Read Biete FESUAKNA 30 Bible Online

FESUAKNA 30 - Biete bible

FESUAKNA 30

¹“Sitim thingin namhoi hâlna rang mâichâm siam roh.

²Kil ilika nei, a dung neh a khang mûk mûkka ri-el bang, arsâng dân mûk inikkah ni sela, kil tinah arki lor om sela, thluankan rizom riai riseh.

³A chung richam hei, â kil ilikahei, arkihei khah rângkachak koronga inluan rang a nit a, a kôl khah rângkachaka tuam rang a nit.

⁴A zônfung rôlna rang rângkachak vangkual inikah siam inla, a sîr kiangtiang kiangtiang pangah khan a kôlsîr nuaiah khan ri-en bangkan ikhop roh.

⁵A zônfung chu sitim thing siam inla, rângkachakin ni tuam rang a nit.

⁶Hi namhoi hâlna mâichâm hih Thuthlung Bôm matona puanzâr rikhâi matiangah khan inṭhung roh. Amakhah nang ki zuang ritongpuina ngai mun rang a nit.

⁷Zîng tin, Aronan meiser a hong infâi malamin thil namhoi a hâl ngai rang a nit.

⁸Kholoiah khom, meiserhei a hong ichok rang khomin namhoi khah a hâl mai ngai rang a nit. PUMAPA zianga namhoi ihâl hih kumkhuaka itho mai rang a nit.

⁹Hi mâichâm chungah hin hâl ikhap thil namhoi hei, hâlrivâm thillan hei, farua thillan hei ni lan rang ni mak a, uain thillan khom ni buak rang ni mak.

¹⁰Kum tin, voikah, sual ribôlna thillan thisen khah, Arona khan, mâichâm thâr rithiangna rangin arki ilikah khan â nôt rang a nit. Kumkhuakan amahih kum tin voikah chu itho mai ngêt rang a nit; Hi mâichâm, keimah, PUMAPA zianga lan hih arthiang liai mai rang a nit.”

¹¹PUMAPA khan Mosia khah â sôn a,

¹²“Riteppui lâia mi tute an thi nona rangin Israel mihei kha zoroa ṭang murdi khan mahni ringna ritlanna an pêk rang a nit.

¹³Riteppuia ṭang murdîn an pêk rang zâk bituk chu an pêk ngêt rang a nit a, ki omna Puan-Ina mang ngai varna dik taka var sekel rizâtkah Gera sômkah[32] an pêk rang a nit. Amakhah PUMAPA zianga thillanin an pêk ngêt rang a nit.

¹⁴Riteppuia tep tâk, kum sôminikah neh a chungtianga mi rêng rêngin chu PUMAPA ziangah amahih an lan rang a nit.

¹⁵An ringna ritlanna PUMAPA zianga an lan zoroah khan sekel rizâtkah mi tinin an lan korong rang a nit; mi richongin a nêka tam a lan rang ni mak a, mi inriang khomin kha nêka roi khah an lan rang ni mak e.

¹⁶Israel mihei zianga rithokin hi ringna ritlanna sum hih rifuang inla, ki omna Puan-In enkolna rangin mang roh. Hi thilpêk hih ringna ritlanna ranga chôi a nit a, Israel naihei chu anmani sunghual rangin kî riat mai ngai rang a nit.”

¹⁷PUMAPA khan Mosia ziangah,

¹⁸“Sumsen tuibêl, â ṭhungna khom sumsen ngir siam inla, Puan-In neh mâichâm kârah inṭhung inla, tui seh mai ngai roh.

¹⁹Arona neh a naihei khan an kut neh an kehei amakhan an risûk infâi ngai rang a nit.

²⁰Puan-In sungah an lût rangin manih, thillan ihâl ranga an fen manih tuiah khan an kut neh kehei an risûk infâi rang a nit; khanchu, an ithi no rang a nit.

²¹An thi nona rangin an kut neh ke an risûk ngêt rang a nit. Amahih anmani neh an richihein kumkho dâna an hong mang mai ngai rang chu a nit.”

²²PUMAPA khan Mosia ziangah,

²³“Thil namhoi tak tak, Mura tui her irukkah, thîngthal namihoi her ithumkah, nithal namhoi her ithumkah,

²⁴Thinginrim her irukkah, ki omna Puan-Ina mang lâi hîllunga var korong kha la khôm inla, oliv riak litar ilikah neh inripol roh.

²⁵Siriak namhoi angkana siam namhoi inripol khah siriak rithiang, rinôt ngai rangin siam roh.

²⁶Ki omna Puan-In hei, Thuthlung Bôm hei,

²⁷docham neh a mangrua hei, meiser siana neh a mangrua hei, namhoi hâlna mâichâm hei,

²⁸thillan hâlna mâichâm neh a mangrua murdihei, risilna sumsen tuibêl neh â ṭhungna hei inôt nan amakhah mang roh.

²⁹Kha siriak khah khangkah taka nôtin hi thilhei hih thâr inrithiang inla, hong rithiang liai an ta, â tôn murdi chu arthiangna ritha sikah khan an ituang rang a nit.

³⁰Ki sinitho rangin Arona neh a naihei khah hi siriak hih inrithu inla, serinran roh.

³¹Israel mihei chu iril roh, Hi riak rithiang hih ki sinthotu rang serinran zoroa inrithu rangin imang kumkhua rang a nit.

³²Mi narân inrithu rang ni mak a; thil dang dang neh inripol rang dân zâk hi indanglam rang ni mak e; thil rithiang a nit a, nin ser vak rang a nit.

³³Hingkana inrithu ngai siriak neh thil dang inripol lei isiam sa manih, thiampu rua nino lei inrithutu manih chu ki Israel mihei lâi ata ṭhângsena vôr rang a nit.”

³⁴PUMAPA khan Mosia ziangah, “Hi thil namhoi Netep hei, Sekelet hei, Galbanum hei, Bero fâi hei rizât natkan lan la,

³⁵namhoia hâl rangin riak namhoi inripol angkan inripol roh, ân fâi a, ân rithiang rangin ichi ichîntekah tlâk sa roh.

³⁶A ṭhen kha suk indi inla, ki omna Puan-Inah khan ichôiin Thuthlung Bôm maah khan rithe roh. Hi namhoi ihâl rua hih thil rithiang taka bê rang a nit.

³⁷Nangmani mang rangin khangkah taka namhoi inripol khah nin siam rang ni mak; PUMAPA ta ranga ser rithiang a nit.

³⁸Mahni hâl rang khangkana namhoi inripol isiamtu rêng rêng chu ki mihei lâi ata ṭhângsena vôr rang a nit.”