Read Biete FESUAKNA 6 Bible Online

FESUAKNA 6 - Biete bible

FESUAKNA 6

¹PUMAPA khan Mosia ziangah, “Atûna hin Faroa chunga ki thiltho tum chu nî mu rang tâk a nit; anmani infe rangin kut irât takin tur ki ta, ki kut irât tak sikin a ram ata nangni ûm suak a ti,” a ti a.

²Pathianin Mosia ziangah, “Keimah hih PUMAPA chu ki nit:

³Abrahama ziangah, Isaka ziangah neh Jakoba ziangah khan Pathian Tinrêngthothein ki lei inlâr tâk a; khanniseh, ker ming PUMAPA a nit iti chu an ziangah lei inreh ngai mang e.

⁴Anmani neh thu ki thlung a; an mikhualna ram, Kanan ram chu anmani ipeh rangin an ziangah ṭong ki lei inkung a.

⁵Aigupta mihei suaka tâng Israel naihei lungzîng irung irî khom ki lei iriat a nit, khabanah, ki thuthlung khom kî riat mai a nit.

⁶“Khasikin, Israel naihei chu iril roh, Keimah hih PUMAPA chu ki nit; Aigupta mihei ringkola rithokin nangni la suak ki ta, an bôi nin nitna ata nangni inzalen ki ti. Khante, ke bân ritha rât takin nangni sanisuang ki ta, anni chu natinsat takkan kuttum thông ki ti.

⁷Ki mihei nîng nin ta, nin Pathian nîng ki ti; Aigupta mihei ringkol ata nangni ki ṭhuisuak tikin chu keimah hih PUMAPA nin Pathian chu ki nit iti reh tâng nin ti.

⁸Abrahama, Isaka neh Jakoba hei zianga bân iphar puma ipeh ranga ṭong ki înkung ramah nangni ṭhui inlût ki ta; nin lua rangin nangni pêng ki ti, keimah hih PUMAPA chu ki nit,” a ti a.

⁹Mosia khan Israel naihei ziangah kha thu khah a va sîr a; nikhomsela, an bôi ringkol kha an rangin a rik tak tak sikin an lungril a ngûi a, Mosia thu sîr khah lei ringai nuam mak a.

¹⁰PUMAPA khan Mosia chu â sôn a,

¹¹“Fen la, Aigupta rêng Faroa chu a ram ata Israel naihei isua rangin va ril roh,” a ti a.

¹²Mosia khan PUMAPA ziangah, “Ringai ta, Israel naihei khomin ki thu sîr ringai nuam mak a; keimah ṭong dân thiam ino thu sîr hih ingkam Faroa vângin teh arngai rang a?” a ti a.

¹³Nikhomsela, PUMAPA khan Mosia neh Arona â sôn a, “Aigupta rama rithoka Israelhei iṭhui suak rangin nangni kî ti a nit iti Israel naihei neh Aigupta rêng Faroa kha va ril rei,” a ti a.

¹⁴Hihei hih an panam luhei chu an nit: Israela nai lutîr Reubena naipahei chu: Hanoka, Palua, Hezrona, Karmia hei an nit.

¹⁵Simeona naipahei chu: Jemuela, Jamina, Ohada, Jakina, Zohara hei, Kanan nupang neh an nai Saula hei an nit.

¹⁶Hihei hih Levia richi zuang risuihei chu an nit: Gersoma, Kohatha, Meraria hei an nit a. Levia kha kum riza lei sômithumka ilikah ai dam a nit.

¹⁷Gersoma naipahei chu: Libnia neh Simeia hei hih an nit; anni hin richi an inei intam ok a nit.

¹⁸Kohatha naipahei chu: Amrama, Izara, Hebrona, Uziela hei an nit. Kohatha chu kum riza lei sômithumka ithumkah ai dam a nit.

¹⁹Meraria naipahei chu: Mahalia neh Musia an nit. Hihei hih an richi dungizuia Levia richihei chu an nit.

²⁰Amrama khan a pa farnu Jakobedi nupuiin a nei a; Arona neh Mosia a nei pêk a. Amrama chu kum riza lei sômithumka sarikah ai dam a nit.

²¹Izara naipahei chu: Kora, Nefega, Zikria hei an nit.

²²Uziela naipahei chu: Misaela, Elzafana, Sithria hei an nit.

²³Nasona farnu, Aminadaba nainu Elisebi kha Aronan nupuiin a nei a; Nadaba, Abihua, Eleazara, Ithamara hei kha a nei pêk a.

²⁴Kora naipahei chu: Asira, Elkana, Abiasafa hei an nit. Hihei hih Kora richi an panam luhei chu an nit.

²⁵Arona naipa Eleazara khan Putiela nainuhei lâia khatkah nupuiin a nei a; Finehasa a nei pêk a. Hihei hih Levia richi an panam dungizuia richibulhei chu an nit.

²⁶PUMAPA khan Mosia neh Arona ziangah khan a nit, “Aigupta ram ata Israel naihei chu an rêngkan ṭhui sua riai rei,” ai ti kha.

²⁷Anni hih an nit Aigupta rêng Faroa zianga, “Israelhei hi Aigupta ram ata isua riai roh,” va tituhei chu.

²⁸Aigupta ramah PUMAPA khan Mosia â sôn a,

²⁹a ziangah, “Keimah hih PUMAPA chu ki nit; ni zianga ki thu sîr murdi Aigupta rêng Faroa va ril roh,” a ti a.

³⁰Nikhomsela, Mosia khan PUMAPA ziangah, “Ringai ta, keimah hih ṭong thei zuai zuai ino ki nit a, ingkan tak im Faroan ki thu sîr arngai nuam rang tâk a?” a ti a.