Read Biete FESUAKNA 29 Bible Online

FESUAKNA 29 - Biete bible

FESUAKNA 29

¹“Ki sinthonaa thiampu sin itho rang chu hingka hin serinran rang a nit; Arona neh a naihei khah hingka hin ni serinran rang dân chu a nit; Serâtchal tuai khatkah neh berachal inikah, demnaboi, kâi inla,

²Chol pol ino ibai hei, oliv riaka met ibaithliam hei, siriak inâl ibaithliam riphân hei, ibaidi ṭhatak imangin siam roh.

³Khahei khah kok sungah thun inla, serâtchal neh berachal inikah ni lan tikin ki ziangah ni hong lan sa rang a nit.

⁴“Arona neh a naipahei khah ki omna Puan-In kotbulah hong ṭhui inla, dân angkan rithârna tui risil riseh.

⁵Arona chu thiampu thlukthla zakorfual hei, efod zakua hei, efod sunglût zakorfual hei, ṭângvêl hei, kongkhit heiah khan rivo riseh.

⁶‘PUMAPA ta ranga serinran,’ iti kopna lukhum khah inkhum sa roh.

⁷Rithu rang piala siam oliv riak khah lan la, a lua buak inla, inrithu roh.

⁸“Arona naipahei khom hong sela, zakuahei inhâk inla;

⁹kongkhithei ikhitin lukhumhei khah inkhum sa roh. Ama angka takah khan Arona neh a naipahei khah thiampun ni namindet rang a nit. Khanchu, anmani neh an richihei khah kumkhuakan thiampu an hong init rang tâk a nit.

¹⁰“Serâtchal tuai khah ki omna Puan-In tualah hong kâi unla, Arona neh a naihei kha serât lu-ah khan an kut ringat rangin iril roh.

¹¹Puan-In kotbulah ki maah serâtchal chu that roh.

¹²Sechal thisen khah lan la, mâichâm kil rikîheiah khan kutṭimin nâl inla, a bân la om khah mâichâm bulah bunsuak roh.

¹³A sungkua tuamtu thâi murdi hei, â thin tlin ṭhatna tak hei, â bêhei neh â tuamtu a thâihei khah lan la, sual ribôlna rangin mâichâmah hâl inrivâm roh.

¹⁴Khanniseh, a sa hei, a vun hei, a sungkua hei kha chu dâiputiang hâl inrivâm roh. Sual ribôlna thillan a nit a, hâl inrivâm riai rang a nit.

¹⁵“Berachal khatkah khah kâi inla, Arona neh a naihei khah a lu-ah khan an kuthei ringat rangin iril roh.

¹⁶That inla, a thisen khah mâichâm rikhîlkan rithe kual roh.

¹⁷A sa chu richan nôi inla, a sungkua neh a kehei kha chu risûnfâi inla, a lu neh a sa lek danghei chungah khan seh roh.

¹⁸A rêngka khan mâichâmah hâl inla, PUMAPA ta ranga hâlrivâm thillan a nit, ama thillan inam khan PUMAPA lung a întluk ngai a nit.

¹⁹“Berachal khatkah khom khah kâi inla, Arona neh a naihei khah a lu-ah khan an kuthei ringat rangin iril roh.

²⁰That inla, a thisen khah Arona neh a naihei ikuar changtiang zâmzâheiah, an kut changtiang kutpui môrah neh an ke changtiang kepui sîpah nâl inla, a bân la om kha chu mâichâm rikhîlin rithe kual roh.

²¹Mâichâma thisen hei, rithu ngai oliv riak hei khah a ṭhen lan la, inripol inla, Arona khah a silbomhei neh khan rithen la, a naihei khom an silbomhei neh khan rithe roh. Khanchu, Arona neh a naihei kha an silbomhei neh a rêngkan ki ta ranga serinran ni tâng an ti.

²²“Bera thâi hei, armei thâi hei,[29] a sungkua tuamtu thâi hei, â thin lûm ṭhatna tak hei, â bêhei neh â tuamtu a thâi hei neh a malpui changtiang khah lan la,

²³ibai ilan, khamlua om khah a chi rikip chitin, chol pol ino bairiam khatkah, oliv riaka met ibai thliamkah, siriak inâl ibaithliam riphân khatkah lan la,

²⁴khahei murdi khah Arona neh a naipahei kutah pen la, ki ta rang thilpêk ranbîka chôiin lan riseh.

