Read Biete FESUAKNA 40 Bible Online

FESUAKNA 40 - Biete bible

FESUAKNA 40

¹PUMAPA khan Mosia ziangah,

²“Thla masa tak, a sûn khat nî-ah khan Ritongna Puan-In hi inding rei.

³Thuthlung Bôm, Thupêk Sôm riziakna lungphêk khah a sungah seh unla, â matiang khah puanzâr sung rei.

⁴Docham khah a sungah lah lût unla; a chungah khan a mangrua khah seh rei. Meiser siana khom thun inlût sa unla, a siana rang takah inṭhung rei.

⁵Rângkachak mâichâm, namhoi hâlna rang kha, Thuthlung Bôm maah seh unla, Puan-In lûtna kotbâiah khan Puanzâr zar rei.

⁶Hâlrivâm lanna mâichâm khah Puan-In kottualah inṭhung unla,

⁷risûk infâina tuibêl khah Puan-in neh mâichâm kârah inṭhung unla, tui khom sung inbit rei.

⁸A tual kha rikul unla, a lûtna kotbâi puanzâr khom zar rei.

⁹“Khante, Puan-In neh a sunga mangrua murdi khah siriak rithiang inôtin thâr inla, hong rithiang liai tâng a ti.

¹⁰Khanungchu, mâichâm neh a mangrua murdi khah siriak rithiang inôtin thâr inla, hong rithiang liai tâng a ti.

¹¹Risûk infâina tuibêl neh â ṭhungna khom siriak rithiang inôtin ni thâr inrithiang rang a nit.

¹²“Arona neh a naipahei khah Puan-In rikul sungah hong ṭhui inla, dân angkan rithârnan tui risil riseh.

¹³Arona chu thiampu thlukthlahein inrivon la, riak inrithun la, thiampu sin itho rangin serinran roh.

¹⁴A naihei khom koi inlût inla, anni khah zakorfual inhâk roh.

¹⁵An pa riak ni înrithu angka khan anni khom thiampu sin itho rangin riak inrithu roh; riak inrithu an nit nungin chu thiampu an init kumkhua rang tâk a nit,” a ti a.

¹⁶PUMAPA thupêk angka takah khan Mosia khan tinrêng a tho riai a.

¹⁷Aigupta ram ata an suak, a kum inikna, a thla khatna, a sûn khat nî-ah khan Ritongna Puan-In khah an inding tâk a.

¹⁸Mosia khan a bul iṭhungnahei khah ân ṭhung a, a banghei khah â tung a, a bangru khanghei â khop a, a chopuihei a phun a.

¹⁹Puan-In chung puan khom a zar a, a chung rithua nôk khom a dâng a. PUMAPA thupêk lam angka takah khan a tho a.

²⁰Lungphêk inikah kha Thuthlung Bôm sungah a thun a. A zônfunghei khah a rôl a, a sîng munin a sîng a.

²¹Puan-In sungah Thuthlung Bôm khah a sia a, puanzâr kha a zar inrili a. PUMAPA thupêk lam angka takah khan a tho a.

²²Puan-In sung, chontan pûtah ual mâr tiangah khan docham khah a do a,

²³PUMAPA thupêk angka takin a chungah khan ibai iser khah a sia a.

²⁴Sim tiangah khan meiser siana ribom khah docham ridînah khan ân ṭhung a,

²⁵PUMAPA maah khan a thupêk angka takin meiser khah â chok a.

²⁶Rângkachak mâichâm khah chontan puanzâr kôlah khan a do a.

²⁷PUMAPA thupêk angka takin thil namhoihei khah a hâl a.

²⁸Puan-In lûtna kotbâi puanzâr khah a zar a;

²⁹Kha puanzâr pên Puan-In tualah khan hâlrivâm lanna mâichâm khah ân ṭhung a. Amakhan PUMAPA thupêk lam angka takah khan hâlrivâm thillan neh bubâl thillanhei kha a lan a.

³⁰Sumsen tuibêl neh ân ṭhungna khah Puan-In neh mâichâm kârah khan a sia a, tui a sung inbit a.

³¹Amakhan Mosia hei, Arona hei neh a naipahei khan an kut neh kehei an risûk a.

³²Puan-In sunga manih, mâichâma manih an fe rang ikipah PUMAPA thupêk lam angkan an kut neh kehei an irsûk ngai a nit.

³³Mosia khan Puan-In neh mâichâm khah â vêlkan rikul a sung a, a lûtna kotbâi puanzâr khom a zar a. Itho rua murdi chu a tho zoi riai tâk a.

³⁴Khanungchu, Puan-In khah sûmin a zuang rikhû a, Puan-In sung kha PUMAPA roinpuina vâr ri-el khan a sip tâk a.

³⁵Khasikah khan Puan-In sungah Mosia khah lût thei mak a, PUMAPA roinpuinan ai sip khap a nit.

³⁶Sûm khah Puan-In ata arthon bangin Israel naihei khan an riabuk an ithon ngai a nit.

³⁷Sûmin Puan-In khah â rikhû khap kârkah chu an riabuk an ithon ngai ino a nit.

³⁸Ramchâra an ivâi sungkah kha Israelhei mitmuah PUMAPA ompuina sûm khan sûnah Puan-In khah a tuam a, zânah zântluanin meichokin Puan-in chungah khan ai om ngai a nit.