Read Biete FESUAKNA 7 Bible Online

FESUAKNA 7 - Biete bible

FESUAKNA 7

¹PUMAPA Pathian khan Mosia ziangah, “Ringai roh, Faroa ta rangin Pathian angkan nang kî siam rang a nit. Ni ulianpa Arona chu ni zânthla nîng a ti.

²Thu nang kî pêk murdi iril ni ta; ni ulianpa Arona hin Faroa chu isîr pêk a ta; a ram ata Israelhei chu a îsua rang a nit.

³Khannisela, Faroa lungril inkhir ki ta, risinsianahei neh sinrikhêlhei Aigupta ram sungah ken pung khoma,

⁴ani khan nin thu ringai nuam no ni a. Khanchu, Aigupta ram chungah ki kut iṭhum ki ta, kuttum natinsat tak thông ki ta; ki mi Israelhei chu Aigupta rama rithokin ṭhui suak ki ti.

⁵Aigupta mihei chungah ki kut ke lek a, an ram ata Israel naihei ki ṭhui sua tenan chu, Aigupta mihei khan PUMAPA ki nit iti reh tâng an ti,” a ti a.

⁶Mosia neh Arona khan PUMAPA thupêk angka takah khan an tho a.

⁷Faroa ziangah thu an isîrah khan Mosia chu kum sômiriatkah mi a nit a, Arona chu kum sômiriatka kum ithumkah mi a nit.

⁸PUMAPA khan Mosia neh Arona ziangah, “Faroan, ‘Sinrikhêl im manih tho ta u,’ nangni a lei tin chu nangman Arona ziangah, ‘Ne rol khah lan la, Faroa maah intâl roh; khanchu, irûl hong chang a ti,’ ni ti rang a nit,” a ti a.

¹⁰Khanchu, Mosia neh Arona kha Faroa ziangah an fe a, PUMAPA thupêk angka takin an tho tâk a. Arona khan irol khah Faroa neh a milianhei maah a hang intâl a, irûl a hong chang tâk a.

¹¹Khanungchu, Faroa khomin a mi vârhei neh dôithiamhei a koi a; anni khomin mitvaidôiin an tho lam angka ngirah khan an tho tâk a.

¹²An irol khah an zuk intâl a, irûl a hong chang zit a. Khannisela, Arona rol khan annihei irol khah â lem riai tâk a.

¹³PUMAPA ti lam angka takin Faroa lungril chu inkhirin a om a, an thu ringai nuam mak a.

¹⁴PUMAPA khan Mosia ziangah, “Faroa lungril chu inkhirin a om a, mihei chu a îsua nuam ino a nit.

¹⁵Khasikin, zîngah Faroa ziangah va fen la, Nail vadung ipana a fe lâiin a mu theina rangin vadung pangah ngîr inla; ne rol irûl ichang khah chôi roh.

¹⁶Khanchu, a ziangah, ‘PUMAPA, Hebraihei Pathian khan ki mihein ramchârah chubai an ne ûn theina rangin infe roh,’ iti rangin ni ziangah a ne hong itir a nit. Ringai roh, atûn tenan a thu zôm nuam mak che a,

¹⁷PUMAPA khan hingka hin a ti: ‘A sinthoa rithoka hin PUMAPA chu tûm ai nit iti reh tâng ni ti; ringai roh, hi ke rol ki kuta kî chôiah hin Nail vadunga tui hi rivêl ki ta, thisen chang tâng a ti.

¹⁸Ingahei kha thîng an ta, vadung chu a thû nam iseh rai sikin Aigupta mihei khan tui chu itir tâng an ti; a ti,’ ni ti rang a nit,” a ti a.

¹⁹PUMAPA khan Mosia ziangah, “Arona kha hingka hin iril roh, ‘Ne rol chôi inla, Aigupta rama tui chungah ilek roh, vadungpui chungah, vadungte chungah, dîl chungah, tui thlingna murdi chungah ilek roh; khanchu, thisen a hong ichang zit rang a nit. Aigupta ram sung pumpuiah tui rihungna thingkhuangah neh lungbêl heiah khom thisen ai om riai rang a nit,’ ti roh,” a ti a.

²⁰Mosia neh Arona khan PUMAPA thupêk angka takah khan an tho a; â rol khah â lek a, Faroa neh a milianhei mitmuah khan vadunga tui khah a zuk itôk a; khanchu, vadunga tuihei rêng rêng kha thisen a chang riai tâk a.

²¹Vadunga ingahei khah an thi vang tâk a; vadung khah a thûk vu tâk a. Aigupta mihei khan vadunga tui kha in thei khâi mak a; Aigupta ram pumpui tui kha thisen ai chang riai tâk a nit.

²²Aigupta dôithiamhei khomin an dôi imangin an tho sa ngir a; Faroa lungril chu inkhirin a om a, PUMAPA ti lam angka khan Mosia neh Arona ṭong kha ringai nuam mak a.

²³Faroa kha a inah a fe a, a lungrilah îte ngaitua vuai mak a.

²⁴Aigupta mi murdihei khan vadung tui an in thei khâi no sikin vadung rikamah khan tui iin rang izongin tuikuang an choih a.

²⁵PUMAPA khan vadung tui â tôka rithokin sûn sarikah sar a nit tâk a.