Read Biete FESUAKNA 32 Bible Online

FESUAKNA 32 - Biete bible

FESUAKNA 32

¹Mosia khah itlânga rithokin zuang ṭum vak khâi mak iti an mun chu mipuihei kha Arona ziangah an hong ribûm a, a ziangah, “Tho, ne ruaitu rang pathian ne siam pêk roh; Aigupta rama rithoka ne ṭhui suaktu Mosia lakah hih im a thurchi ai nit tâk reh khâi mang ung a,” an ti a.

²Arona khan an ziangah, “Nin nupuihei, nin naipahei neh nin nainuhei rângkachak kuarbet an ibethei khah inrima unla, ki ziangah hong chôi rei,” a ti a.

³Khangkan mi murdi khan an rângkachak kuarbethei khah an inrima a, Arona ziangah an hong chôi tâk a.

⁴Ani khan a lei lâk a, rângkachak khah ân zôi a, a sung mun ai siamah khan serâttete achal rilim ân luan tâk a. Mihei khan, “O Israel mihei, amahih Aigupta ata nangni hong ṭhui isuatu pathian chu a nit,” an ti a.

⁵Amakhah Aronan a riatin chu, rângkachak serâtte maah khan mâichâm a siam a, “Naktûkah PUMAPA chôiinrisângna ruai iṭhe nîng a ti,” itin ân puang a.

⁶Atûk zîngah khan hâlrivâm thillan an lan a, ringeina thillan khom an lan sa a. Mipuihei khah ruai rikhîl rangin an iṭhung tâk a, amakhah om porinchena ruai ringot bang a nit tâk a.

⁷PUMAPA khan Mosia khah â sôn a, “Zu kîr zel ta roh, Aigupta ram ata nî ṭhui suak, ni mihei khu isualin an ne inôl tâk a nit.

⁸An zui ranga thu kî pêk khah an imâk phar tâk a nit; rângkachak inzôia siamsuak serâtte rilim khah chubai iûnin a ziangah ribôlnahei an lan a, ‘O Israelhei, amahih Aigupta ata nangni hong ṭhui isuatu nin pathian chu a nit,’ an ti a.

⁹Hi mihei tuklul lianzia hih kî riatinfel a nit.

¹⁰Khasikin, lei dâirek roh, an chungah hin ki ning ai thik titak a nit, anni chu ki zu înrimang vang rang a nit; nangmah neh ner chihei bang hi nam roinpui takin nang siam ki ti,” a ti a.

¹¹Nikhomsela, Mosia khan PUMAPA a Pathian kha a chûn ngit a, a ziangah, “O PUMAPA, roinpui tak neh ni bânzâl tharât sinthotheina manga Aigupta ram ata nî ṭhuisuak ni mihei chungah hin îtho tâk im hingka dôra ni ning a îmur hi!

¹²‘Tlângrama that a, inrimang riai rang piala ni mihei chu Aigupta rama rithokin ai ṭhui suak a nit hi,’ itin Aigupta mihei khan nang an iti rang a nit. Ni ningmur chu iṭhuai inla, ni lungril chu ithlengin hi vânduaina inrît tak hih ni mihei chungah iṭhum no roh.

¹³Nê som Abrahama, Isaka neh Jakoba hei khah reh mai ta; ṭongrikhâmin an ziangah, ‘Nin richihei rivâna ârsi zâkan inpung ki ta, ki înkung ram murdi hih nin richi suanpârhei ziangah pêng ki ta, kumkhuakan nei an ti,’ itin ni înkung a nit kha,” a ti a.

¹⁴Khanchu, PUMAPA khan a mihei chunga thil ṭhano tho ai tum khah â ṭhûl tâk a.

¹⁵Mosia khah itlânga rithokah khan a zuang ṭum a, a kut kiangruaikan kha Thupêk Sômkahei riziakna lungphêk inikah khah a chôi a.

¹⁶Lungphêkhei khah Pathian isiam a nit; Thupêk Sômkah riziaka chuang khom khah Pathian ngêi irziak a nit.

