁴Lûtna rang ikot om a ta, ikot sîr tiang khah kiangruaikan puanzâr mûk sômleiringaka sei seng seng izar rang a nit ta, chopui ithumkah neh ân ṭhungna ithumkah a om sa rang a nit.

¹⁶A lûtna kotbâia zar rang patzâi rimi tlûr, samul, a dumpôl hei, a senduk hei a seninlâr heia không, enihoi taka a zia zep, puan mûk sôminika sei a om rang a nit a; a zarna rang chopui ilikah, â ṭhungna nei chit a om sa rang a nit.

¹⁷Rikul sungna chopui murdi khah tangkarua thluana inriman rizom riai rang a nit; puan zarna rang kuaikimtehei kha tangkaruaa siam a nit rang a nit a, a bul iṭhungnahei kha chu sumsena siam a nit rang a nit.

¹⁸Rikul sung chu a dung mûk rizakah, a khang mûk sômringakah, arsâng dân mûk ringakah nîng a ta, a puanzâr chu patzâi rimi tlûr ikhông nîng a ta, icho ṭhungna chu sumsena siam a nit rang a nit.

¹⁹Puan-In sinna mangrua murdi, â kilnahei, arkul idâi indetna hêmfunghei khah sumsena siam korong a nit rang a nit.

²⁰“Meisera chok rang oliv riak rithît infâi hong ichôi rangin Israel naihei chu iril roh; meiser khah kholoi tin bat dêt iloia chok rang a nit.

²¹Arona neh a naihei khan Puan-Ina Thuthlung Bôm omna puanzâr putiangah khan meiser chu seh sela, kholoia rithokin zîng idênin PUMAPA maah khan ichok riseh. Hi thupêk hih Israel mihei neh an richi suanpâr ten khan tho dân balam idetin an nei rang a nit.