Read Biete FESUAKNA 35 Bible Online

FESUAKNA 35 - Biete bible

FESUAKNA 35

¹Mosia khan Israela nai mipuihei khah an rêngkan a koi bûm a, an ziangah, “Amahih nin tho ranga PUMAPA thupêk chu a nit:

²Sûn rukkah sung sin tho thei nin ta, a sûn sarinî kha chu nin ta rangin nikhua rithiang nîng a ta, PUMAPA chôiinrisângna ranga ri-up takka ser rang a nit. Mi tukhom ser loia kha nî-a sinitho tên tên chu ithat rang a nit.

³Sabat nin chu mei tena lua nin insungheiah nin sêm rang ni mak e,” a ti a.

⁴Mosia khan Israel mi murdihei ziangah, “PUMAPA thupêk chu amahih a nit:

⁵PUMAPA ziangah thillan hong chôi rei, mahni phal lam angka sengin hong chôi rei; rângkachak hei, tangkarua hei, sumsen hei;

⁶Pat zâirimi tlûr, a dumpôl hei, a senduk hei, a seninlâr hei; samul hei, kêlmula siam puan hei;

⁷beravun ṭingsen inôk hei, savun iṭha chi hei; sitim thing hei;

⁸Meisera chok rang oliv riak hei; inrithu ngai siriak hei, ihâl rang thil namhoi hei;

⁹thiampu zakua neh a ṭângvêla khop rang oniks lunghei neh lungmantamhei hong chôi rei.

¹⁰“Nin lâia kutithiam mi murdi hong rithok sela, PUMAPA iti murdi, hihei hi hong siam riseh:

¹¹Puan-In, a chung rikhûna neh a chung inrithuana hei, ân rikuatna hei, a bangrutung hei, a bangru hei, a chopuihei neh a bul inṭhungna hei;

¹²Thuthlung Bôm neh a zônfung hei, a sîng hei, ân rili rang puanzâr hei;

¹³docham neh a zônfung hei, a mangrua rêng rêng hei; Pathian zianga lan ibai hei;

¹⁴ichok invâr rang meiser siana ribom neh a mangrua hei; â chokna rang a lubôk neh a tui rang riak hei;

¹⁵namhoi hâlna mâichâm neh a zônfung hei; inrithu ngai siriak hei; ihâl rang thil namhoi hei; Puan-In lûtna kotbâi puanzâr rang hei;

¹⁶thillan hâlna mâichâm, a sîra dârtluan ikop hei, a zônfung neh a mangrua murdi hei, risûk infâina tuibêl neh â ṭhungna hei;

¹⁷arkulna puanzâr rang hei, â cho neh ân ṭhungna hei, a tual kotbâia zar rang puan hei;

¹⁸Puan-In neh â dâi hêmfung hei neh a ruihei;

¹⁹Mun Rithianga sinitho ranga an fe zoroa thiampuhei ihâk rang thlukthla ze enihoitak hei, thiampu Arona zakua rithiang hei, a naipahei ihâk rang zakua hei siam riseh,” a ti a.

²⁰Israel mi arbûmhei khah an ṭin indar a,

²¹Ritongna Puan-In sinna rang hei, Pathian chubai ûnna â nang murdi neh thiampu thlukthlahei siamna mangruahei khah mahni phal lam angka chitin PUMAPA ziangah khan an hong lan a.

²²Pêk nuamna nei murdi chu a nupang â pan an hong a, rângkachaka siam, bânbun hei, kuarbet hei, kutsabit hei, rithei hei an hong chôi a, rângkachak lûmhei khom an hong chôi sa a, PUMAPA ziangah an lan a.

²³Pat zâirimi a dumpôl hei, a senduk hei, a seninlâr hei, samul pat hei, kêlmula siam puan hei, bera vun ṭingsen inôk hei; savun iṭha chi hei â nei murdihei khan an hong chôi a.

²⁴Tangkarua neh sumsen hong ipeh theihei khan PUMAPA chu an hong pêk a; Puan-Ina mang rang sitim thing â neihei khan an hong chôi sa a.

²⁵Nupang patpuan ithiamhei khan pat zâirimi hei, pat dumpôl hei, pat senduk hei, pat seninlâr hei an kâi a, an hong chôi a.

²⁶Nupang patpuan ithiam bîkhein kêlmul an ithlûr khah an hong chôi sa a.

²⁷Ruaituhei khan oniks lunghei neh lungmantam dang, thiampu zakua neh ṭângvêla khop rang an hong chôi a.

²⁸Thil namhoi neh riak, ichok rang hei, rithu rang hei, ihâl rang hei an hong chôi sa a.

²⁹Israela richihei khan PUMAPAziangah mahni nuam thua thillan an hong lan a; mi tin, a nupang â pan, PUMAPAN Mosia zianga isiam ranga thu ai pêk murdi siamna rangin riphal takkan thilpêkhei a ziangah an hong lan a.

³⁰Mosian Israel naihei ziangah khan, “Juda nam lâia mi, Hora tupa, Uria naipa Bezalela khah PUMAPA khan arthlang tâk a.

³¹Vârna hei, riatna hei, lungvâr hei, tinrêng isiam ranga kutthiamna nei rangin a sinthotheina ritha ai pêk tâk a nit.

³²Rângkachak hei, tangkarua hei, sumsen heia thil enihoi tinrêng ingaitua suaka siam thiamna hei;

³³ikhop ranga lungmantam ât eninhoi hei, thing isin hei, thil enihoi chi tinrêng siam thiamna ai pêk a nit.

³⁴Dana richia mi, Ahisamaka naipa Oholiaba neh an ruaikan, mi danghei thil isiam inrisei thiamna khom PUMAPA khan ai pêk a nit.

³⁵Thil isiam thiamna, thil enihoi inrivo dân iriahein puan zâirimi ṭha tak; a dumpôl hei, a senduk hei, samul puan sen hei neh puan dang ikhông thiamhei angkana tinrêng siam thiamna khah anni chu ai pêk a nit. Tinrêng an siam thiam a, ân ribu khom an ithiam tak tak a nit.