¹⁷Josua khan mipuihei ikhêk rihu khah a riatin chu Mosia ziangah khan, “Riabuka rihu khu ridoi rihu ai nit rang kêng dua,” a ti a.

¹⁸Mosia khan, “Zoina khêk rihu ni mak a, dingmun siat sika beidong rihu lak ni mak a, râifân la sak irî a nit khu,” a ti a.

¹⁹Khante, riabuk an zu nâiin chu, Mosia khan serâtte rilim neh mipui ilâm suai suai khah a zuk mu a, a ning a thik tak tak tâk a. Itlâng bulah khan kha lungphêk ai chôihei khah â vir ikhoi tâk a.

²⁰Serâtte rilim an isiam khah a lâk a, ân zôi a, a suk indi chit a, tui neh ân ripol a, Israel mihei khah ân in tâk a.

²¹Arona ziangah khan, “Ingka takin im mipuihei hin ni chungah an itho a, hingka taka sual porinche ni întho tâk hi?” a ti a.

²²Arona khan a sâm a, “Ki chungah ni ning inthik tlak no roh; hi mihei hin thilsual itho an rizuk dap dap zia kha nî riat riai a nit.

²³Ki ziangah, ‘Tho, ne ruaitu rang pathian ne siam pêk roh; Aigupta ram ata ne ṭhuiisuatu Mosia laka im a thurchi ai nit tâk reh khâi mang ung a,’ an hong ti a.

²⁴Keiman an ziangah, ‘Rângkachak kuarbet ineihei khan inrima sela, hin hong chôi riseh,’ ki ti pêk a. An hong chôi a, keiman meiah ki hâl a, ama serâtte rilim hih a hong irsiam suak zel a nit,” a ti a.

²⁵Mipui khah an nuam an ningin an om a, an irâlhein imusit rak rangin Arona khan a lei înlêng a nit tâk iti Mosia khan a mun chu,

²⁶riabuk kotbâiah khan a va ding a, â khêk a, “Mi tukhom PUMAPA tianga ṭang nuamkah chu ki ziangah hin hong riseh,” a ti a. Levia richihei rêng rêng chu ama ziangah khan an hong ribûm tâk a.

²⁷An ziangah, “Israelhei Pathian, PUMAPA khan hingka hin a ti: ‘Ipa rêng rêngin mahni khandai chôi seng unla, riabuk lûtna kotbâia lûtin riakmun kha rifang suak sela, mahni suapuihei khom, a mal khom, a bungtualbôm khom that riseh,’ a ti,” a ti a.

²⁸Levia richihei khan Mosia ti pêk lam angka takah khan an tho a, kha nî-ah khan mi sângithumkah an that a.

²⁹Mosia khan Levia chihei ziangah khan, “Mahni naihei neh urênghei ithat rak ten khomin PUMAPA rangin nin ripêk a, ṭhat nangni vur ngêt a ti,” a ti a.

³⁰Atûkah khan Mosian mipuihei ziangah, “Sual porinche tak nin tho tâk a; khan atûnah hin PUMAPA ziangah itlângah hang fe nôk ki ta; nin sual izâna ki mu duai tâk im,” a ti a.

³¹Mosia chu PUMAPA ziangah a hang fe nôk a, “Hi mihei hin sual porinche tak an tho tâk a, rângkachakin pathian an siama chubai an iûn tâk a nit.

³²Nikhomsela, ngaihoi takkan an sual hi la zâ roh; khan ne zâ nuam tlak khâi noa a nitin chu, ni mihei riming riziakna bu ata ker ming kha thâi inrimang roh,” a ti a.

³³PUMAPA khan Mosia khah a sâm a, “Ki lekhabua rithokin ki chunga thilsual ithotuhei riming bang khah kî thâi inrimang rang a nit.

³⁴Atûnah hin fen la, nang ki îril tâk munah khan hi mihei hih ṭhui roh. Ki Vântirtôn khan ni ma iruai mai a ti, hi mihei an sual sika kuttum ki tho rang zoro khah a hong itlung thiai tâk a nit,” a ti a.

³⁵Khanchu, rângkachak serâtte rilim Arona an insiam sikah khan PUMAPA khan mipuihei lâiah ripui ân lêng tâk a.