Read Biete FESUAKNA 34 Bible Online

FESUAKNA 34 - Biete bible

FESUAKNA 34

¹PUMAPA khan Mosia ziangah, “Lungphêk inikah matona angkana khah siam roh; lungphêkah khan matona ni îkhoi tâk lungphêk thu khah lei riziak nôk ki ti.

²Naktûk zîngah risiam inla, Sinai tlângah hong chôi inla, ki maah hong rilang roh.

³Tute an hong sa rang ni mak; itlâng rêng rêngah khan tak mun khomah tute an om rang ni mak a, itlâng pangah khan bera lôm manih serât lôm manih khom an lêng rang ni mak,” a ti a.

⁴Khanchu, lungphêk inikah matona angkana khah Mosian a siam a. Atûkah chu zîngah a thoi a, PUMAPA thupêk angka khan Sinai tlângah lungphêk khah a chôi tâk a.

⁵Sûmah khan PUMAPA chu a zuang ṭum a, a kôlah a zuang iding a, arming PUMAPA iti khah a ching tâk a.

⁶Mosia matonah a thleng pumin PUMAPA khan, “Keimah hi PUMAPA chu ki nit, khorngaina neh ṭhatna sip, lungidâi neh lungkhamna sip, Pathian iamiom,

⁷rikhûk sâng idêna lungkhamna inzui mai ngaitu, siatnahei, pualoinahei, sualnahei izâ ngai ki nit. Khannisela, thiamno changhei chu zua loi a, an pahei sualna sika an naihei ten khoma kuttum itho ngai, an tuhei, rikhûk ithum rikhûk ilika dêna intuang ngaitu Pathian ki nit,” a ti a.

⁸Mosia khah irang takkan lingisikin â khûn a, PUMAPA khah chubai a ûn tâk a.

⁹Hingka hin a ti a, “O PUMAPA, ni mit kî tlung a nitin chu lungkhamin kin ziangah fe sa ngêt roh. Hi mihei hi tuklul ilian tak ni khom sela, kin puanona neh kin sualna ne zâ inla, nangma dongtumhein ne nei roh,” a ti a.

¹⁰PUMAPA khan Mosia ziangah, “Israel naihei rang thuthlung kî siam a nit. Rammuala tu nam lâi khoma la tho ngai ino, ni mihei mitmuah hin thil roinpuihei kî tho rang a nit; khanchu, nin omnaa mi murdi hin keimah PUMAPA hin thil roinpuitak ki tho theizia hi an imu rang a nit. Nin ta ranga thil rikhêl ki tho rang hih inrît tak ai nit rang a nit.

¹¹Vuaninta dân nangni kî pêk hih zôm ngit mai rei. Ringai ta u, nin matonah khan Amor mihei, Kanan mihei, Hit mihei, Periz mihei, Hiv mihei neh Jebus mihei ki lei iûm isua rang a nit.

¹²Ridîn rei, nin fena rang rama mihei neh khan thuthlung nin siam viat rang ni mak; khanonchu, nin ta rangin thina châng ai nit rang a nit.

¹³An mâichâmhei khah ṭhet chit unla, an lungphunhei khah isehchit unla, an pathiannu Aseri rilimhei khah rikit chit rei.

¹⁴“Pathian dang rêng rêng chubai nin ûn rang ni mak, PUMAPA chu theimâkina, Pathian thîkthusia tak kêng ai nit.

¹⁵Kha rama mihei neh khan thuthlung siam no rei; khanonchu, an pathianhei chubai iûna an ribôlna muna khalai rikhîlpui sa rangin nangni fial an ta, an pathian zianga an thillan khah ifah rangin nin irzuk rang a nit.

¹⁶Nin naipahein kha nam dang nupanghei khah nupuiin nei an ta, ki ta ranga iamom loia om rang neh an pathianhei chubai in-ûn rangin anni khan nangni an iṭhui invâi rang a nit.

