Read Biete FESUAKNA 33 Bible Online

FESUAKNA 33 - Biete bible

FESUAKNA 33

¹PUMAPA khan Mosia khah â sôn a, “Aigupta rama rithoka ni hong iṭhui suak mipuihei hih, hi mun ata suakpui inla, Abrahama hei, Isaka hei, Jakoba hei neh an richihei ipeh ranga ki înkung ramah khan fe roh.

²Ki Vântirtôn khan ni ma iruai a ta, Kanan mihei, Amor mihei, Periz mihei, Hiv mihei neh Jebus mihei kha ûm isuang ki ti.

³Kha ram, khuaitui neh dût luangna ramah khan fe unla, keimah chu nin ziangah fe sa no ning e, mi tuklul ilian nin nit a, lam lâiah nangni ki that inrimang duai lôiin,” a ti a.

⁴Mipuihein kha thu khah an riatin chu an ripei a tem tak tak a, tute rivo nuam khâi mak a.

⁵PUMAPA khan Mosia ziangah, “Mi tuklul ilian tak nin nit, nin lâiah fe sa inlang chu nangni ki înrimang vang rang a nit. Atûnah hin nin rivona thil iluhei khah lîp unla, im nangni ki lo rang la hang ringaitua ngân rong,” a ti a.

⁶Khaangkan Sinai tlâng an mâk nungah khan chu Israel mihei khan thlukthla ṭhan rivo khâi mak a.

⁷Israel mihein riabuk an siamna mun ikipah Mosia khan Puan-In khah riabuk ata ila ianka tah ân ding ngai a. Arming khah Ritongna Puan-In a be a. Tukhomin PUMAPA an isôn nuamin chu amakhan an ife ngai a nit.

⁸Ritongna Puan-Inah Mosia a fe rangin chu mi tin anmani puan in kotbâiah khan an hong suak a, Puan-In a lût mâkah chu Mosia khah an thlîr ngai a.

⁹Mosia khah Puan-In sung a lût kaneh, sûmpual khah a zuang ṭum a, Puan-In kotbâiah khan a zuang om a, sûma rithokah khan PUMAPA khan Mosia khah â sôn ngai a.

¹⁰Ritongna Puan-In kotbâia sûmpual iding an mun chu mi murdi kha an puan in kotbâiah an ikhûn a, chubai an ûn chit ngai a.

¹¹Mîn an mal a irsônpui ngai angka hin, PUMAPA khan Mosia khah mâi ritongin a irsônpui ngai a nit. Khanungchu, Mosia khah riabuk tiang a kîr nôk ngai a; khannisela, ama ṭangpui ngai Nuna naipa tlangvâl Josua kha chu Puan-Inah khan ai om mai ngai a nit.

¹²Mosia khan PUMAPA ziangah, “Hi mihei hih kha rama ṭhui rangin ni ne ti a, khan tûm ne fepui rang iti lak ne ril mak che a. Ni ne riatinfel a, ni ne iditsak a nit iti ni ne ril tâk a.

¹³Ne lung a ne itluk titak a nitin chu ni thil tum ne ril roh; khanchu, ni sin ithon ni mit tlung mai thei ki ti. Hi mihei hih ni mi rithlanghei chu an lei nit iti kî riat thei rang a nit,” a ti a.

¹⁴PUMAPA khan Mosia ziangah, “Nin ziangah fe mai ki ta, nêna nangni pêng ki ti,” a ti a.

¹⁵Mosia khan, “Kin ziangah ni fe sa no rangin chu hi mun ata hih nen rithok tlak khâi no roh.

¹⁶Kin lâiah ni fe sa mai noa a nitin teh ni mihei neh ki chungah hin ne lung a tluk iti ingkam mîn an riat thei rang? Ni ompuinan a ne ifepui mai hi ni mak im a, rammuala mi tinin mi danglam bîk tak kin nit iti an ithlei theina chu ai nit,” a ti a.

¹⁷PUMAPA khan Mosia ziangah, “Nang ki riatinfel a, ni chungah ke lung a tluk sikin ni ngên lam angka takin thông ki ti,” a ti a.

¹⁸Mosia khan, “Lung nen kham inla, ni mêl nen mu roh,” a ti a.

¹⁹PUMAPA khan a sâm a, “Ki roinpuina vâr ri-el ni ziangah inlang ki ta, ker ming rithiang khom ni riatah inpuang ki ti, PUMAPA ki nit hih. Kî nuamka chungah lungkham nei ki ta, lung ki înkham nuam chu lung ki înkham rang a nit.

²⁰Ki mêl chu nang inmu no ning e, ne mua â ring mai tute om ngai mak e,” a ti a.

²¹PUMAPA khan a la sîr mai a, “En ta, ki kôlah hin mun khatkah a om, ama lungpui chungah hin lei iding inla,

²²Ki roinpuina vâr ri-el taka ki zuang tikin lungpui ikak kârah hin nang siang ki ta, ki thleng mâkah chu ki kut nang inrilî ki ta,

²³khanchu, ki thleng rang tenan ki kut khah khâi ki ta, ke nungtiang kha mûng ni ta, ki mêl chu mu thei no tin e,” a ti a.