Read Biete FESUAKNA 31 Bible Online

FESUAKNA 31 - Biete bible

FESUAKNA 31

¹PUMAPA khan Mosia ziangah,

²“Uria naipa Bezalela, Hora tupa Juda nama mi khah ker thlang tâk a,

³Vârna hei, riatna hei, lungvâr hei, thil tinrêng isiam ranga kutthiamna hei inei rangin ki sinthotheina[33] ritha kî pêk tâk a nit.

⁴Thil enihoi rang ingaitua suak a, rângkachak hei, tangkarua hei neh sumsen heia siam zel thiamna hei,

⁵lungmantam ihola khop hei, thing isin hei, thil enihoi chi tinrêng siam thiamna hei kî pêk a nit.

⁶Ama ṭangpui rangin Dan nama mi Ahisamaka naipa Oholiaba ki irthlang sa tâk a nit. Kutthiam danghei khom, isiam ranga kî ti murdi siam thiamna kî pêk sa tâk a nit.

⁷Puan-In sin an ta, Thuthlung Bôm neh a sîng hei, Puan-In tinmatua murdi hei,

⁸docham neh a mangrua hei, rângkachak koronga siam meiser siana neh a mangrua hei, namhoi hâlna mâichâm hei,

⁹Thillan hâlrivâmna mâichâm neh a mangrua hei, risûk infâina tuibêl neh â ṭhungna hei,

¹⁰Arona neh a naipahei thiampu sin an tho zoroa an ihâk rang thiampu thlukthla roinpui hei,

¹¹thiampu namindetnaa inrithu ngai siriak hei, Mun Rithianga namhoi ihâl rang hei an siam rang a nit. Thu nang ki pêk lam angka takin hi thilhei hih an siam rang a nit.”

¹²PUMAPA khan Mosia khah â sôn a,

¹³“Israel mipuihei iril roh: Ki Sabatnî hih an ser rang a nit, nin richi suanpâr la hong iom thiai ranghei ten khomin keimah PUMAPA hi, nangmani rithlang suaktu ki nit iti nin riat maina rang a nit.

¹⁴Sabat nî hih nin ta rang nikhua rithiang a nit a, nin ser ngêt rang a nit. Mi tukhom ser iloia kha nikhuaa sinitho murdi chu ithat rang a nit.

¹⁵Mahni sin ithona rangin sûn rukkah reng nin inei a nit a, a sûn sarina hi chu ringamna rang, PUMAPA nikhua rithiang a nit. Tukhom kha nikhuaa sinitho kangân chu ithat ngêt rang a nit.

¹⁶Israel mihei khan anmani neh keima kâra thuthlung an riat maina rangin kumkhuakan an ser mai rang a nit.

¹⁷Keimah neh Israel mihei kin kâra thuthlung risinsiana det nîng a ti; Keimah PUMAPA hin sûn rukka sungin rinêng neh rivân ki siam zoi a, a sûn sarinin chu sin ki mong a, ki irngam a nit,” a ti a.

¹⁸Pathianin Sinai tlânga Mosia â sôn zoiin chu, a thupêk, amah Pathian ngêiin lungphêk inika a irziak khah Mosia ziangah khan a pêk a.