Read Biete FESUAKNA 8 Bible Online

FESUAKNA 8 - Biete bible

FESUAKNA 8

¹PUMAPA khan Mosia â sôn a, “Faroa ziangah fen la, a ziangah, PUMAPA khan hingka hin a ti, ‘Ki sin an tho theina rangin ki mihei isua ta roh.

²Nen fe nuam noa a nitin chu, ni ram pumpui hih uṭok intâmin kuttum nangni kî tho rang a nit.

³Nail vadung chu uṭokin bit khap a ta, hong suak an ta, ni rêng inah hong lût an ta, ne kûnah neh ni zâlmunah hei, ni milianhei in neh ni mipuihei inah, nin lungthu heiah neh ne bai imetna khêng heiah khom an iom vang rang a nit.

⁴Uṭokin nang hong bôm an ta, ni mihei neh ni milianhei khom hong bôm vang an ti, a ti,’ ti roh,” a ti a.

⁵PUMAPA khan Mosia ziangah, “Uṭok hong isuaka Aigupta ram inzap rangin Arona kha hingka hin iril roh, ‘Ne rol khah vadung chungah, tuikong chungah, dîl chungah hei ilek roh; khanchu, Aigupta ramah uṭok a hong întâm rang a nit,’ ti roh,” a ti a.

⁶Arona khan â rol khah tui murdi chungah khan â lek a; khanchu, uṭok a hong intâm a, Aigupta ram khah an sipzap tâk a.

⁷Dôithiamhei khom khan mitvaidôi imangin imuangah khan uṭokhei an hong isua sa a.

⁸Faroan Mosia neh Arona khah a koi a, “Uṭokhei hi ne khâi inrikiang pêk rangin PUMAPA ziangah ngên rei; khanchu, PUMAPA ziangah ribôlnahei an lan theina rangin, nin mihei hih infe suak ki ti,” a ti a.

⁹Mosian a sâm a, “Nang ngên pêk ki ti, nangmah neh ni milianhei neh ni mihei ina rithoka uṭokhei iroa, Nail vadung banga an om rang zoro bang khah khit inla, nang ṭongṭai pêk ki ti,” a ti a.

¹⁰“Naktûka rithokin ne ngên pêk roh,” itin rêng khan a sâm a. Mosia khan, “Ni ner phat lam takin nang tho pêk ki ti; khanchu, PUMAPA kin Pathian angkana hi Pathian dang zel omak iti reh thei tâng ni ti.

¹¹Nangmah neh ni milianhei neh ni mihei chu uṭokhei inboi pêk nîng nin ta, Nail vadungah ti no mun dangah om khâi no nih,” a ti a.

¹²Mosia neh Arona khan Faroa chu an mâk a, Mosia khan Faroa bômtu uṭokhei khah inrikiang pêk rangin PUMAPA chu a ngên tâk a.

¹³PUMAPA khan Mosia ngên lam angkan a tho a, insunga om, tuala om neh loia om uṭokhei chu an thi riai tâk a.

¹⁴Aigupta mihei khan ilian tak takkan an buk inpông a, a rampumin a thu ar-uailul tâk a.

¹⁵Faroa khan uṭokhei an thi vang tâk iti a mun chu, a tuklul ân lian nôk a, PUMAPA lei iti thlâm angka khan, Mosia neh Arona thu khah ringai pêk nuam khâi mak a.

¹⁶PUMAPA khan Mosia ziangah, “Arona chu â rola rinêng rivêl rangin iril roh, Aigupta ram pumpuia pilvut chu sêtemek[8] ai chang rang a nit,” a ti a.

¹⁷Khaangkan Arona khan â rolin rinêng arvêl a, Aigupta ram sunga pilvut murdi kha sêtemek a chang riai tâk a, miriamhei neh ranhei kha sêtemek khan a tuam zit tâk a.

¹⁸Dôithiamhei khan an mitvaidôi imangin sêtemekhei isua an tum a; nikhomsela, thei mak a. Kil tinah sêtemek an indar a,

¹⁹dôithiamhei khan rêng ziangah khan, “Amahih chu Pathian sintho kêng ai nit,” an ti a. Khan khoma Faroa khan a tuklul ân lian a, PUMAPA lei iti thlâm tâk angka khan Mosia neh Arona thu khah ringai nuam mak a.

²⁰PUMAPA khan Mosia ziangah, “Naktûk zîngah imah takkan fen la, Faroa vadunga lêng ranga fe var tongpui inla, a ziangah, PUMAPA khan hingka hin a ti, ‘Ki sin an tho theina rangin ki mihei isua ta roh.

²¹Nang kî ti thlâm a nit, ne sua nuam noa a nitin chu ithoi[9] lôm nangmah neh ni milianhei neh ni mihei kuttum nangni thonan hong tir ki ti, Aigupta mihei insung sip zit an ta, rinêngah khom an isoi mur mur rang a nit.

²²Ki mihei omna Gosen ram rêk chu ihoih ki ta, Keimah, PUMAPA ngêiin amahih kî tho a nit, iti ni riat theina rangin kha munah khan chu ithoi zel om no nih.

²³Ki mihei neh ni mihei chu ki îthlei rang a nit. Hi sinrikhêl hih naktûkah ithon ai om rang a nit, a ti,’ ti roh,” a ti a.

²⁴PUMAPA khan Faroa inah neh milianhei inah khan ithoi lôm a tir zut zut tâk a, Aigupta ram chu a ram pumin ithoi khan an isiat riai tâk a.

²⁵Faroa khan Mosia neh Arona khah a koi a, “Hi ram sungah hin nin Pathian ziangah ribôlnahei va lan rei,” a ti pêk a.

²⁶Mosia khan, “Khangkana tho chu idik no nih, PUMAPA kin Pathian zianga kin ribôlna lan rang hin Aigupta mihei ningthikin siam a ta; an îhua thilhei ithon an mitmuah ribôlna sahei kin lanin chu, lungin an ne idêng that rang a nit.

²⁷Ramchârah sûn thumka lamah kin Pathianin thu a ne pêk lam angka takin ribôlna kin ilan rang a nit,” itin a sâm a,

²⁸Rêng khan, “PUMAPA nin Pathian zianga ribôlna lan rangin ramchârah nangni infêng ki ta, khan ilah takah chu nin fe rang ni mak e, kei khom ne ṭongṭai pêk sa rei,” a ti a.

²⁹Mosia khan a sâm a, “Ki suak zoi kaneh ithoi lôm hih nangmah neh ni milianhei neh ni mihei ziang ata rikiang rang takin PUMAPA ziangah ngên ki ti. Khan nê lêm nôkin PUMAPA zianga ribôlna lan ranga fe loi rangin mipuihei ni khap nôk rang ni khâi mak,” a ti a.

³⁰Mosia khan rêng khah a mâk a, PUMAPA ziangah a ṭongṭai tâk a,

³¹Mosia ngên lam angka takin PUMAPA khan a tho a, Faroa neh a milianhei neh a mihei khah ithoi khan an mâk tâk a; khatka lua om khâi mak a.

³²Nikhomsela, hi zoro khomah hin Faroa khan a tuklul kha ân lian a, mihei khah a îsua nuam nôk khâi ino a nit.