Read Biete FESUAKNA 28 Bible Online

FESUAKNA 28 - Biete bible

FESUAKNA 28

¹“Ni u, Arona chu a nai Nadaba, Abihua, Eleazara, Ithamara hei neh koi inla, Israel mihei lâi ata ki thiampu rangin khâi inran roh.

²Ni u, Arona hâk rang thiampu zakorfual, amah marit inlo rang neh â votu rang siam pêk roh.

³Kutithiam, suakpui kutthiamna nei nang kî pêkhei khah mang inla, Arona hâk rang thlukthla siam pêk sela, ki sin itho ranga thiampua serinran ai nit rang a nit a.

⁴Hi thlukthlahei hih an siam rang chu a nit: ṭângvêl hei, efod hei, zakorfual hei, sunglût zakoṭial hei, lukôm hei neh kongkhit hei, ni u Arona neh a naipahei ihâk rang thiampu zakuahei hih siam sela; khanchu, ki thiampu sin an itho rang a nit.

⁵Kutithiam lôm khan rângkachak zâi hei, pat zâirimi hei, samul a dumpôl hei, a senduk hei, a seninlâr hein puan an không rang a nit.

⁶“Efod khah rângkachak zâi hei, pat zâi rimi tlûr hei, samul a dumpôl hei, a senduk hei, a seninlâr hei inripola voa enihoi takka không rang a nit.

⁷Dârbât inikah, â nungtiang neh â matianga kop, ribât riman mat theina rang siam riseh.

⁸Konga khit indetna rang efod zakua môrah khan efod puan angkah taka zia enihoi tak, không rizom rang a nit.

⁹Oniks lungmantam inikah lan la, Israela richi nam sômleiinika riming iholin riziak inla,

¹⁰A ûnlian indônin lung khatkatah iruk rukka riming iholin ner ziak rang a nit.

¹¹Mi kutthiamhei inhol inla, an îholah khan rângkachakah phûm riseh.

¹²Lungmantam inikah kha Efod dârbâtah khan Israel nam sômleiinika riat maina rangin ikhop inla, Arona khan PUMAPA maah an riming khah dârbâtah khan ribât sâng a ta, Israel namhei chu kî riat suak mai ngai rang a nit.

¹³Lungmantam ikhopna rang rângkachak inikah siam inla;

¹⁴rângkachak rithît infâi imangin zingziri rirual siam san la, â khopnaah khan ikhop roh.

¹⁵“Pat zâirimi tlûr, samul, a dumpôl hei, a senduk hei, a seninlâr hei neh rângkachak zâi hein efod angkana không, Pathian isôn zoroa thiampu ṭânga vêl rang patpuan ithiamhei khah zia enihoi takkan inkhông roh.

¹⁶Thlep inla, thlep tenan kil ilika nei, khâp khâpka ri-el bang ni riseh.

¹⁷Lungmantam rân ilika khopna rang siam inla, a rân khatnaah khan rubi lung hei, topaz lung hei, garnet lung hei om sela;

¹⁸a rân iniknaah khan emeral lung hei, safir lung hei, daimon lung hei om sela;

¹⁹a rân ithumnaah khan tarkois lung hei, Ageit lung hei, Amethis lung hei om sela;

²⁰a rân ilinaah khan beril lung hei, oniks lung hei, Jaspar lung hei om riseh; kha lungmantamhei khah rângkachak phêka khop riai rang an nit.

²¹Lungmantam khatkah khan Israel nam sômleiinikahei lâia khatka riming ihola riziak chit rang a nit a, kha lungmantam sômleiinikah khan Israel nam sômleiinikah ai entîr rang a nit.

²²Ṭângvêl ikhâina rang rângkachak rithît infâi korong zingziri rualin siam inla,

²³rângkachak vangkual inikah, ṭângvêl môra khop rang siam sa roh.

²⁴Zingziri rual môr inikah chu ṭângvêl môra vangkualah khan ikhop rang a nit.

²⁵A môr inikah khah, lungmantam inika khopnaah khan ikhop inla, efod dârbât neh rizom riseh.

²⁶Efod kôl, ṭângvêl sungtiang môrah khan rângkachak vangkual inikah ikhop sa roh.

²⁷Efod dârbât ikhopna ridîn, Efod khuap indetna zia enihoi taka không môrah khan rângkachak vangkual dang inikah ikhop sa roh.

²⁸Ṭângvêl neh efoda rângkachak vangkual chu pat dumpôl irualin isui inrizom inla, ṭângvêl kha kong ridînah khan det mat sela, arthîn diai rang ni mak e.

²⁹“Mun rithiangah Arona kha a hong lûtin ṭângvêl, Israel namhei riming chuangna khah a hong ribel rang a nit; amakhah, keimah PUMAPA hi, ki mihei nen reh suak ngaitu nîng a ti.

³⁰Efod zakuaah khan Urim neh Thumim[28] kha sian la, keimah PUMAPA hi, ne sôn ranga a hong fengin, Arona lung ridîn takah khan a om ngai rang a nit. Khangkana Arona a hong fengin Efod khah ihâk ngai a ta, Israel mihei ranga ki nuamlam chu rianfel thei ngai a ti.

³¹“Efod nuaia hâk rang zakorfual chu samul dumpôl koronga không rang a nit.

³²Ân lâinah lu thunna rang inrikua rang a nit a, lu thunna rikua khah a ṭet nona rangin a môr khah ikîm rang a nit.

³³A zakorfual môrah khan samul a dumpôl, a senduk neh a seninlâr heia siam theisen rilim neh rângkachak selniang kâr rithlâkin a vêlkan ikhop rang a nit.

³⁵Amakhah thiampu sin a tho zoron Aronan â hâk ngai rang a nit. Mun Rithiangah PUMAPA maah a lûtin manih a suakin manih selniang khah irî ngai a ta, thi mak iti ireh thei ai nit rang a nit.

³⁶“Rângkachak rithît infâi phêkah khan, ‘PUMAPA ta ranga serinran,’ iti riziak inchuang roh. Namindetna kutsabit ihola an irziak ngai angkan iholin riziak rang a nit.

³⁷Thiampu lukôm matiangah khan ikhop inla, pat dumpôl irualin khuap roh.

³⁸Arona khan lukôm neh khan â chalah a khim ngai rang a nit; khanchu, keimah PUMAPA hin Israelhei ribôlna thil ki zianga an hong ilan chu lei iham ki ta, thil lannaah khan thônchâi an nei khomin Arona khan a mo ai pêl rang a nit.

³⁹“Arona hâk rang, sunglût zakua hei, a kôm rang lukôm hei, pat zâirimia không rang a nit; a kongkhit rang khom pat zâirimia không rang a nit, a vona enihoi taka zep rang a nit.

⁴⁰“Zakorfual hei, kongkhit hei, lukhum hei, Arona naipahei rang khom siam pêk sa roh; marit inloa, â votu ni riseh.

⁴¹Ni u Arona neh a naipahei chu inhâk inla, ki sin itho ranga thiampu inih rangin oliv riak inrithun la, lan inla, serinran roh.

⁴²Pat zâirimia không, tuman siam pêk sa roh, a malpui idêna rifual ni riseh; khanonchu, ilang duai a ti.

⁴³Arona neh a naihei khan Puan-Inah an hong lûtin manih, Mun Rithianga om mâichâma thiampu sin itho ranga an hongin manih, amakhah an ribun ngêt ngai rang a nit; an ithup khah â lang duaiin chu an ithi rang a nit. Amahih Arona neh archihei rangin kumkho tho dâna an mang rang a nit.