Read Biete FESUAKNA 3 Bible Online

FESUAKNA 3 - Biete bible

FESUAKNA 3

¹Sûnkah chu Mosia khan a tarpu, Midian thiampu Jethroa kêlhei neh berahei ienkol a, ramchâr thlang tiang ân lêng a, Pathian itlâng, Horeb kha a va tlung a.

²Kha munah khan PUMAPA vântirtôn kha a ziangah, sûlribukah meichokin a zuang inlâr a, a hang en a sûlribuk kha a chok luai luai a; khanniseh, kâng rivôm mak a.

³Mosia khan, “Va fêng ki ta, thil rikhêl kî mu soh la va en ngân rong, ingkan im sûlribuk soh a kâng rivôm thei tlak no,” a ti a.

⁴Ien ranga a va fe khah PUMAPA khan a mu a, sûlribuka rithokin Pathian khan, “Mosi, Mosi,” a ti a. Mosia khan “Hin ki om,” a ti a.

⁵Pathian khan, “Hong nâi no roh; ni pheikok kha khêng roh, ne dingna mun kha mun rithiang a nit,” a ti a.

⁶Amah ngirin, “Keima hi ner chibulhei Pathian ki nit hih: Abrahama Pathian, Isaka Pathian, Jakoba Pathian chu ki nit,” a ti a. Khanchu, Mosia khan Pathian en ngam mak a, a mâi a thup tâk a.

⁷PUMAPA khan, “Aigupta rama om, ki mihei tuang natinsatzia kî mu mai a nit; anmani sininthotuhei sika an ikhêk irî khom ki lei riat a.

⁸Aigupta mihei kut ata kêlisua rangin kî zuang a nit; kha ram ata khah ṭhui suak ki ta, ram iṭha tak neh rizat tak, dût neh khuaitui luangna ramah kî ṭhui inlût rang a nit; Kanan mihei, Hit mihei, Amor mihei, Periz mihei, Hiv mihei, Jebus mihei, omna ramah khan.

⁹Ringai roh, atûnah hin Israel naihei ṭap irî ki ziang a hong tlung a, Aigupta mihein nuaisia taka deng an inthei dânhei khom kî mu a nit.

¹⁰Khasikin, atûnah hin ki mi Israelhei Aigupta rama rithoka hong ṭhui isua rangin Faroa ziangah nang kî tir a nit hih,” a ti a.

¹¹Khannisela, Mosia khan Pathian ziangah, “Tûm ki nit a, ingkan im Faroa ziangah ki fe a, Aigupta rama rithoka Israel naihei ki hong ṭhui suak thei rang a?” a ti a.

¹²Pathianin a sâm a, “Nang ompui mai ki ti, khante, nang kî tir a nit ngêt iti ni ta ranga risinsiana chu amahih nîng a ti: Aigupta ram ata ki mihei ni hong ṭhui suak tikah, hi tlângah hin Pathian chubai la hong ûn nin ti,” a ti a.

¹³Mosia khan Pathian ziangah, “Israel naihei ziangah ki fe tikin an ziangah, ‘Nin chibulhei Pathianin a ne itir a nit,’ tin lang, anni khan ‘Tûm ai nit?’ lei ti ta sela an ziangah khan im ki ti rang tâk?” a ti a.

¹⁴Pathianin Mosia ziangah khan, “OMAH ki nit[6] hih. Israel naihei ziangah khan, ‘OMAH khan a ne itir a nit,’ ti roh,” a ti a.

¹⁵Pathian ngirin Mosia ziangah, “Nangman Israel naihei ziangah khan hingka hin ni ti rang a nit, ‘PUMAPA, nin chibulhei Pathian, Abrahama Pathian, Isaka Pathian, Jakoba Pathian khan nin ziangah a ne itir a nit,’ ti roh. Kha riming khah ki kumtluang riming a nit a, thoithar la hong iom maihei khomin ama angka khan an ne riatmai rang a nit.

¹⁶Fen la, Israel ulianhei koibûm inla, an ziangah, ‘PUMAPA, nin chibulhei Pathian; Abrahama Pathian, Isaka Pathian, Jakoba Pathian kha ki ziangah a zuang inlâr a, nangni ki riat mai a, Aigupta rama deng nangni an inthei tliahei khom kî mu a nit.

¹⁷Aigupta rama intak nin tuangna ata nangni ṭhui suaka Kanan mihei, Hit mihei, Amor mihei, Periz mihei, Hiv mihei, neh Jebus mihei ram dût neh khuaitui luangna ramah nangni ṭhui inlût ki ti, a ti,’ ti roh.

¹⁸“Ki mihei khan ni ṭong ringai an ta; nangmah neh Israel ulianhei kha Aigupta rêng ziangah fêng nin ta, a ziangah, ‘PUMAPA, Hebraihei Pathian kha kin ziangah a zuang inlâr a; ramchârah, sûn thumka lamah PUMAPA kin Pathian ziangah ribôlna kin lan theina rangin nen fe roh,’ nin ti rang a nit.

¹⁹Khanniseh Aigupta rêng khan kut irât taka kar ni non chu nangni infe no nih iti kî riat thlâm a nit.

²⁰Nikhomsela, keiman ki kut ilek ki ta, thilrikhêl itam takkah an ziangah ki la sin ranghei imangin Aigupta mihei kuttum kî tho rang a nit. Kha rizoin chu nangni infe tâng a ti.

²¹“Aigupta mihei kha ki mihei iditsak rangin siam ki ta, nin fe suak tikah kut korongin fe no tin u.

²²Israel nupang tukhomin a bungtualbôma Aigupta mi neh an insunga nupang iomhei kha tangkarua neh rângkachaka siam rivonahei neh silbomhei nîng an ta, amakhan an naipahei neh an nainuhei inrivo an ta, khangkah khan Aigupta mihei kha nin îrok ai nit rang a nit,” a ti a.