Read Biete FESUAKNA 39 Bible Online

FESUAKNA 39 - Biete bible

FESUAKNA 39

¹Samul pat dumpôl hei, a senduk hei neh a seninlâr hei imangin Mun Rithianga sin an tho zoroa thiampuhei ihâk rang enihoi tak neh Arona thiampu zakua ser kha PUMAPA thupêk angka takin an siam a.

²Efod chu pat zâirimi, a dumpôl hei, a senduk hei, a seninlâr hei neh rângkachak zâirimi hein an không a.

³Rângkachak chu riphân takkan an suk inpêr a, pat zâirimi, samul, a dumpôl hei, a senduk hei, a seninlâr hei neh inripol rangin an ât thlêr sap sap a.

⁴Dârbât inikah an siam a, Efod sîr môrah khan an ikhop a, amakhan Efod khah ai man indet a nit.

⁵Konga Efod khit indetna rang, Efod angka takin an không a, Mosia zianga PUMAPA thupêk angka khan Efod neh an ikhông inrikop a nit.

⁶Oniks lungmantam chu rângkachakah an phûm a, enihoi takkan Jakoba nai sômleiinikahei riming an riziak a.

⁷PUMAPA thupêk angka takah khan Efod dârbâtah khan an ikhop a; amakhah Israel nam sômleiinika entîrna a nit.

⁸Efod siamna ranga an thil mang, pat zâirimi tlûr; samul, a dumpôl hei, a senduk hei, a seninlâr hei neh rângkachak zâihei imangin ṭângvêl khom khah enihoi takkan an không a.

⁹An thlep a, thlep zoiah khan kil ilika nei, khâp khâpka ri-el bang a nit.

¹⁰Lungmantam rân ilikah an ikhop a; a rân khatnaah khan rubi lung hei, topaz lung hei, garnet lung hei an ikhop a;

¹¹a rân iniknaah khan emeral lung hei; safir lung hei, daimon lung hei an ikhop a;

¹²a rân thumnaah khan tarkois lung hei, ageit lung hei, amethis lung hei an ikhop a;

¹³a rân linaah khan beril lung hei, karnelian lung hei, jaspar lung hei an îkhop a nit. Hi lungmantamhei hih rângkachaka ikhop indet korong a nit.

¹⁴Lung khatkah chitah khan Jakoba naihei khatka riming a chuang korong a, Israel nam sômleiinika rithûl rang iti a nit.

¹⁵Ama ṭângvêl khit indetna rang rângkachak zingziri rual an siam a.

¹⁶Lungmantam ikhopna rângkachak inikah neh rângkachak vangkual inikah an siam a, vangkualhei khah ṭângvêl kôlsîr chungtiangah khan an ikhop seng seng a.

¹⁷Rângkachak zingziri rual khah vangkualah khan an thlung a;

¹⁸a môr kiangtiang khah lungmantam ikhopna rângkachak inikah neh khan an inrizom a; ṭângvêl thlungna khah efod dârbât matiang a irthlung a nit.

¹⁹Rângkachak vangkual dang inikah an siam a, ṭângvêl kôlsîr nuai, a sungtiang, efod kôl zelah khan an ikhop a.

²⁰Rângkachakin vangkual dang inikah an siam nôk a, efod dârbât inikahei imatiang nuaiah enihoi takkan kongkhit chungah an ikhop a.

²¹Mosia zianga PUMAPA thupêk angkan, ṭângvêla rângkachak vangkualhei neh Efod rângkachak vangkualhei khah pat dumpôl irualin an isui inrikop a; khanchu, kongkhit chungah ṭângvêl khah a îbei a nit.

²²Efod nuaia hâk rang zakorfual chu samul dumpôl koronga không a nit.

²³Lu thunna rang a ring rikua khah a ṭet nona rangin barangulzêma kîm a nit.

²⁴A zakorfual môrah khan pat zâirimi hei, samul a dumpôl hei, a senduk hei, a seninlâr heia siam theisen rilim neh rângkachak selniang kâr rithlâka khop a nit a; Mosia zianga PUMAPA thupêk angka takah khan an isiam a nit.

²⁷Arona neh a naihei ihâk rang sunglût hei,

²⁸lukôm hei, lukhum hei, tuman hei an không a.

²⁹Pat zâirimi tlûr neh samul a dumpôl hei, a senduk hei, a seninlâr hei inrinoka a vo enihoitak ithon kongkhit rang an không sa a. Mosia zianga PUMAPA thupêk angka takah khan.

³⁰Rângkachakin lukhuap an siam a, amakhan, “PUMAPA ranga serinran,” iti an riziak a.

³¹Lukôm matiangah khan pat dumpôlin an ikhop a, Mosia zianga PUMAPA thupêk angka takah khan an isiam a nit.

³²Ritongna Puan-In neh thil danghei khah an siam zoi tâk a. Israel naihei khan Mosia zianga PUMAPA thupêk murdi khah an tho riai a.

³³Mosia ziangah Puan-In siamna rang tinmatua tinrêng khah an hong chôi a; a kuaikim hei, thingphêk inribu hei, a bangru khang hei, a chopui hei neh a bul iṭhungna hei;

³⁴a chung rikhûna bera vun ṭingsen inôk hei; savun iṭha chihei, puanzâr rang hei;

³⁵Thuthlung Bôm neh a sunga lungphêk hei, a zônfung neh a sîng hei;

³⁶docham neh a mangrua hei, Pathian zianga lan ibai iser hei;

³⁷rângkachaka siam meiser siana hei, a meiser hei, a mangrua dang hei, meisera chok rang riak hei;

³⁸rângkachak mâichâm hei, inrithu rua siriak hei; namhoi ihâl rua hei; Puan-In lûtna kotbâia puanzâr rang hei;

³⁹sumsena tuam mâichâm neh â ṭhungna hei; a zônfunghei neh a mangrua murdi hei; risûk infâina tuibêl neh â ṭhungna hei;

⁴⁰rikulnaa sung rang puan hei, a chopuihei neh â ṭhungna hei; arkul sung lûtna kotbâia sung rang puanzâr neh a thlungna ruihei; Puan-In indetna hêmfung hei, Puan-Ina mang rang mangrua a nang murdi hei;

⁴¹Mun Rithianga thiampuhei ihâk rang thlukthla enihoi tak tak hei, thiampu Arona neh a naihei ihâk rang zakua ser hei an hong chôi a.

⁴²Israel naihei khan Mosia zianga PUMAPA thupêk angka takah khan îtinrêng an tho a.

⁴³Mosia khan iṭha takkan a eninfel a, PUMAPA thupêk lam angkah takin an siam iti a mun chu Mosia khan anni khah ṭhat a vur tâk a.