Read Biete FESUAKNA 37 Bible Online

FESUAKNA 37 - Biete bible

FESUAKNA 37

¹Bezalela khan Thuthlung Bôm rang sitim thingin, a dung mûk inikah neh artenka sei, a khang mûkkah neh artenka lian neh mûkkah neh artenka risâng a sin a.

²A sung tiang neh a putiang khah rângkachak korongin a tuam inluan seng seng a, â kil môrhei khah rângkachakin a tuam a.

³A zônfung rôlna rang rângkachak vangkual ilikah a siam a, bôm sîr kiangruaikah khan inik nikkan â khop a.

⁴A zônfung rang sitim thing thluanhei a siam a, rângkachakin a tuam a,

⁵bôm sîr kiangruaika vangkualheiah khan a rôl a.

⁶Bôm sîng rang, a dung mûk inikah neh artenka sei, a khang mûkkah neh artenka lian rângkachak korongin a siam a.

⁷Rângkachak sukinphêkin Cherub inika rilim,

⁸a sîng dung mong seng sengah khan ân ding a. A sîng neh khan arzoma phêkka anga siam a nit.

⁹Cherubhei khah an rithla an phar a, Thuthlung Bôm sîng khah an rithla khan arkhû a; ma risonga dingin an ikhûn a.

¹⁰Sitim thing docham, a dung mûk inika sei, a khang mûkka lian, mûkkah neh artenka risâng a siam sa a.

¹¹Rângkachak korongin a tuam a, a kôl chu a vêlkan rângkachakin a tuam a.

¹²A kôl irei kutpha dôra rizat â vêlkan a siam a, rângkachakin a thlop a.

¹³A zônfung rôlna rang rângkachak vangkual ilikah a siam a, a kehei omna â kil ilikah khan â khop a.

¹⁴A zônfung rôlna vangkualhei khah â rei nuaiah khan â khop a.

¹⁵A zônfung rang sitim thing thluan a siam a, rângkachakin a tuam a.

¹⁶Dochama mang rang khênghei, khêngtehei, kilâthei, bêlhei neh berbuhei uain lannaa mang rang rângkachak korongin a siam a.

¹⁷Rângkachak korongin meiser siana iṭang sarika nei a siam a, â ṭhungna bul neh a ngul khah rângkachak kut ngêia suka siam a nit a; a lu bôkhei, a pâr rimuamhei, â pâr tâkhei rilim khah munka arzom riai a nit.

¹⁸Iṭang irukkah, a kungpuia rithoka khan ân zar a, a sîr kiangruaikan ithumkah seng seng ai om a nit.

¹⁹Iṭang irukka tinah khan a vona pâr rilim ithumkah, almon pâr, armuam neh a pâr i-ang a kop a.

²⁰A kungpuiah khan a vona pâr ilikah almon pâr, armuam neh a pâr i-ang ai om sa a nit.

²¹Â ṭang chung ita ual neh nuai ita ual kâr ikipah, a kungpuiah khan pâr rimuam khatka rilim a kop chit a.

²²Hi pâr rimuamhei, â ṭanghei neh a kungpuihei hih rângkachak korong lûm khatka ta kut ngêia suka siam a nit.

²³Meiser bûr, a lu bôk sarika hei, meichep hei, meirivâm siana hei, rângkachak korongin a siam a.

²⁴Meiser siana neh a mangrua murdi siamna rangin rângkachak her sômithumka ringakah an imang a nit.

²⁵Sitim thing mâichâm kil ilika nei, a dung mûkka sei, a khang mûkka lian, arsâng dân mûk inika risâng a siam a, â kil ilika arki lorhei neh khan ân thluan thal a nit.

²⁶Rângkachak korongin mâichâm neh arkihei khah a tuam inluan a, a kôlsîr khah rângkachakin ai tuam sa a nit.

²⁷A zônfung rôlna rang rângkachak vangkual inikah a siam a, a kôlsîr â rei nuai kiangruaikan inik nikah â khop a.

²⁸A zônfung rang sitim thing thluanhei a siam a, rângkachakin a tuam a.

²⁹Riak rithiang inrithu ngai rua hei, namhoi ihâl rang, siriak namhoi angkana inripol hei a siam sa a.