Read Biete FESUAKNA 36 Bible Online

FESUAKNA 36 - Biete bible

FESUAKNA 36

¹“Bezalela hei, Oholiaba hei neh mi kutthiam lôm, Ritongna Puan-In ranga thil inang murdi siam dân thiamna neh vârna PUMAPA ipêkhei khan, PUMAPA thupêk angka takin îtinrêng an siam rang a nit,” a ti a.

²Mosia khan Bezalela neh Oholiaba khah a koi a, sinitho inuam kutthiam lôm, PUMAPA khan thil sin thiamna ai pêkhei khom khah an hong a, Mosia khan sin iphut rang tâkin â ril a.

³Puan-In rithiang sinna ranga Israel mihei thilpêk hong chôi khah Mosia zianga rithokin an lâk a. Zîng tin, Israel mihei khan an thilpêkhei khah Mosia ziangah khan an la hong chôi rizom mai a.

⁴Mi kutthiamhei khah Mosia ziangah an fe a,

⁵“Mun Rithianga sinthona ranga PUMAPA khan thil isiam ranga ai ti dum ban kêng mihei hin an hong ipêk ai nit tâk,” an ti a.

⁶Khanungchu, Mosia khan thu a pêk a, riabukah tlâng ân sam a, “Puan-In rithiang sinna rang, tutên thilpêk rang inrifûk khâi no rei,” itin. Khanchu, mihei khan thilpêk hong ichôi khah an ringam tâk a.

⁷An hong ichôi sai tâk khan an siam rang khah a dum vang tâk a, mang bân ai om rak tâk a nit.

⁸Kutthiam mihei lâia a kut ithiam bîkhei khan Ritongna Puan-In khah an sin tâk a; amakhah pat zâirimi tlûr, a dumpôl hei, a senduk hei, a seninlâr heia không, Cherub rilim enihoi taka zep, puan phêk sômka mangin an siam a.

⁹Phêk tin khah artianat a, mûk sôminikah iriatka sei, a khang mûk ilika lian korong a nit.

¹⁰Phêk ringakah khah an iṭhui inrikop a, phêk dang ringakah khom khah a ranin an iṭhui inrikop sa a.

¹¹Phêk ringaka ṭhui inrikop môr tak sîrkôlah khan â kuar rang pat dumpôl irual rival vangkual an ikhop chit a, a dang ringakah ṭhui inrikop sîrkôl khomah â kuar khah an ikhop sa chit a.

¹²Â kuar sômringakah seng seng an ikhop a, a kuarhei khah ridîn bang bangka an îkhop a nit.

¹³Rângkachak kuaikimte sômringakah an siam a, kuaikimteah khan puan ṭhui inrikop inikah khah an rithil inrizom a.

¹⁴Puan-In chung rikhûna chu kêlmul puan sômleikhatkah an ikhông a nit.

¹⁵Phêk tin khah ritianat kan a dung mûk sômithumka sei, a khang mûk ilika lian korong a nit.

¹⁶Phêk ringakah kha an iṭhui inrikop a, a dang phêk irukkah khom kha a ranin an iṭhui inrikop sa a.

¹⁷Phêk ringakah ṭhui inrikop môr tak sîrkôl takah khan vangkual sômringakah an ikhop a, a dang phêk irukkah ṭhui inrikop sîrkôl khomah khan vangkual sômringakah an îkhop sa a.

¹⁸Sumsenin kuaikimte sômringakah an siam a, amakhan kêlmul puan ṭhui inrikop inikahei khah phêk khatkan an rithil rizom a.

¹⁹Puan-In chung inrithua sa nôkna rang bera vun ṭingsen inôk neh savun iṭha chi khah an siam a.

²⁰A banga tung rang sitim thing an inribu a.

²¹An thil inribu phêk khatkah khah mûk sômka risâng, a khang mûk khatka neh artenka lian a nit.

²²Thingphêkhei inrizom theina rangin a kôlsîrah khan arlûtmat thei kuaikim inikah a kop rang a nit a, khaangkan a kôlsîr rilûtmatna kuaikim khah an înnei chit a nit.

²³Puan-In sim tiang banga tung rang phêk sôminikah an siam a.

²⁴A bul inṭhungna tangkarua lûm ihol sômilikah an inluan a, thing inribu khatkah kha a bul inṭhungna inikah chita riphun a nit.

²⁵Puan-In mâr tiang banga tung rang phêk sôminikah an siam sa a.

²⁶A bul inṭhungna tangkarua lûm ihol sômilikah an inluan a, thing inribu phêk khatkah kha a bul inṭhungna inikah chita riphun a nit.

²⁷Puan-In inung tiang, tlâk lam tianga tung rang phêk irukkah an siam a,

²⁸â kilheia rang phêk inikah an siam a.

²⁹Hi â kila khop ranga siamhei hih a bula rithoka a lêr isua a, kil inrizom a nit.

³⁰Khanchu, thing inribu iriatkah, a bul inṭhungna tangkarua lûm ihol sômleiirukkah, khatka nuaiah â ṭhungna inik nikkah ai om chit a nit.

³¹A bangru rang sitim thing thluan sômleiringakah,

³²mâr tiang bangah ringakah, sim tiang bangah ringakah neh nungtiang bangah ringakah chit an khang a.

³³A bangru khang, ân lâina taka khop khan, Puan-In zuartluan ai sua dai a nit.

³⁴Thing inribu, an îtunghei khah rângkachak tuiin an tuam inluan a, a bangru khanghei indet rangin rângkachak vangkualhei an ikhop a, a bangru khanghei khom khah rângkachak ngira tuam inluan a nit.

³⁵Pat zâirimi, samul a dumpôl hei, a senduk hei, a seninlâr hei inrinoka không, Cherub rilim enihoi taka zepa không khah chontan puanzârin an mang a.

³⁶Sitim thing chopui ilikah, puanzâr indettu rang, rângkachaka tuam inluan, a phunna rang rângkachak kuaikim an ikhop a, chopuihei riphûmna rang tangkarua lûm ilikah an siam sa a.

³⁷Puan-In kotbâia zar rang samul a dumpôl hei, a senduk hei, a seninlâr hei neh pat zâirimi tlûr hei inrinok, a vo enihoitak an không a.

³⁸Puanzâr zarna rang sitim thing chopui ringakah, thil inkuatna rang kuaikim inei chit an siam a, a sîp chu rângkachakin an tuam a, a puan zarna rang irol rângkachakin an tuam inluan a, a chopuihei iṭhungna rang sumsen lûm ringakah an siam a.