Read Biete FESUAKNA 38 Bible Online

FESUAKNA 38 - Biete bible

FESUAKNA 38

¹Thillan hâlna rang mâichâm, sitim thingin a siam sa a; kil ilika nei, a dung neh a khang mûk ringa ngakah ri-el bang, mûk ithumka risâng a nit.

²A kil ilikah khan riki lorhei a siam chit a, mâichâm neh khan arzom thal riai a nit; sumsenin mâichâm neh arkihei khah a tuam a.

³Mâichâma mang rang rivut bêl hei, rivutluak hei, tâbor hei, thîrkut rikim hei neh meiluak hei sumsenin a siam a.

⁴Sumsen thluan rikual a kôlsîrah khan â khop a, mâichâm ritiana ten â huap a.

⁵A zônfung rôlna rang vangkual ilikah a siam a, â kil ilikah khan â khop a.

⁶A zônfung rang sitim thing thluan a siam a, sumsenin a tuam a

⁷Mâichâm bang kôl kiangruaika vangkualah khan zônfunghei khah a rôl a; mâichâm bang kha thingphêk a nit a, a sung chu arkua a nit.

⁸Ritongna Puan-In kotbâi bula sinitho ngai nupanghein lîmena an imang ngai sumsen ritlea rithokin sumsen tuibêl neh â ṭhungna khah a siam a.

⁹Pat zâirimi không puanin Puan-In khah arkul a. Puan-In sim tiang rikul nan mûk rizaka sei puan a mang a.

¹⁰Chopui sôminikah neh â ṭhungna sumsen lûm sôminikah, thil rikuatna rang kuaikim neh a zarna rang tangkarua thluan hei a siam a.

¹¹Puan-In mâr tiang khom puan mûk rizaka sei, a chopui sôminikah, a bul iṭhungna sumsen lûm sôminikah neh thil rikuatna rang kuaikim neh a zarna rang tangkarua thluan hei ngir a siam a.

¹²Tlâk lam tiang Puan-In inung tiangah khan puan mûk sômringaka sei a zar a, chopui sômkah neh â ṭhungna sumsen lûm sômkah a siam a, a chopuiah thil rikuatna kuaikim a om a, puan zarna rang tangkarua thluan a om sa a.

¹³Nisua tiang, inkot omna khom mûk sômringaka rizat a nit.

¹⁴Inkot rizat dân chu mûk sôminikah a nit a, a sîr kiangruaika zar rangin puan mûk sômleiringakah seng seng a mang a.

¹⁶Arkulna puanzâr khah pat zâirimi tlûra không korong imang a nit.

¹⁷A chopui bul iṭhungna chu dâr a nit a, a kuaikimhei, a ngulhei neh a chopui sîp tuamnahei chu tangkarua korong a nit. Arkulna chopui murdi khah tangkarua thluana inriman korong a nit.

¹⁸A kotbâi lûtna puanzâr chu pat zâirimi tlûr, samul a dumpôl hei, a senduk hei, a seninlâr hei inrinoka a zia enihoitaka zepa không a nit. A puanzâr kha mûk sôminika sei, mûk ringaka risâng; Puan-In rikulna puanzâr danghei angka ngir a nit.

¹⁹Chopui ilikah, a bul iṭhungna sumsen lûm ilikah, thil rikuatna kuaikim hei, a chopui sîp tuam hei neh ân rimanna thluanhei khah tangkarua koronga siam a nit.

²⁰Puan-In neh arkul kil indetna rêng rêng chu sumsen korong a nit.

²¹Thupêk Sôm riziakna lungphêk an siana Ritongna Puan-In sinna ranga tinmatua an mang zâk chu hingka hin a nit. Mosia thupêkin thiampu Arona naipa Ithamara iruaina nuaiah Levia chihein a zâk hi an isût suak a nit.

²²Juda nama mi, Hora tupa, Uria naipa Bezalela khan Mosia zianga PUMAPA thupêk angkan tinrêng a siam a.

²³A sinpui, Dan nama mi, Ahisamaka naipa Oholiaba kha kutthiam, thil enihoi taka vo thiam, pat zâirimi neh samul a dumpôl hei, a senduk hei neh a seninlâr hei inripola không dân ireh mi tak a nit.

²⁴Puan-In rithiang sinna ranga PUMAPA maa rângkachak an hong ilan chu her sângkah a nit, khotlâng mang lâi hîllung idik thapa var a nit.

²⁵Riteppui an neia mi tin chôi rang zâk bituk an isiam a, tangkarua an hong ichôi bûm chu her sângithumka rizalika sômithumkah ai kâi a nit, khotlâng mang lâi hîllung idik thapa var a nit.

²⁶Amahih kum sôminik ikâi tâk riteppuia tep sa mi nuaiirukkah sângithumkah rizarngaka sômringaka hein sekel rizâtkah (Gera sômka) an hong ipêk rivarpui khah a nit.

²⁷Puan-In rithiang neh puanzâr inṭhungna tangkarua lûm khah khatkan her sômithumka ilika rik a nit, a rêngkan tangkarua her sângithumka rizalikah an imang a nit.

²⁸An mang bân tangkarua her sômithumkah kha Bezalela khan Puan zârna thluanhei, chopuia rang kuaikimhei neh a sîp tuamna ranghein a siam a.

²⁹PUMAPA ranga sumsen an ipêk chu her sânginika rizalika sôminika ringakah a nit.

³⁰Amakhan Ritongna Puan-In lûtna chopui bul hei, sumsen mâichâm neh ân dettu sumsen thluan hei, mâichâm mangrua murdi;

³¹Puan-In rikulna chopui bul neh â kot icho ṭhungnahei, Puan-In neh arkul indetna hêmfunghei a siam a.