Read Biete FESUAKNA 5 Bible Online

FESUAKNA 5 - Biete bible

FESUAKNA 5

¹Kha rizoiah khan Mosia neh Arona kha Faroa ziangah an fe a, “PUMAPA, Israelhei Pathianin hingka hin ai ti a nit: ‘Ramchârah ki ziangah kût an mang theina rangin ki mihei infe ta roh,’ a ti,” an ti a.

²Faroa khan, “PUMAPA nin iti hih tûm ai nit, a thu kî zôma Israelhei ki îsua rang hi? PUMAPA chu ireh khom reh mang a; Israelhei khom infe no ning e,” a ti a.

³Anni khan, “Hebraihei Pathian kha kin ziangah a zuang înlâr a nit. Sûn thumkah lama la ramchârah va fêng kin ta, PUMAPA kin Pathian ziangah ribôlna la va lan rong ung; khanonchu, ripuiin manih, khandaiin manih kuttum a ne itho rang a nit,” an ti a.

⁴Aigupta rêng khan Mosia neh Arona ziangah, “Îtho sik im nangmani hin mihei sintho lâi nin închâi hi? Suakhei khah sintho nôk zel ta riseh,” a ti a.

⁵Faroa ngir khan, “Aigupta mihei nêkan hi mihei hi an tam tâk a, sin intho khâi ino nin itum a nit hih,” a ti a.

⁶Kha nî ngirah khan Faroa khan suak sininthotuhei neh Israelhei lâia ulianhei khah thu a pêk a,

⁷“Rolung siamna rangin bupôl peh khâi no rei; anmani ngêiin ifen bupôl var tik bûm riseh.

⁸Khanniseh, zoro thlenga rolung an lei isiam ngai zâkah ngir an siam mai rang a nit, nin inroi pêk rang ni mak e; rithaboi mi an nit sikin kêng, ‘Kin Pathian ziangah ribôlna lan rangin nen fe roh,’ an iti a nit hih.

⁹Sin itho rang pen tam ual unla, ôl phâk iloiin sin tho riseh, khan kêng ṭong chanlamboiheiah hin kuar sungna zoro an inei no rang,” a ti a.

¹⁰Sininthotuhei neh Israelhei lâia ulianhei khah an fe suak a, mipuihei ziangah khan, “Faroa khan hingka hin a ti, ‘Bupôl nangni peh khâi no ning e.

¹¹Nangmani ngêiin nin mu thei theina nin zong rang a nit; khannisela, siam rang zâk bituk chu inroi ual ni no nih,’ a ti,” an ti a.

¹²Aigupta ram muntinah mihei chu bupôl izongin an rivâk suai tâk a.

¹³Sininthotuhei khan, “Zoro thlenga bupôl ipe an nit lâia angka takah khan nin sin rang bituk kha tho zoi vak vak rei,” itin an tur tak tak a.

¹⁴Sininthotuhei khan Israel lâia ulian sin enkoltu ranga an iphunhei kha an itôk a, “Mizân neh vuansûn nin rolung siam rang zâk îtho sik im nin siam zoi no,” an ti a.

¹⁵Khanchu, Israel lâia ruaitua phunhei kha Faroa ziangah an fe a, “Îtho sik im ni suakhei hih hingka taka ni ne întuang hi?

¹⁶Ni suakhei hih bupôl lak ipe ni mang ung a, rolung siam rei, ni ne ti a, ni bôihei hih ito kin nit a; im kin ichâina, nangma mihei hih â thon châitu chu an nit,” itin an riphun a.

¹⁷Faroa khan an ziangah, “Rithaboi nin nit, nin rithaboi sika riphialnan kêng, ‘PUMAPA ziangah ribôlna lan rangin nen fe roh,’ nin iti ai nit.

¹⁸Atûn fe unla, nin sin rang kha va sin rei. Bupôl ipe ni tlak no tin u, khan rolung nin siam rang zâk chu inroi ni tlak no nih,” a ti a.

¹⁹Sûn tina rolung an siam rang zâk bituk kha inroi rang ni mak iti an riatin chu Israel lâia ruaituhei khan an chan ai siat titak a nit iti an riat tâk a.

²⁰Faroa ziang ata an hong suakin chu anmani lei ingâka om Mosia neh Arona kha an rimupui a.

²¹An ziangah, “PUMAPA khan nin sintho hi a mu a, nangni intuang riseh. Rêng neh a milianhei kha nin ne înnel tâk a nit hi. Ne that khom seh riphialna rang iṭha tak nin isiam pêk tâk a nit hih,” an ti a.

²²Mosia khan PUMAPA tiang a ngat a, “PUMAPA, îtho sikin im ni mihei chungah intakna ni îṭhum? Îtho sik im ni ne itir kher kher hi?

²³Faroa ziangah ner minga thu sîr ranga ki fe ata khah ki mihei hi deng a înthei nôk ual a nit; nangmah lakin ni mihei la saninzôk ual mak che a,” a ti a.