Read Biete FESUAKNA 4 Bible Online

FESUAKNA 4 - Biete bible

FESUAKNA 4

¹Mosia khan a sâm a, “Khateh, ne iam loiin neh ki thusîr khom ôi loiin, ‘PUMAPA ni ziangah inlâr mak e,’ ti ta sela ingkan im ki tho rang,” a ti a.

²PUMAPA khan a ziangah, “Ni kuta kha im ai nit?” a ti a. Ani khan, “Irol,” itin a sâm a.

³PUMAPA khan, “Nuaiah zuk paih ta,” a ti a. Mosia khan nuaiah a zuk paih a, irûl a chang tâk a; khanchu, Mosia khan a ṭi a, lâizâm a tho a.

⁴PUMAPA khan a ziangah, “Ni kutin zuk iban inla, armeiah man roh,” a ti a. Mosia khan a zuk iban a, armeiah a zuk man a; khanchu, a kutah khan irol ngir a nit nôk tâk a.

⁵PUMAPA khan, “Khangkah khan ni tho pêkin chu Israel naihein PUMAPA an chibulhei Pathian: Abrahama Pathian, Isaka Pathian, Jakoba Pathian chu ni ziangah a înlâr ngêt a nit iti rian fel an ti,” a ti a.

⁶PUMAPA khan hingka hin Mosia ziangah, “Ni kut kha ni zakorfual sungtiang ipûr roh,” a ti nôk a. Mosia khan a zakorfual sungtiang a zuk ipûr a, a hong kâisua nôkin chu a kut kha ivur angkana ṭekin a hong phâr tâk a.

⁷PUMAPA khan, “Ni zakorfual sungtiang ipûr nôk roh,” a ti a. Khanchu, Mosia khan a zakorfual sungtiang a zuk ipûr nôk a, a hong kâisua nôkin chu a taksa danghei angkan a hong nit nôk tâk a.

⁸PUMAPA khan, “Nang an iam no a, ni sinrikhêl tho masa kha an iam no khom a, â nikna hi chu iam ngêt an ti.

⁹Khan hi sinrikhêl inikahei ten khom an iam no a, ni ṭong an ringai no maiin chu, Nail vadung ata tui thâl inla, rinêng ichârah bun roh, kha vadunga rithoka nî thâl tui kha rinêng a tlung kaneh thisen chang a ti,” a ti a.

¹⁰Mosia khan PUMAPA ziangah, “O PUMAPA, kei chu sûn ithleng tâk a, ne som zianga thu ne sîr ma khomin dang rinâl mi ni mang a, ṭong thei zuai zuai ino neh ṭongri-ak ki nit,” a ti a.

¹¹PUMAPA khan a sâm a, “Tûm miriam hih bâi innei? Tûm kuar isêt a, bâi iboia siam? Tûm mu theina â pe anitnole mitichoa â siam? Keimah PUMAPA ni mang im a?

¹²Khasikin, atûn rithok zel roh; ni bâi kha inrithluk ki ta, ni ti rang khom nang inrisei ki ti,” a ti a.

¹³Nikhomsela, Mosia khan, “O PUMAPA, ringaiihoi takkan mi dang tir roh,” a ti a.

¹⁴Hi sikah hin PUMAPA ningthikna chu Mosia chungah a ṭuang tâk a, “Levia richi, ni suapuipa Arona ai om ni mak im a? Ani kha ṭongithei tak a nit iti ki riat. Khante, ringai roh, nang ritongpui rangin ai hong mai tâk a nit, nang a mu tenan chu lôm tak tak a ti.

¹⁵A ziangah thusîr ni ta, a thusîr rang iril mai ni ta, nin ruaikan nin bâi inrithluk ki ta, nin tho rang khom nangni inrisei mai ki ti.

¹⁶Ani kha mipuihei zianga ni mûr ni bâi nîng a ta, ani kha nang iṭong pêktu nîng a ti, a ta rangin nang chu Pathian angkah nîng ni ti.

¹⁷Khante, hi ne rol hih chôi inla, hi rol imangin risinsiana rikhêlhei sin thei ni ti,” a ti a.

¹⁸Mosia kha a tarpu Jethroa ziangah a fe a, a ziangah, “Ringaiihoi takkan ki mi, Aigupta rama omhei zu en rangin nen fe roh,” a ti a. Jethroa khan Mosia ziangah, “Rithlaringam takkan fe roh,” a ti a.

¹⁹Midian ramah a om lâiah khan PUMAPA khan Mosia ziangah, “Aigupta tiang kîr nôk ta roh; nang ithat itumhei murdi an thi riai tâk,” a ti a.

²⁰Khanchu, Mosia khan a nupui neh a naihei kha sakuartung chungah ân chuang a, Aigupta ram tiang a kîr nôk tâk a. Mosia khan Pathian irol khah a chôi mai a.

²¹PUMAPA khan Mosia ziangah, “Aigupta ram ni tlung tikin, sinrikhêl nang ki întho rang murdi hih Faroa maah ni tho rang a nit; nikhomsela, a lungril inkhir pêk ki ta, ki mihei kha infe zel rang phal no nih.

²²Khante, hingka hin Faroa ziangah ni ti rang a nit, ‘PUMAPA khan hingka hin a ti: Israel chu ki naipa, ki nai lutîr a nit.

²³Ki naipa kha ki sin a tho theina rangin infe roh nang ki ti a. Khannisela, infe nuam mak che a; khasikin, ni naipa, ni nai lutîr chu kî that rang a nit, a ti,’ ti roh,” a ti a.

²⁴Aigupta ipana lam lâiah an riabukah khan PUMAPA khan Mosia kha artongpui a, ithat a tum a.

²⁵A nupui Zipori khan lung ingaihvar a lâk a, a naipa ser môr vun kha a ât tan a, Mosia ke[7] ân tôn pêk a, “Thisen isuaa ki pasal ni nit hih,” a ti a.

²⁶Khante, hi sikah hin PUMAPA khan Mosia ringna kha a zua tâk a. Zipori khan sertan thu sikah khan, “Thisen isuaa ki pasal ni nit hih,” ai ti a nit.

²⁷PUMAPA khan Arona ziangah, “Mosia don rangin ramchârah va fe roh,” a ti a. Khanchu, a fe tâk a, Pathian tlângah a va tong a, â riam a.

²⁸Mosia khan Arona khah PUMAPA tirna thu murdihei neh risinsiana sinrikhêl itho ranga thu ai pêk murdihei kha â ril a.

²⁹Mosia neh Arona kha an fe a, Israel naihei lâia ulianhei murdi an koibûm a,

³⁰Arona khan Mosia zianga PUMAPA thu sîr murdihei kha â ril nôk riai a; khanchu, Mosia khan mipuihei makungah khan risinsiana sinrikhêl kha ân rilang pêk a.

³¹Mipuihei khan an iam a, PUMAPA khan Israela naihei kha a riat mai a, an dengthei tuang murdi chu ai mu a nit iti an riatin chu an lu an ikhûn a, chubai an ûn tâk a.