¹⁷“Mirmil inluan pathian rêng rêng chubai nin ûn rang ni mak e.

¹⁸“Bairiam Kût mang mai ngai rei. Abib thla, ki zoro khitah, thu nangni kî pêk angkan sûn sarika sung chol pol ino bai nin fâk ngai rang a nit; Abib thla hi Aigupta ram nin mâk thla kha a nit.

¹⁹“Nai lutîr ipa neh ran vâi suak masatak achal kha keima ta a nit.

²⁰Sakuartung suak masatak achal kha chu berate ilanin ritlan thei ni ti. Ner tlan nuam non chu a ring her ikhiak ngai roh. Ni nai lutîr, ipa rêng rêng chu ner tlan nôk ngai rang a nit. Tute kut korongin ki maah nin hong rilang rang ni mak e.

²¹“Sûn rukkah sin tho thei nin ta, a sûn sarinî-ah khan chu sin nin tho rang ni mak, âlkâi lâi neh bu ât lâi khomin nin ringam rang a nit.

²²“Bu vâng masa tak ni ât phutin Favâng Kût[34] mang inla, ni thei irâ ner mal zoi riai nung, favâng zoiah khan Dângdi Kût kha mang roh.

²³“PUMAPA, Israelhei Pathian maah nin lâia ipa rêng rêng a kumah voi thumkah an hong rilang ngêt ngai rang a nit.

²⁴Nin matonah khan nam danghei ki lei ûm isua a, nin ramrîhei ken rizat tenan chu, PUMAPA nin Pathian chubai iûna hi ṭum ithumkah nin fe sungah hin tutên nin ram lei irûn tum ngai no nih.

²⁵“Ribôlna ni hong lanin chol ipol ibai hong lan sa no roh. Kalkan kût sa, atûka rang a ṭhing lekkah khom ni zua rang ni mak.

²⁶“Ni loia thlâithar vâng masatak chu PUMAPA, ni Pathian inah hong chôi inlût ngai roh. “Berate manih, kêlte manih khah a puinu rinutuiin suang no roh,” a ti a.

²⁷PUMAPA khan Mosia ziangah, “Hi thuhei hih riziak suak roh, hi thuhei isirsanin a nit nangmah neh Israelhei ziangah thuthlung kî siam a nit,” a ti a.

²⁸Mosia chu sûn sômilikah neh zân sômilikah îte fah loiin PUMAPA ziangah khan a om a. Lungphêkah khan thuthlung, Thupêk Sôm khah arziak tak a.

²⁹Thupêk Sôm riziakna lungphêkhei ichôiin Mosia khah Sinai tlânga rithokin a zuang ṭum a, a mêl khah a vâr sar a, PUMAPA neh an risôn sika vâr sar a nit; nikhomsela, ani khan chu ai riat ino a nit.

³⁰Arona neh Israel mipuihei khan Mosia mêl ivâr ri-el khah an mun chu a kôlah va nâi ngam mak a.

³¹Mosia khan anni chu a koi a, Arona neh Israel ruaituhei murdi chu a ziangah an fe a, Mosia khan thu a lei iril a.

³²Kha rizoiin chu, Israel naihei kha an rêngkan Mosia kôlah khan an hong ribûm a, Sinai tlânga PUMAPA thupêk murdi khah a lei iril a.

³³Mosian an ziangah thu â sîr zoin chu, mâirikhû puanin a mâi arkhû tâk a.

³⁴PUMAPA neh risôn ranga Ritongna Puan-Inah a fe kipah, a hong suak nôk mâkah chu, a mâi rikhûna khah a lîp ngai a. A hong suakin chu PUMAPA thupêkhei khah Israel naihei â ril nôk ngai a.

³⁵Khante, Israel naihein Mosia mêl ivâr ri-el khah an imu ngai a nit. Khanchu, PUMAPA neh risôn ranga a fe nôk mâkah chu a mâi arkhû nôk mai ngai a.