²⁵An kuta rithokin la nôk inla, mâichâma hâlrivâm thillan chungah khan sian la, PUMAPA ta rangin hâl inrivâm roh. Â nam kha PUMAPA ta ranga namhoi a nit.

²⁶“Bera lung-er khah lan la, PUMAPA maah thilpêk ranbîkin[30] lan roh; amakhah ni dongtum rang a nit.

²⁷Thiampu phun indet zoron thiampu namindetnaa mang berachal lung-er neh a malpui khah thilpêk ranbîkin lan unla, thiampuhei dongtum rang a nit.

²⁸Israel naihein ringeina thillan an lanin, a lung-er neh a malpui kha chu kumkhuaka thiampuhei dongtum rangin ki înkung a nit. Amakhah mipui thilpêk kî dong chu a nit.

²⁹“Arona thiampu thlukthla hih amah a thi tenan chu a naihei kutah ilan rang a nit, thiampu sin itho ranga serinrannaah an ihâk mai ngai rang a nit.

³⁰Arona nai, ama rithûla thiampua namindet khan sinitho ranga ki omna Puan-In Mun Rithiangah a hong zoron sûn sarika sung chu â hâk rang a nit.

³¹“Thiampu phun indetnaa nin imang berachal sa khah Mun Rithiangah but roh.

³²Arona neh a naipahei khan ki omna Puan-In kotbulah, khamlu sunga ibai ilan la om neh khan a sa khah fah riseh.

³³Anmani namindetnaa sual ribôlna sa khah anmani bangin an fâk rang a nit; khalai rithiang a nit a; thiampuhei bangin an fâk rang a nit.

³⁴Â sa neh ibai khah fâk bân a omin chu zîngah ihâl rang a nit, sa ser a nit a, a ṭhing khah ifah rang ni mak.

³⁵“Thu nang kî pêk angka khan Arona neh a naihei khah sûn sarika sung ni serinran rang a nit.

³⁶Sûn tin, sual ribôlnan, serâtchal khatkah lan ni ta, sual ribôlna khah ilanin mâichâm khah thâr ni ta; khanchu, oliv riak inôt ni ta, ni thâr inrithiang rang a nit.

³⁷Khangkah khan sûn sarika sung, sûn tin thông ni ta; khanchu, mâichâm khah hong rithiang liai tâng a ta, miriam manih, îthil dang manih khomin â tôn murdi chu arthiangna ritha sikah khan an ituang[31] rang a nit.

³⁸“Mâichâmah khan nin tin bera kumka vêla ulian inikah ni lan ngai rang a nit.

³⁹Zîngah khatkah lan ni ta, kholoiah a dang khatkah ni lan ngai rang a nit.

⁴⁰Bera khatkah lan ruala khan ibaidi ṭha chi herkah neh oliv riak rithît liai litarkah ni lan rang a nit a; kha thillan rualin uain ibuak rang litarkah ni lan sa rang a nit.

⁴¹Kholoi tiang bera khatkah lan rual khomah khan ibaidi ṭha chi hei, oliv riak hei, uain hei khom zîng tianga lan zâkah ngir khah ni lan nôk rang a nit. Amahih fâknêk thillan, keimah PUMAPA zianga thillan chu a nit a, a kâng inam chu ai hoi a nit.

⁴²Ritongna Puan-In kotbâia hâlrivâm thillan khah kumkhuakan nin lan mai rang a nit. Amahin a nit ki mihei zuang ritongpui ngai ki ta, nangni ki îsôn ngai rang a nit.

⁴³Amakhan Israel mipui ritongpui ngai ki ta, ki roinpuina vâr ri-el khan mun rithiangin siam a ti.

⁴⁴Puan-In neh mâichâm kha inrithiang ki ta, ki sinitho thiampu rangin Arona neh a naihei chu serinran ki ti.

⁴⁵Israel mihei lâiah khan om ki ta, an Pathian nîng ki ti.

⁴⁶An lâiah ki om theina rangin Aigupta rama rithokin ki ṭhui suak a, kha anmani ṭhuiisuatu PUMAPA an Pathian khah ki nit iti reh tâng an ti. Keimah hi PUMAPA an Pathian chu ki nit hih.